ଚେନ୍ନାଇ, ୧୪।୨ : ଭାରତୀୟ ଦଳର ବରିଷ୍ଠ ସ୍ପନିର ରବିଚନ୍ଦ୍ରନ ଅଶ୍ୱିନ ରବିବାର ଏକ ବିଶ୍ୱ ରେକର୍ଡର ଅଧିକାରୀ ହୋଇଛନ୍ତି। କ୍ରିକେଟ ଇତିହାସର ପ୍ରଥମ ବୋଲର ଭାବେ ଟେଷ୍ଟ ଫର୍ମାଟରେ ୨୦୦ ବାମହାତୀ ବ୍ୟାଟ୍ସମ୍ୟାନଙ୍କ ଉଇକେଟ ହାତେଇଛନ୍ତି ଅଶ୍ୱିନ। ଇଂଲଣ୍ଡ ବିପକ୍ଷରେ ଏଠାରେ ଚାଲିଥିବା ଦ୍ୱିତୀୟ ଟେଷ୍ଟରେ ୫ ଉଇକେଟ ସଫଳତା ଅର୍ଜନ କରିବା ଅବସରରେ ୩୪ ବର୍ଷୀୟ ଅଶ୍ୱିନ ଏହି ରେକର୍ଡ ନିଜ ନାମରେ କରିଛନ୍ତି। ଏହି ତାଲିକାର ଦ୍ୱିତୀୟ ସ୍ଥାନରେ ଅଛନ୍ତି ଟେଷ୍ଟ କ୍ରିକେଟର ସର୍ବାଧିକ ଉଇକେଟ ନେଇଥିବା କିମ୍ବଦନ୍ତୀ ଅଫ୍ ସ୍ପିନର ମୁଥୟା ମୁରଲୀଧରନ(ଶ୍ରୀଲଙ୍କା)। ସେ ୧୯୧ ବାମହାତୀ ବ୍ୟାଟ୍ସମ୍ୟାନଙ୍କୁ ଆଉଟ୍ କରିଥିଲେ। ତାଙ୍କ ପଛକୁ ଜେମ୍ସ ଆଣ୍ଡରସନ (୧୯୦ ଉଇକେଟ୍) ରହିଥିବାବେଳେ ତାଲିକାର ୪ର୍ଥ ଓ ୫ମ ସ୍ଥାନରେ ରହିଛନ୍ତି ଅଷ୍ଟ୍ରେଲିଆର ଦୁଇ କିମ୍ବଦନ୍ତୀ ବୋଲର। ସେମାନେ ହେଲେ ଶେନ ଓ୍ବର୍ନ ଓ ଗ୍ଲେନ ମ୍ୟାକ୍ଗ୍ରାଥ। ଦୁହିଁଙ୍କ ନାମରେ ୧୭୨ ବାମହାତୀ ବ୍ୟାଟ୍ସମ୍ୟାନଙ୍କ ରହିଛି।
