ଭୁବନ, ୭।୮(ଡି.ଏନ୍.ଏ.)
ଢେଙ୍କାନାଳ ଜିଲା ଭୁବନ ଏନ୍ଏସିର ସାଧାରଣ ଯୋଗାଣ ବ୍ୟବସ୍ଥା (ପିଡିଏସ୍)ରେ ଗରିବ ହିତାଧିକାରୀଙ୍କୁ ଜୁଲାଇ ମାସର ଗହମ କୋଟା କମାଇ ଦିଆଯାଇଛି। ଯୋଗାଣ ବିଭାଗ ପକ୍ଷରୁ କେ.ଜି. ପିଛା ୨୦୦ ଗ୍ରାମ କମ୍ ଗହମ ପ୍ରଦାନ କରାଯାଇଥିବା ଅଭିଯୋଗ ହୋଇଛି। ଉତ୍ପାଦନ କମିଥିବାରୁ କେନ୍ଦ୍ର ସରକାରଙ୍କ ପକ୍ଷରୁ ଜୁଲାଇର କୋଟା ହ୍ରାସ କରାଯାଇଛି। ଫଳରେ ଏଭଳି ସମସ୍ୟା ଉପୁଜିଥିବା ବିଭାଗୀୟ ଅଧିକାରୀ କହିଛନ୍ତି। ଅନ୍ୟପଟେ ଏହାକୁ ନେଇ କୌଣସି ସ୍ପଷ୍ଟୀକରଣ ଦିଆଯାଇ ନ ଥିବାରୁ ଡିଲରଙ୍କୁ ସନ୍ଦେହ ଚକ୍ଷୁରେ ଦେଖୁଛନ୍ତି ହିତାଧିକାରୀ, ଯାହାକୁ ନେଇ ବିଭିନ୍ନ ସ୍ଥାନରେ ଅପ୍ରୀତିକର ପରିସ୍ଥିତି ସୃଷ୍ଟି ହେଉଛି।
ଯୋଗାଣ ବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ, ଦରିଦ୍ର ସୀମାରେଖା ତଳେ ବାସ କରୁଥିବା ଏନ୍ଏସିର ୪ ହଜାର ୩୭୬ କାର୍ଡଧାରୀ ପରିବାରର ୧୪ ହଜାର ୫୫୭ ଏବଂ ଅନ୍ତ୍ୟୋଦୟ ଯୋଜନାରେ ୪୪୩ କାର୍ଡଧାରୀ ପରିବାରର ୧ ହଜାର ୪୭୫ ଜଣଙ୍କୁ ପିଡିଏସ୍ ସାମଗ୍ରୀ ଦିଆଯାଉଛି। ନିଜର ଆବଶ୍ୟକତା ଅନୁଯାୟୀ ସେମାନେ ଚାଉଳ କିମ୍ବା ଗହମ ନେଇଥାଆନ୍ତି। ଜୁଲାଇରେ ଏନ୍ଏସି ପାଇଁ ୪୮୬. ୯ କୁଇଣ୍ଟାଲ ଚାଉଳ ଏବଂ ୨୪୧.୭୬ କୁଇଣ୍ଟାଲ ଗହମ ଆଲର୍ଟ କରାଯାଇଥିଲା। ତନ୍ମଧ୍ୟରୁ ହିତାଧିକାରୀଙ୍କୁ ୪୮୪ କୁଇଣ୍ଟାଲ ୪୧ କେ.ଜି. ଚାଉଳ ଏବଂ ୨୪୦ କୁଇଣ୍ଟାଲ ୮୫ କେ.ଜି. ଗହମ ବଣ୍ଟନ କରାଯାଇଛି। ତେବେ ଚାଉଳ ନିର୍ଦ୍ଧାରିତ ପରିମାଣର ଦିଆଯାଇଥିବାବେଳେ ଗହମ ବାବଦକୁ ୨୦% ଅର୍ଥାତ୍ କେଜି ପିଛା ୨୦୦ ଗ୍ରାମ କମ୍ ଦିଆଯାଇଛି। ତଦନୁଯାୟୀ କମ୍ ଟଙ୍କା ମଧ୍ୟ ନିଆଯାଇଛି। ହେଲେ ପରିମାଣ କମାଇ ଦିଆଯାଇଥିବାରୁ ମାସକର ଆବଶ୍ୟକତା ପୂରଣ ହେବାରେ ସମସ୍ୟା ଉପୁଜିବ ବୋଲି ହିତାଧିକାରୀମାନେ କହିଛନ୍ତି।
ଅନ୍ୟପଟେ ଏଭଳି ଗହମ କମାଇଦିଆଯିବା ପରେ ଯୋଗାଣ ସାମଗ୍ରୀ ଦାୟିତ୍ୱରେ ଥିବା ଡିଲରଙ୍କୁ ହିତାଧିକାରୀମାନେ ସନ୍ଦେହ ଚକ୍ଷୁରେ ଦେଖୁଛନ୍ତି। ପ୍ରକୃତରେ ଯୋଗାଣ ପରିମାଣ ହ୍ରାସ ପାଇଥିବାରୁ ଏଭଳି ସମସ୍ୟା ସୃଷ୍ଟି ହୋଇଛି ନା ଗହମ ବାଟମାରଣା ହୋଇଛି, ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଅନ୍ୟପଟେ ଏଥିଲାଗି ଡିଲର ଏବଂ ହିତାଧିକାରୀଙ୍କ ମଧ୍ୟରେ ଅନେକ ସ୍ଥାନରେ ମୁହାଁମୁହିଁ ପରିସ୍ଥିତି ମଧ୍ୟ ସୃଷ୍ଟି ହେଉଛି। ଯୋଗାଣ ବିଭାଗ ଅଧିକାରୀ ଏହାର ସ୍ପଷ୍ଟୀକରଣ ଦେବାକୁ ହିତାଧିକାରୀମାନେ ଦାବି କରିଛନ୍ତି।
ସରକାରଙ୍କ ବିଚିତ୍ର ନିୟମ
ସରକାରଙ୍କ ବିଚିତ୍ର ନିୟମ। ପୂର୍ବରୁ ଯେତିକି ଗହମ ମିଳୁଥିଲା ସେତିକିରେ
ଆବଶ୍ୟକତା ମେଣ୍ଟି ଯାଉଥିଲା। ଜୁଲାଇରେ ଗହମ କମାଇ ଦିଆଯାଇଥିବାରୁ ଏହାକୁ ନେଇ ଡିଲରଙ୍କ ସହ ଅଯଥାରେ ବିବାଦ ହୋଇଛି।
-ପ୍ରମିଳା ବେହେରା, ହିତାଧିକାରୀ
ଯୋଗାଣ କମିଥିବାରୁ ସମସ୍ୟା
ଉତ୍ପାଦନ କମିଥିବାରୁ ଜୁଲାଇ ମାସରେ ଆବଶ୍ୟକତାଠାରୁ କମ୍ ଗହମ ଆସିଥିଲା। ତେଣୁ ହିତାଧିକାରୀଙ୍କ ୨୦ ପ୍ରତିଶତ କମ୍ ପ୍ରଦାନ କରାଯାଇଛି। ସେହି ହାରରେ ଟଙ୍କା ମଧ୍ୟ ନିଆଯାଇଛି।
-ବେଡା ବେସ୍ରା, ବ୍ଲକ ଯୋଗାଣ ଅଧିକାରୀ
ଆବଶ୍ୟକତାଠାରୁ ନିଅଣ୍ଟ ହେବ
ପରିବାରକୁ ପ୍ରତି ମାସରେ ୩୫ କେ.ଜି. ଗହମ ମିଳୁଥିଲା। ଜୁଲାଇରେ ନିର୍ଦ୍ଧାରିତ ପରିମାଣଠାରୁ କମ୍ ଯୋଗାଣ ହୋଇଛି। ଆବଶ୍ୟକତା ପୂରଣ ଲାଗି ଏ ମାସରେ ବାହାରୁ ଅଟା କିଣିବାକୁ ପଡ଼ିବ।
-ଅଶୋକ ସାହୁ, ହିତାଧିକାରୀ
