ଖୋର୍ଦ୍ଧା ଅଫିସ,୩୧ା୩: ଖୋର୍ଦ୍ଧା ଗୁରୁଜଙ୍ଗ ନନ୍ଦସାହିର ତ୍ରିଲୋଚନ ସାହୁ(୪୪)। ଗତ ୨୦ବର୍ଷ ହେବ ଖବରକାଗଜ ବିତରକଭାବେ କାମ କରୁଛନ୍ତି। ଦୁଇ ପୁଅ, ସ୍ତ୍ରୀ, ବାପା, ମା’ଙ୍କୁ ନେଇ ତାଙ୍କ ପରିବାର। ପ୍ରଥମେ ଘରୋଇ କମ୍ପାନୀରେ କାର୍ଯ୍ୟ କରୁଥିଲେ। ସେହି ସମୟରେ ବରିଷ୍ଠ ବିତରକ ନିଧି ମୁଦୁଲିଙ୍କ ସଂସ୍ପର୍ଶରେ ଆସିଥିଲେ। ତାଙ୍କ ପ୍ରେରଣାରେ ସେ କମ୍ପାନୀରେ କାମ ସହ ସକାଳ ସମୟରେ ଖବରକାଗଜ ବିତରଣ କରିବାକୁ ଲାଗିଲେ। ପ୍ରଥମେ ୧୦ଖଣ୍ଡରୁ ଆରମ୍ଭ କରି ୪ଶହ ପର୍ଯ୍ୟନ୍ତ ପେପର ବିକ୍ରି କରୁଥିଲେ। ଖୋର୍ଦ୍ଧା ସହର ସମେତ ଭାଲିଆବାଡି, ଲୋକେଶ୍ୱର, ଗୁରୁଜଙ୍ଗ, ବଜାର ଆଦି ଅଞ୍ଚଳରେ ପେପର ବିକ୍ରି କରିଥାନ୍ତି। ଅଧିକାଂଶ ଗ୍ରାହକ ହେଉଛନ୍ତି ଫୁଟପାଥ ବ୍ୟବସାୟୀ, ଅଟୋ ଚାଳକ, ପାନ ଓ ଚା’ଦୋକାନୀ। ଖବରକାଗଜ ଦେବା ସହ ଭାବର ଆଦାନପ୍ରଦାନ ହୋଇଥାଏ ବୋଲି ତ୍ରିଲୋଚନ କହିଛନ୍ତି। ସେ ଆହୁରି କହିଛନ୍ତି ଯେ, କରୋନା ସମୟରେ ହଠାତ୍ ଦୋକାନ ବଜାର ବନ୍ଦ ହୋଇଗଲା। ରାସ୍ତାକଡ ବ୍ୟବସାୟୀଙ୍କୁ ଅନ୍ୟତ୍ର ସ୍ଥାନାନ୍ତର କରାଗଲା। ସେହି ସମୟରେ ଖବରକାଗଜ ଏକଦମ୍ ଠପ୍ ହୋଇଗଲା। ସଂକ୍ରମଣ ଭୟରେ ଲୋକେ ଖବରକାଗଜ ନେବାକୁ ମନା କଲେ, ସେପଟେ ବ୍ୟବସାୟୀମାନେ ମଧ୍ୟ ଖବରକାଗଜ ନେବାକୁ ସିଧାସଳଖ ମନା କରିଦେଲେ। ଦୁଇ ବର୍ଷ ମଧ୍ୟରେ ପ୍ରାୟ ୨ଶହ ଗ୍ରାହକଙ୍କୁ ହରାଇଛି। କରୋନା କଟକଣା ହଟିବା ପରେ ପୁଣି ଥରେ କେତେଜଣ ବେପାରୀ ଖବରକାଗଜ ନେବା ଆରମ୍ଭ କରିଛନ୍ତି। ଆଜିର ଡିଜିଟାଲ ଯୁଗରେ ଲୋକେ ଘରେ ବସି ମୋବାଇଲରେ କିଛିକ୍ଷଣରେ ଖବର ପାଇଯାଉଛନ୍ତି। କିନ୍ତୁ ଖବରକାଗଜ ପଢିବାରେ ଯେଉଁ ମଜା ରହିଛି, ତାହା ମୋବାଇଲରେ ନାହିଁ। କରୋନା ସମୟରେ ଖବରକାଗଜ ବିତରକମାନେ ମଧ୍ୟ ପ୍ରଭାବିତ ହୋଇଛନ୍ତି। ତଥାପି ସମସ୍ତ ବାଧାବିଘ୍ନ ସତ୍ତ୍ୱେ ଧାରାବାହିକ ଭାବେ ବିତରଣ ଜାରି ରହିଛି। ସମସ୍ତେ ଖବରକାଗଜ ପଢନ୍ତୁ ବୋଲି କହିଛନ୍ତି ତ୍ରିଲୋଚନ।
