ସାତମାଇଲ, ୧୪।୬ ରଜ ମହୋତ୍ସବ ପାଇଁ ରାଜ୍ୟରେ ସ୍ବତନ୍ତ୍ର ସ୍ଥାନ ହାସଲ କରିଛି ଢେଙ୍କାନାଳ ଜିଲା ହିନ୍ଦୋଳ ବ୍ଲକର ରଞ୍ଜାଗୋଳ। ଦୀର୍ଘ ୨୦୦ ବର୍ଷ ହେଲା ଏଠାରେ କୃଷିଭିତ୍ତିକ ପର୍ବ ରଜ ପାଳିତ ହୋଇ ଆସୁଛି। କରୋନା କଟକଣା ପାଇଁ ଦୁଇବର୍ଷ ହେଲା ଫିକା ପଡ଼ିଥିଲା ରଜମଉଜ। ଚଳିତବର୍ଷ ଭୂତାଣୁ ସଂକ୍ରମଣ ନିୟନ୍ତ୍ରଣରେ ଥିବାରୁ ୪ଦିନ ବ୍ୟାପୀ ଏହି ମହୋତ୍ସବକୁ ମହାଆଡ଼ମ୍ବର ସହକାରେ ପାଳନ କରାଯାଉଛି। ଏଥିଲାଗି ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚତ୍ଛି।
ମଙ୍ଗଳବାର ପହିଲି ରଜ ଥିବାବେଳେ ସୋମବାର ଶେଷ ହୋଇଛି ସଜବାଜ। ଘରେ ଘରେ ଭଳିକିଭଳି କିସମର ପିଠା ପାଇଁ ଆରମ୍ଭ ହୋଇଛି ପ୍ରସ୍ତୁତି। ରଜପାନ ପାଇଁ ଆବଶ୍ୟକ ସାମଗ୍ରୀ କିଣା ସରିଲାଣି। ଯୁବତୀମାନେ ନୂଆ ପୋଷାକ, ପ୍ରସାଧନ ସାମଗ୍ରୀ କିଣି ମହୋତ୍ସବରେ ସାମିଲ ହେବାକୁ ଅପେକ୍ଷା କରିଛନ୍ତି। ଚଳିତବର୍ଷ ୧୪ରୁ ୧୭ ତାରିଖ ଯାଏ ମହୋତ୍ସବ ପାଳନ କରାଯାଉଥିବାରୁ ବାହାରେ ରହୁଥିବା ଲୋକମାନେ ଗଁାକୁ ଫେରିିଛନ୍ତି। ପାଗ ଅନୁକୂଳ ଥିବାରୁ ମେଳାରେ ଲକ୍ଷାଧିକ ଲୋକଙ୍କ ସମାଗମ ହେବାର ସମ୍ଭାବନା ରହିଛି। ଏହାକୁ ନେଇ ବ୍ୟବସାୟୀମାନେ ଉତ୍ସାହିତ ଅଛନ୍ତି। ଯାତ୍ରାରେ ସାମିଲ ହେଉଥିବା ପର୍ଯ୍ୟଟକମାନେ ବାଙ୍କଟବିହାରୀ ମଠ, ଧୁନିଘର, ଅଷ୍ଟଶମ୍ଭୁ ମନ୍ଦିର, ମାତା ବୃନ୍ଦାବତୀ ତ୍ରିନାଥ ସ୍ବାମୀ ମନ୍ଦିର ଏବଂ ବାମ୍ଫି ପରିଦର୍ଶନ କରିଥାଆନ୍ତି। ଏସବୁ ସ୍ଥାନରେ ଶାନ୍ତିଶୃଙ୍ଖଳା ରକ୍ଷା ପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଇଛି। ଯାତ୍ରା ପଡ଼ିଆରେ ଆଲୋକୀକରଣ, ଥଣ୍ତା ପାନୀୟ ଜଳ ବ୍ୟବସ୍ଥା କରାଯାଇଛି। ପରିଷ୍କାର ପରିଚ୍ଛନ୍ନତା ପ୍ରତି ସ୍ବତନ୍ତ୍ର ଦୃଷ୍ଟି ଦିଆଯାଇଛି।
ମହୋତ୍ସବ ପ୍ରସ୍ତୁତି ସମ୍ପର୍କରେ ହିନ୍ଦୋଳ ଉପଜିଲାପାଳ ଶିବାନନ୍ଦ ସ୍ବାଇଁ କୁହନ୍ତି, କାର୍ଯ୍ୟକ୍ରମକୁ ଶାନ୍ତିଶୃଙ୍ଖଳାର ସହ ସମାପନ କରିବାକୁ ପ୍ରଶାସନ ପକ୍ଷରୁ ଆବଶ୍ୟକ ପଦକ୍ଷେପ ନିଆଯାଇଛି। ବାଲିମୀ ଥାନାଧିକାରୀ ବ୍ରହ୍ମାନନ୍ଦ ପାତ୍ରଙ୍କ ତତ୍ତ୍ୱାବଧାନରେ ପୋଲିସ ଫୋର୍ସ ମୁତୟନ ହୋଇଛନ୍ତି। ସନ୍ଧ୍ୟାରେ ଅଧିକ ଭିଡ଼ ହେଉଥିବାରୁ ଟ୍ରାଫିକ୍ ନିୟନ୍ତ୍ରଣ ଲାଗି ସ୍ବତନ୍ତ୍ର ବ୍ୟବସ୍ଥା କରାଯାଇଛି।
