କେସିଙ୍ଗା,୧ା୨(ତୁମେଶ୍ୱର ସାହୁ): କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ରବିବାର ନବମ ଥର ପାଇଁ ପୂର୍ଣ୍ଣାଙ୍ଗ ବଜେଟ୍ (୨୦୨୬-୨୭) ଉପସ୍ଥାପନ କରିଛନ୍ତି। ଏହି ବଜେଟ୍ ଘୋଷଣା ପରେ କଳାହାଣ୍ଡି ଜିଲା କେସିଙ୍ଗା ଅଞ୍ଚଳର ସାଧାରଣ ଲୋକଙ୍କ ପ୍ରତିକ୍ରିୟା ପ୍ରକାଶ ପାଇଛି।
ଯୁବ ସାହିତି୍ୟକ ଜ୍ଞାନେନ୍ଦ୍ର ଭୋଇ କହିଛନ୍ତି, ବର୍ଷ ୨୦୨୬ ବଜେଟ୍ ଏକ ବିକଶିତ ଅର୍ଥନୀତିର ପରିପ୍ରକାଶ କିନ୍ତୁ ସାଧାରଣବର୍ଗଙ୍କ ପାଇଁ ବିଶେଷ ପ୍ରାବଧାନ କୁ ଆହୁରି ଧ୍ୟାନ ଦେଇ ଥିଲେ ଏହାର ସନ୍ତୁଳନ ଉଚିତ୍ ଦିଗରେ ଦର୍ଶିତ ହୋଇଥାଆନ୍ତା l ତଥାପି ରେଳ, ଗଠନ ମୂଳକ କାର୍ଯ୍ୟ, ସ୍ବାସ୍ଥ୍ୟ ଶିକ୍ଷା,ଜଳ ସଂରକ୍ଷଣ ଓ ଆୟକର ଦିଗକୁ ସ୍ବତନ୍ତ୍ର ଭାବେ ଉପସ୍ଥାପିତ କରି ଦୀର୍ଘସ୍ଥାୟୀ ବିକାଶର ପରିକଳ୍ପନା ପ୍ରଶଂସନୀୟ ଅଟେ।
ସେହିପରି ଚଳିତ ବର୍ଷର ବଜେଟ୍ରେ ଦେଶରୁ ୮୦ ପ୍ରତିଶତରୁ ଊର୍ଦ୍ଧ୍ୱ ଜନ ସମୂହ ଗରିବ ଓ ମଧ୍ୟମ ବର୍ଗର ଲୋକଙ୍କୁ ସମ୍ପୂର୍ଣ ଅଣଦେଖା କରାଯାଇଛି ଓ ତାଙ୍କ ଦୈନିନ୍ଦନ ଆବଶ୍ୟକତାରେ ଲାଗୁଥିବା ଜରୁରୀ ଜିନିଷଗୁଡ଼ିକ ଉପରେ ସହାୟକ ହେଲା ଭଳି କୌଣସି ବ୍ୟବସ୍ଥା ରଖାଯାଇନାହିଁ। ବେକାରୀ ଯୁବକମାନଙ୍କ ଭବିଷ୍ୟତ ନିର୍ମାଣ ଦିଗରେ କିଛି ସ୍ବତନ୍ତ୍ର ବ୍ୟବସ୍ଥା ମଧ୍ୟ ନାହିଁ। ଖାସ୍ କରି କୃଷି ପ୍ରୋତ୍ସାହନ ଓ କୃଷକ ବର୍ଗଙ୍କ ପାଇଁ ହତାଶ କଲାଭଳି ବଜେଟ୍କୁ ଉପସ୍ଥାପନ କରାଯାଇଛି। ଏହା ଆଗାମୀ ଦିନରେ ଦେଶକୁ ସମୃଦ୍ଧି ପ୍ରଦାନ କରିବାରେ ସହାୟକ ହେଲା ଭଳି ଲାଗୁ ନାହିଁ ବୋଲି ଯୁବ କଂଗ୍ରେସ ସଂଗଠନ ଏ.ସୁରେଶ ରାଓ କହିଛନ୍ତି।
ସେହିପରି ଯୁବ କୃଷକଭବାନୀ ସାହୁ କହିଛନ୍ତି, ବର୍ଷ -୨୦୨୬ର ବଜେଟ୍ ଦେଶର ସମସ୍ତ ବର୍ଗଙ୍କ ପାଇଁ ଏକ ଉତ୍ସାହ ସୃଷ୍ଟି କରୁଛି। କୃଷି, ଭିତ୍ତିଭୂମି ଏବଂ ନିଯୁକ୍ତି ଉପରେ ଗରୁତ୍ବ ଦିଆଯାଇଥିବାରୁ ଦେଶର ବିକାଶରେ ଏହା ଅନେକାଂଶରେ ସହାୟକ ହେବ। ଡିଜିଟାଲ କୃଷି ଉପରେ ଗୁରୁତ୍ୱ ଦିଆଯାଇଥିବାରୁ ଯୁବକମାନଙ୍କ ମଧ୍ୟରେ ଏକ ସମ୍ଭାବନା ସୃଷ୍ଟି ହେଉଛି। ମୋଟା ମୋଟି ଭାବରେ କେନ୍ଦ୍ର ସରକାରଙ୍କୁ ଧନ୍ୟବାଦ।
