ମୁମ୍ବାଇ,୯।୪: ନିକଟରେ ଭାରତୀୟ ସ୍ପିନର ୟୁଜବେନ୍ଦ୍ର ଚହଲ ଜୀବନରେ ଅଙ୍ଗେ ନିଭାଇଥିବା ଏକ ଛାତି ଥରା ଘଟଣା ଉପରୁ ପରଦା ଉଠାଇଥିଲେ। ଜଣେ ଖେଳାଳି ତାଙ୍କୁ ନିଶାରେ ୧୫ ମହଲା ବାଲକୋନୀର ତଳକୁ ଝୁଲାଇ ରଖିଥିଲେ। ଏପରିକି ତାଙ୍କର ଟିକିଏ ଅସାବଧାନତାରେ ଜୀବନ ଚାଲିଯାଇଥାନ୍ତା ବୋଲି ସେ କହିଥିଲେ। ଏହି ବୟାନକୁ ନେଇ ପ୍ରଥମେ ବିରେନ୍ଦ୍ର ସେହ୍ବାଗଙ୍କ ପରେ ପୂର୍ବତନ ଭାରତୀୟ କୋଚ୍ ରବି ଶାସ୍ତ୍ରୀ ମଧ୍ୟ ତାଙ୍କ ସମର୍ଥନରେ ବାହାରିଛନ୍ତି।
ଶାସ୍ତ୍ରୀ କହିଛନ୍ତି, ଏହା ମଜା ତ ବିଲ୍କୁଲ ନୁହେଁ। ଜାଣେନା ଚହଲଙ୍କ ସହ ଏପରି କିଏ କରିଛନ୍ତି। ହେଲେ ତାଙ୍କର ମାନସିକ ସ୍ଥିତି ଠିକ୍ ନାହିଁ। ଯଦି ଏପରି ହୋଇଥାଏ ତେବେ ଏହା ଚିନ୍ତାର ବିଷୟ। କାହାର ନା କାହାର ଜୀବନ ବିପଦରେ, କିଛି ଲୋକ ଭାବୁଛନ୍ତି ଏହା ମଜାଦାର କଥା, ହେଲେ ମୋ’ ପାଇଁ ଏହା ହସିବାର କଥା ନୁହେଁ। ଯେଉଁ ବ୍ୟକ୍ତି ଏପରି କରିଛନ୍ତି ତାଙ୍କର ମାନସିକ ସ୍ଥିତି ଠିକ୍ ନାହିଁ। ଏଭଳି କଥା ଜୀବନରେ ପ୍ରଥମ ଥର ପାଇଁ ଶୁଣୁଛି। ସେହି ବ୍ୟକ୍ତିଙ୍କ ଉପରେ ସାରା ଜୀବନ ପାଇଁ ପ୍ରତିବନ୍ଧକ ଲଗାଇଦେବା ଉଚିତ। ଏଥିସହ ତାଙ୍କୁ ଚିକିତ୍ସା ଲାଗି ରିହାବ ସେଣ୍ଟରକୁ ପଠାଇବା ଉଚିତ ବୋଲି ସେ କହିଛନ୍ତି।
ପ୍ରକାଶ ଯେ, ୩୧ ବର୍ଷୀୟ ଚହଲ ଅଫ୍ ସ୍ପିନର ରବିଚନ୍ଦ୍ରନ ଅଶ୍ୱିନଙ୍କ ସହ କଥାବାର୍ତ୍ତା ବେଳର ଏକ ଭିଡିଓ ରାଜସ୍ଥାନ ରୟାଲ୍ସ ପକ୍ଷରୁ ଶେୟାର କରାଯାଇଥିଲା। ଏଥିରେ ଚହଲ କହିଥିଲେ ମୋର ଯେଉଁ କାହାଣୀ, ସେ ବିଷୟରେ ଖୁବ୍ କମ୍ ଲୋକ ଜାଣିଛନ୍ତି। ମୁଁ ଆଜିଯାଏ କାହାକୁ କହିନାହିଁ। ୨୦୧୩ରେ ମୁମ୍ବାଇ ଇଣ୍ଡିଆନ୍ସ ପକ୍ଷରୁ ଖେଳିବା ସମୟରେ ନିଶାରେ ଥାଇ ଜଣେ ଖେଳାଳି ମୋତେ ଡାକିନେଇ ୧୫ ମହଲା ବାଲକୋନୀରୁ ଝୁଲାଇ ରଖିଥିଲେ। ମୁଁ ନିଜ ହାତରେ ତାଙ୍କ ମୁଣ୍ଡ ଧରିନେଇଥିଲି। ଯଦି ମୁଁ ହାତ ଛାଡ଼ି ଦେଇଥାନ୍ତି ତେବେ ୧୫ ମହଲାରୁ ତଳକୁ ପଡ଼ିଯାଇଥାନ୍ତି।
