ମୁମ୍ବାଇ: ବାହୁବଳୀ ଫେମ୍ ପ୍ରଭାସଙ୍କ ବହୁ ପ୍ରତିକ୍ଷୀତ ଫିଲ୍ମ ‘ଆଦିପୁରୁଷ’ର ଟିଜର ସୋମବାର ରିଲିଜ ହୋଇଛି। ଟିଜର ରିଲିଜ୍ ହେବା ପରେ ଫିଲ୍ମ ଚର୍ଚ୍ଚାର ପରିସରକୁ ଆସିଛି। ପୂର୍ବରୁ ଏହାକୁ ଦେଖିବା ପାଇଁ ଦର୍ଶକଙ୍କ ମଧ୍ୟରେ ଉତ୍ସାହ ଭର୍ତ୍ତି ରହିଥିବା ବେଳେ କିନ୍ତୁ ରିଲିଜ୍ ପରେ କିଛି ବେଶ୍୍ ପ୍ରଭାବ ଦେଖିବାକୁ ମିଳି ନାହିଁ। ଏହି ଫିଲ୍ମରେ ସୈଫ ଅଲ୍ଲୀ ଖାନ ରାବଣ ଭୂମିକାରେ ନଜର ଆସିଛନ୍ତି। ଟିଜର ରିଲିଜ୍ ହେବା ପରେ ୟୁଜର୍ସ ସୈଫଙ୍କ ଲୁକ୍କୁ ରାମାନନ୍ଦ ସାଗରଙ୍କ ରାବଣର ଲୁକ୍ ସହ ତୁଳନା କରିଛନ୍ତି। ରାମାନନ୍ଦ ସାଗରଙ୍କ ରାମାୟଣରେ ରାବଣଙ୍କୁ ଶିବ ଭକ୍ତ ଭାବେ ଦେଖିବାକୁ ମିଳିଥିଲା ବେଳେ ସେ ଜଣେ ହିନ୍ଦୁ ବ୍ରାହ୍ମଣ ଥିଲେ। ହେଲେ ଏହି ଫିଲ୍ମରେ ସୈଫଙ୍କ ରାବଣଙ୍କ ଲୁକ୍ ବହୁତ ଭୟଙ୍କର ଦେଖାଯାଉଛି। ମର୍ଡନ ହେୟାର କଟ୍ ସହ ଲମ୍ବା ଦାଢ଼ିରେ ନଜର ଆସିଛନ୍ତି ସୈଫ। ଯାହାକୁ ନେଇ ଏବେ ୟୁଜର୍ସ ସୈଫ ଅଲ୍ଲୀ ଖାଁଙ୍କୁ ଟ୍ରୋଲ କରିବା ସହ ପ୍ରତିକ୍ରିୟା ରଖିଛନ୍ତି। ଓମ୍ ରାଉତଙ୍କ ନିର୍ଦ୍ଦେଶିତ ଏହି ଫିଲ୍ମରେ ରାବଣଙ୍କୁ ଭୟଙ୍କର ଏକ ବିଶାଳ ପକ୍ଷୀ ଉପରେ ଚଢ଼ି ଯାଉଥିବାର ଦର୍ଶାଯାଇଛି। କିନ୍ତୁ ରାମାନନ୍ଦଙ୍କ ରାମାୟଣରେ ରାବଣ ଏକ ପୁଷ୍ପକ ବିମାନରେ ଯାଉଥିବାର ଦର୍ଶାଯାଇଥିଲା। ଏହି ଟିଜରକୁ ଦେଖିବା ପରେ ୟୁଜର୍ସ କ୍ଷୋଭ ପ୍ରକାଶ କରିଛନ୍ତି। ୧୯୮୭ରେ ରାମାନନ୍ଦ ସାଗରଙ୍କ ରାମାୟଣ ପ୍ରସାରିତ ହୋଇଥିଲା ଏବଂ ୨୦୨୨ରେ ଆଦିପୁରୁଷର ଟିଜର ରିଲିଜ୍ ହୋଇଛି। ଦୀର୍ଘ ୩୫ ବର୍ଷ ପରେ ରାବଣଙ୍କୁ ଏକ ଭିନ୍ନ ଶୈଳୀରେ ଉପସ୍ଥାପିତ କରାଯାଇଛି। କିନ୍ତୁ ରାବଣର ଏହି ନୂଆ ଅବତାର ଦର୍ଶକଙ୍କ ମନ ଜିଣିପାରିନାହିଁ।
