ସୋନପୁର,୨୯।୧୨(ନି.ପ୍ର.): ସୋନପୁର ସହର ପାର୍ଶ୍ୱ ଦେଇ ପ୍ରବାହିତ ତେଲ ନଦୀରୁ ମଙ୍ଗଳବାର ଏକ ବିରଳ ମାଛ ଉଦ୍ଧାର ହୋଇଛି । ଏହାର ଓଜନ ପ୍ରାୟ ୩୦୦ ଗ୍ରାମ ହେବ । ଥନାପତିପଡ଼ାର ପ୍ରମୋଦ ନାଏକ ଓ ଧୀବର ପଡାର ସଞ୍ଜୟ ଅଧିକାରୀ ନଦୀକୁ ଗାଧୋଇବାକୁ ଯାଇଥିବା ବେଳେ ଏହି ବିରଳ ମାଛକୁ ଦେଖିଥିଲେ । ଦୁହେଁ ମାଛକୁ ଧରି ପଡାକୁ ଆଣିଥିଲେ। ହେଲେ ମତ୍ସ୍ୟଜୀବୀ ଏବଂ ସହରବାସୀ ପୂର୍ବରୁ ଏଭଳି ମାଛ ଦେଖି ନ ଥିବା କହିଛନ୍ତି। ଅନ୍ୟପକ୍ଷେ ମାଛକୁ ଦେଖିବା ପାଇଁ ପଡାରେ ଭିଡ ଜମିଥିଲା। ଜନସାଧାରଣଙ୍କ ନିଷ୍ପତ୍ତି କ୍ରମେ ମାଛକୁ ଜୀବନ୍ତ ଅବସ୍ଥାରେ ତେଲନଦୀରେ ଛାଡି ଦିଆଯାଇଛି। କଳା ରଙ୍ଗର ମାଛ ଦେହରେ ଚିତା ପରି ଚିହ୍ନ ରହିଛି। ତଳ ପଟେ ମୁହଁ ରହିଛି। ସେହିପରି ପିଠି ଓ ପେଟରେ ଦନ୍ତୁରିତ କଣ୍ଟା ଅଛି। ପ୍ରକାଶ ଯେ, ସୋନପୁର ସହର ପାର୍ଶ୍ୱ ଦେଇ ପ୍ରବାହିତ ମହାନଦୀର ତେନ୍ତୁଳିଘାଟରୁ ଗତ ଅକ୍ଟୋବର ୩୧ ତାରିଖରେ ଏଭଳି ଏକ ବିରଳ ମାଛକୁ ମତ୍ସ୍ୟଜୀବୀମାନେ ଉଦ୍ଧାର କରିଥିଲେ।
