ଭୁବନେଶ୍ୱର,୩୦।୩: ମୁଣ୍ଡ ଉପରେ ନିର୍ବାଚନ। ରାଜ୍ୟ ରାଜନୀତିର ଭବିଷ୍ୟତକୁ ଦୃଷ୍ଟିରେ ରଖି ବିଜେଡି ଓ ଭାଜପା ମେଣ୍ଟ ନ କରି ଏକାକୀ ଲଢିବାକୁ ନିଷ୍ପତ୍ତି ନେଇଛନ୍ତି। ଚଳିତ ନିର୍ବାଚନରେ ଲୋକ ସଭା ଓ ବିଧାନସଭାରେ ସଂଖ୍ୟା ଗରିଷ୍ଠତା ହାସଲ କରିବା ପାଇଁ ବିଜେଡି ଫୁଲ ଦମରେ ଲାଗି ପଡିଛି। ନିର୍ବାଚନ ଯେତେ ପାଖେଇ ଆସୁଛି ନବୀନ ନିବାସରେ ଭିଡ ସେତିକି ଜମୁଥିବାର ଦେଖିବାକୁ ମିଳୁଛି। କିନ୍ତୁ ଏହାରି ଭିତରେ ଦଳର ଅନ୍ତ କନ୍ଦଳ ପଦାରେ ପଡିଛି।
ତେବେ ଆସନ୍ତା ବିଧାନସଭା ନିର୍ବାଚନ ପାଇଁ ବିଜେଡି ୭୨ ପ୍ରାର୍ଥୀଙ୍କୁ ଟିକେଟ୍ ଭେଟି ଦେଇଛି। କିନ୍ତୁ ଆହୁରି ୭୫ ବିଧାନସଭା ଓ ୬ ଲୋକ ସଭା ଆସନ ପାଇଁ ଅଙ୍କକଷା ଚାଲିଛି। ଟିକେଟ୍ ଲବିରେ ନବୀନ ନିବାସରେ ଭିଡ଼ ଲଗାଉଛନ୍ତି ଆଶାୟୀ । ଯେଉଁମାନେ ଟିକେଟ ପାଇଛନ୍ତି ସେମାନେ ନବୀନଙ୍କୁ ଭେଟି ଆଶୀର୍ବାଦ ନେଇ ନିର୍ବାଚନମଣ୍ଡଳୀ ମୁହାଁ ହେଉଛନ୍ତି ।
ତେବେ ଟିକେଟ୍ କଟିବା ଯୋଗୁ ବିଜେଡି ଅନ୍ତ କନ୍ଦଳ ବଢୁଥିବାର ଦେଖାଯାଇଛି। ଉଦାହରଣ ସ୍ବରପ, ଭୁବନେଶ୍ୱର ସଂସଦୀୟ କ୍ଷେତ୍ରରେ ଶ୍ରୀମୟୀ ମିଶ୍ରଙ୍କୁ ଏମପି ଭାବରେ ଲୋକଲୋଚନକୁ ଆଣିବା ଏବଂ ପରେ ତାଙ୍କୁ ହଟାଇ ସୁର ରାଉତରାୟଙ୍କ ପୁଅ ମନ୍ମଥ ରାଉତରାୟଙ୍କୁ ଟିକେଟ୍ ଦେବା ସମସ୍ତଙ୍କୁ ତାଜୁବ କରିଛି। ଏଥିପାଇଁ କେବଳ ଶ୍ରୀମୟୀ ନୁହନ୍ତି ଅନ୍ୟ ନେତାଙ୍କୁ ମଧ୍ୟ ଶକ୍ତ ଧକ୍କା ଲାଗିଛି। ସେହିପରି ଢେଙ୍କାନାଳରେ ମହେଶ ସାହୁଙ୍କ ଟିକେଟ୍ କାଟିଛି ଦଳ। ଏବେ ଏହି ଦଳ କନ୍ଦଳ ଭାଜପାକୁ ସୁହାଉଛି। ଯାହାଦ୍ୱାରା ଦଳର ଅସନ୍ତୋଷ ନେତା ବିଜେଡି ଛାଡି ଭାଜପାରେ ଯୋଗ ଦେଉଛନ୍ତି।
କାହାକୁ ଟିକେଟ୍ ଦିଆଯିବ ଆଉ କାହାର କଟିବ ଏନେଇ ଖୋଦ୍ ମୁଖ୍ୟମନ୍ତ୍ରୀ ନବୀନ ତର୍ଜମା କରୁଛନ୍ତ। ନିର୍ବାଚନମଣ୍ଡଳୀ ଆସିଥିବା ଫାଇଲ ଖେଳାଇ ଟିକିନିଖି ତଥ୍ୟର ଅନୁଶୀଳନ କରୁଛନ୍ତି । ସୋସିଆଲ ମିଡ଼ିଆ ଭାଇରାଲ ହେଉଥିବା ଏକ ଫଟୋକୁ ନେଇ ରାଜନୈତିକ ମହଲରେ ରୋଚକ ମୋଡ ନେଇଛି । ଗୋଟିଏ ଚେୟାରରେ ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକ ବସିଥିବା ବେଳେ ଅନ୍ୟ ଏକ ଚେୟାରରେ ବସିଛନ୍ତି 5T ଅଧ୍ୟକ୍ଷ ଭି.କେ ପାଣ୍ଡିଆନ। ଟେବୁଲ ଉପରେ ରହିଛି ବିଭିନ୍ନ ନିର୍ବାଚନ ମଣ୍ଡଳୀର ଫାଇଲ। କୁହାଯାଉଛି ପ୍ରାର୍ଥୀ ଘୋଷଣା ହୋଇ ନ ଥିବା ଆସନକୁ ନେଇ ଚାଲିଛି ଅଙ୍କକଷା ।
ନିର୍ବାଚନ ମଣ୍ଡଳୀରେ କେତେ ଆଶାୟୀ ଅଛନ୍ତି, କାହାର ବିଜୟ ସମ୍ଭାବନା ଅଧିକ ଏଭଳି ବିଭିନ୍ନ ଦିଗକୁ ନେଇ ଆଲୋଚନା ଚାଲିଛି । ସୁପ୍ରିମୋଙ୍କ ହଁ ଆଉ ନା ଭିତରେ ଅଟକି ରହିଛି ଆଶାୟୀଙ୍କ ଭାଗ୍ୟ । ଏସବୁ ଭିତରେ ନବୀନ ନିବାସକୁ ଛୁଟୁଛି ଆଶାୟୀଙ୍କ ଲମ୍ବା ଲାଇନ। ଦିତୀୟ ପର୍ଯ୍ୟାୟ ତାଲିକା ଘୋଷଣା ପୂର୍ବରୁ ଦୁଇ ଦିନ ହେବ କିଛି ବିଧାୟକ ଓ କିଛି ପୂର୍ବତନ ବିଧାୟକ ଓ ନୂଆ ଆଶାୟୀଙ୍କୁ ଦେଖିବାକୁ ମିଳିଛି ନବୀନ ନିବାସରେ।
ତେବେ ଟିକଟେ୍ କଟିବା ଓ ମିଳିବା ନେଇ ଭିକେ ପାଣ୍ଡିଆନଙ୍କ ଦଳୀୟ ହସ୍ତକ୍ଷେପ ଏବେ ଅସନ୍ତୋଷ ବଢାଇଛି। ରାଜ୍ୟର ରାଜଧାନୀ ଭୁବନେଶ୍ୱର କେତେକ ଅଞ୍ଚଳରେ ଏବେ ବିଦ୍ରୋହୀ ମୁଣ୍ଡ ଟେକିଛନ୍ତି। ଭର୍ତ୍ତୃହରି ମହତାବ ଓ ସିଦ୍ଧାନ୍ତ ମହାପାତ୍ରଙ୍କ ପରି ବହୁ ହେଭିଓ୍ବେଟ ନେତା ଏବେ ଦଳ ଛାଡି ଭାଜପା ମୁହାଁ ହେଉଛନ୍ତି। ରାଜନୈତିକ ବିଶେଷଜ୍ଞନୁସାରେ ଦଳୀୟ କନ୍ଦଳ ଯୋଗୁଁ ଏବେ ଭାଜପା ଲାଭାନ୍ବିତ ହେବାକୁ ଯାଉଛି। କାରଣ ରାଜ୍ୟରେ କଂଗ୍ରେସ ନିଜର ଅସ୍ତିତ୍ୱକୁ ନେଇ ସଂଘର୍ଷ କରୁଥିବାବେଳେ ବିଜେଡି ପରେ ଲୋକଙ୍କ ଦ୍ୱିତୀୟ ପସନ୍ଦ ଭାଜପା ହେବାକୁ ଯାଉଛି।
