ପାଟନା,୨୮।୨: ବିହାରରେ ମଦ ନିଷେଧାଦେଶକୁ ଏକ ବଡ଼ ଖବର ସାମ୍ନାକୁ ଆସିଛି। ଏଣିକି ରାଜ୍ୟରେ ମଦ ପିଇ ଧରାପଡ଼ିଲେ ଯିବାକୁ ପଡ଼ିବନି ଜେଲ୍। ଏହା ବଦଳରେ କେବଳ ମଦ ମାଫିଆଙ୍କ ବିଷୟରେ ସୂଚନା ଦେବାକୁ ପଡ଼ିବ। ଏନେଇ ମୁଖ୍ୟମନ୍ତ୍ରୀ ନୀତୀଶ କୁମାର ବଡ଼ ନିଷ୍ପତ୍ତି ନେଇଛନ୍ତି। ଯଦି ମଦ ମାଫିଆ ଗିରଫ ହୋଇଯା’ନ୍ତି ତେବେ ମଦ୍ୟପାନକାରୀଙ୍କୁ ଆଉ ଜେଲ୍ ଯିବାକୁ ପଡ଼ିବ ନାହିଁ। ଏକ୍ସାଇଜ କମିଶନର କାର୍ତ୍ତିକେୟ ଧନଜୀ ଏନେଇ ସୂଚନା ଦେଇଛନ୍ତି। ସୂଚନା ମୁତାବକ ବିହାରର ଜେଲ୍ରେ ମଦ୍ୟପାନକାରୀଙ୍କ ସଂଖ୍ୟା ବୃଦ୍ଧି ହେତୁ ଏଭଳି ନିଷ୍ପତ୍ତି ନିଆଯାଇଥିବା ଜଣାପଡ଼ିଛି। ସୋମବାର ଆୟୋଜିତ ହୋଇଥିବା ଏକ ବୈଠକରେ ଏହି ବଡ଼ ନିଷ୍ପତ୍ତି ନିଆଯାଇଛି। ଏଥିରେ ବିହାର ପୋଲିସ ଓ ମଦ ନିଷେଧ ବିଭାଗ ସାମିଲ ହୋଇଥିବା ବେଳେ ସେମାନଙ୍କୁ ଏକ ବିଶେଷ କ୍ଷମତା ଦିଆଯାଇଛି। ସୂଚନାଯୋଗ୍ୟ, ୨୦୨୧ ନଭେମ୍ବରରେ ବିହାର ସରକାର ଏକ ଆକଳନ ପ୍ରକାଶ କରିଥିଲେ ଯାହା ଲୋକଙ୍କୁ ଚକିତ କରିଥିଲା। ଜାନୁୟାରୀ ୨୦୨୧ରୁ ଅକ୍ଟୋବର ୨୦୨୧ ପର୍ଯ୍ୟନ୍ତ ରାଜ୍ୟର ବିଭିନ୍ନ ଜିଲାରେ ସ୍ବତନ୍ତ୍ର ଚଢ଼ାଉ କରାଯାଇ ୪୯ହଜାର ୯ଶହ ଲୋକଙ୍କୁ ଗିରଫ କରାଯାଇଥିଲା। ଯେଉଁଥିରେ ମଦ୍ୟପାନକାରୀ ଓ ମଦ ମାଫିଆ ସାମିଲ ଥିଲେ। ଏହି ସମୟରେ ମୋଟ ୩୮ ଲକ୍ଷ ୭୨ ହଜାର ୬୪୫ ଲିଟର ବେଆଇନ ମଦ ଜବତ କରାଯାଇଥିଲା। ଫଳରେ ଜେଲ୍ ଓ ବିହାର କୋର୍ଟରେ ନିଷେଧାଦେଶ ମାମଲାଗୁଡ଼ିକର ଭାର ବଢ଼ିଯାଇଥିଲା। ପରେ ଏହି ମାମଲା ସୁପ୍ରିମକୋର୍ଟରେ ପହଞ୍ଚିଥିଲା। ଜାମିନ ଆବେଦନକୁ ନେଇ ଲାଗିଥିବା ଲାଇନ୍କୁ ଦେଖି ସୁପ୍ରିମକୋର୍ଟ ମଧ୍ୟ ଚିନ୍ତା ପ୍ରକଟ କରିଥିଲେ। ତେବେ ଆସନ୍ତା ମାର୍ଚ୍ଚ ୮ରେ ଏହି ମାମଲାର ପରବର୍ତ୍ତୀ ଶୁଣାଣି ହେବାକୁ ଥିବା ବେଳେ ବିହାର ସରକାର ଗିରଫ ନ କରିବା ପାଇଁ ଏକ ବଡ଼ ନିଷ୍ପତ୍ତି ନେଇଛନ୍ତି।
