ଧାମନଗର,୧୮ା୮(ଡି.ଏନ.ଏ.)- ଭଦ୍ରକ ଜିଲା ଧାମନଗର ବ୍ଲକ ଦେଇ ପ୍ରବାହିତ ରେବ ଓ କପାଳି ନଦୀରେ ପ୍ରଥମ ବନ୍ୟା ଜଳ ପ୍ରବେଶ କରିଛି। ଫଳରେ ଏହି ବ୍ଲକର ତଳିଆ ଅଞ୍ଚଳର ବ୍ୟାପକ ଚାଷଜମି ଜଳମଗ୍ନ ହୋଇଛି। ଚାଷୀମାନେ ଧାନ ରୁଆ ପୋତା କାମ ସାରିଥିବାବେଳେ ତାହା ନଷ୍ଟ ହେବାର ଆଶଙ୍କା ପ୍ରକାଶ ପାଇଛି।
ପ୍ରବଳ ବର୍ଷା ଯୋଗୁ ନଦୀ ଜଳ ବୃଦ୍ଧି ପାଇ ଅସୁରାଳୀ, ଗଢିଆଳି, ଫତେପୁର,କୋଠାର,ଧୂଷୁରୀ,ଖପରପଦା,ବମକୁରା, କାଶିମପୁର ପଞ୍ଚାୟତରେ ଶତାଧିକ ଏକର ଚାଷଜମି ଜଳପ୍ଲାବିତ ହୋଇଛି। ସେହିପରି ପତ୍ରୀସାହି ଓ ଖୋପସାହି ମଧ୍ୟରେ ଥିବା ଘୋଷରା ଉପରେ ରେବ ଏବଂ ବାଲିଚତିରି ନଦୀର ବନ୍ୟାଜଳ ୪ ଫୁଟର ଉଚ୍ଚରେ ପ୍ରବାହିତ ହେଉଛି। ଏଥିଯୋଗୁ ଧୂଷୁରୀ ଏବଂ ତିହିଡ଼ି ବ୍ଲକକୁ ସଂଯୋଗ କରୁଥିବା ମୁଖ୍ୟ ରାସ୍ତା ବିଚ୍ଛିନ୍ନ ହୋଇପଡ଼ିଛି। ଫତେପୁର, କାଶିମପୁର, ବାଙ୍କସାହି, ଖୋପସାହି, ନାଉଗଡ଼ିଆ ପ୍ରଭୃତି ଗ୍ରାମବାସୀମାନେ ଧୂଷୁରୀକୁ ଯିବାଆସିବା କରିବା କ୍ଷେତ୍ରରେ ବାଧା ସୃଷ୍ଟି ହୋଇଛି। କୋଠାର ସରପଞ୍ଚ ଡା. ନିମାଇଁ ନାୟକଙ୍କ ସହ ସ୍ଥାନୀୟ ଅଞ୍ଚଳବାସୀ ଉକ୍ତ ଘୋଷରା ଉପରେ ଏକ ପୋଲ ନିର୍ମାଣ ପାଇଁ ଦୀର୍ଘ ଦିନ ହେବ ଦାବି କରି ଆସୁଥିବା ବେଳେ ପ୍ରଶାସନ ଏଥିପ୍ରତି ଦୃଷ୍ଟି ଦେଉନାହିଁ।
ରେବ ଏବଂ କପାଳୀ ନଦୀ ମଧ୍ୟରେ ଅସୁରାଳୀ ପଞ୍ଚାୟତର ଚାଷ ଜମି ସମ୍ପୂର୍ଣ୍ଣ ଭାବେ ଜଳମଗ୍ନ ହୋଇଯାଇଛି । ଯାହାଦ୍ୱାରା ଅସୁରାଳୀର ଗାନ୍ଧୀନଗର, ଶ୍ରୀନାଥ ନଗର, କଲ୍ୟାଣୀ ନଗର, ସାହୁସାହି,ଲେଞ୍ଜରା, ମଲ୍ଲିକ ପାଟଣା, ଦିନାଜପୁର, ଡିଲୋ, ତୋରବନ୍ତିଆ, ହାତିଆପଡ଼ା ଆଦି ଗ୍ରାମର ଚାଷଜମି ଜଳମଗ୍ନ ହେବା ସହିତ ଗଁାଗୁଡିକ ଜଳବନ୍ଦୀ ହୋଇ ରହିଛି। ଦୀର୍ଘ ଦିନ ଧରି ଅନିୟମିତ ବର୍ଷା ପାଇଁ ଚାଷୀମାନେ ବିଳମ୍ବରେ ଚାଷ କାର୍ଯ୍ୟ ଆରମ୍ଭ କରିବା ଥିବା ବେଳେ ଫସଲ ନଷ୍ଟ ଆଶଙ୍କାରେ ସେମାନେ ହତାଶ ହୋଇପଡ଼ିଛନ୍ତି।
