ଅତାବିରା,୧୫।୩(ଯୁଧିଷ୍ଠିର ମହାପାତ୍ର ): ବରଗଡ଼ ଜିଲା ଅତାବିରା ଥାନା ଅନ୍ତର୍ଗତ ହୀରାକୁଦ ଜଳଭଣ୍ଡାର ଅଞ୍ଚଳରେ ରବିବାର ନକଲି ପୋଲିସ ଭାବରେ ବୁଲୁ ଥିବା ଜଣେ ବ୍ୟକ୍ତିଙ୍କୁ ଗିରଫ କରିଛି ଅତାବିରା ଥାନା ଅସଲି ପୋଲିସ । ଗିରଫ ନକଲି ପୋଲିସଙ୍କ ନାମ ବରଗଡ ଟାଉନ ଥାନା ଘୁଲିପାଲିର ବିକ୍ରମ ବେହେରା (33)। ତାଙ୍କ ବିରୋଧରେ ଅତାବିରା ଥାନା କେଶ ନମ୍ବର ୧୦୬/୨୦୨୬ ରେ ଏକ ମାମଲା ରୁଜୁ କରାଯାଇ ତାଙ୍କୁ ଥାନା ହାଜତରେ ରଖାଯାଇଛି । ଏହି ଘଟଣା ସମ୍ବେଦନଶୀଳ ଭାବେ ନେଇ ଏହାର ଅଧିକ ତଦନ୍ତ କରାଯାଉଛି ବୋଲି ଆଇଆଇସି ପ୍ରକାଶ କର୍ଣ୍ଣ କହିଛନ୍ତି ।
ହୀରାକୁଦ ଜଳଭଣ୍ଡାର ସଂଲଗ୍ନ ଢୁରୁକୁଶୁମ୍ ଠାରେ ନକଲି ପୋଲିସ ଓଡ଼ିଶା ପୋଲିସ ଲେଖାଥିବା ଡ୍ରେସ୍ ପିନ୍ଧି ଲୋକଙ୍କୁ ଆତଙ୍କିତ କରୁଥିବା ଗ୍ରାମବାସୀ ଅତାବିରା ପୋଲିସକୁ ଖବର ଦେଇଥିଲେ । ପ୍ରାଥମିକ ସୂଚନା ଅନୁଯାୟୀ ବ୍ୟକ୍ତି ଜଣକ ହେଲେ ବିକ୍ରମ ବେହେରା ତାଙ୍କ ଘର ବରଗଡ ଟାଉନ ଥାନା ଅଂଚଳର ବୋଲି ଜଣା ପଡ଼ିଛି। ୨୦୨୧ ମସିହାରେ ମଧ୍ୟ ବିକ୍ରମ ନକଲି ଆରଟିଓ ସାଜି ବରଗଡ଼ ପୋଲିସ ହାତରେ ଗିରଫ ହୋଇଥିଲେ ।
ରବିବାର ଘଟଣାସ୍ଥଳରେ ଲୋକଙ୍କୁ ଡରାଉ ଥିବା ସହ ପୋଲିସ ନାଁରେ ଆତଙ୍କିତ କରୁଥିବା ସମୟରେ ଭିଡିଓ ଉତ୍ତୋଳନ କରିଥିଲେ । ଏହାପରେ ନକଲି ପୋଲିସ ବୋଲି ଜାଣି ଗ୍ରାମବାସୀ ଅତାବିରା ଥାନାକୁ ସୂଚନା ଦେଇଥିଲେ। ଏହା ପରେ ଘଟଣାସ୍ଥଳକୁ ଅତାବିରା ପୋଲିସ ପହଞ୍ଚି ଉକ୍ତ ବ୍ୟକ୍ତିଙ୍କୁ ଗିରଫ କରି ଅତାବିରା ଥାନାକୁ ଆଣି ଅଧିକ ପଚରା ଉଚରା ଜାରି ରଖିଛନ୍ତି । ତେବେ ବିକ୍ରମ ସହ ଏକ ମୋଟରସାଇକେଲରେ ଥିବା ତାଙ୍କ ଜନୈକ ସହଯୋଗୀ ଘଟଣାସ୍ଥଳରୁ ଫେରାର ରହିଛନ୍ତି ।
