ଭୋପାଳ,୫।୯ : ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନଙ୍କ ନେତୃତ୍ୱକୁ ପ୍ରଶଂସା କରିବା ସହ ତାଙ୍କୁ ମହାନ କ୍ରିକେଟର ମହେନ୍ଦ୍ର ସିଂ ଧୋନି (ଏମଏସ ଧୋନି) ଙ୍କ ସହ ତୁଳନା କରିଛନ୍ତି। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ କହିଛନ୍ତି ଶିବରାଜଙ୍କୁ ରାଜନୀତିର ଧୋନି ବୋଲି କହିବା ଅତ୍ୟୁକ୍ତି ହେବ ନାହିଁ। ଆରମ୍ଭ ଯାହା ବି ହେଉ, ସେ ଭଲ ଫିନିଶ ଦେଇ ଫିଲ୍ଡ କିପରି ଜିତିବେ ଜାଣନ୍ତି। ଶିବରାଜ ଲୋକଙ୍କ ସେବା କରିଛନ୍ତି, ସେଥିପାଇଁ ସେ ଜନସାଧାରଣଙ୍କ ବିଶ୍ୱାସକୁ ହାସଲ କରି ପାରିଛନ୍ତି । ସେ ମଧ୍ୟପ୍ରଦେଶରେ ମାମା ଭାବରେ ଜଣାଶୁଣା।
ମଧ୍ୟପ୍ରଦେଶର ନେମୁଚରେ ଭାରତୀୟ ଜନତା ପାର୍ଟିର ଜନ ଆଶୀର୍ବାଦ ଯାତ୍ରାକୁ ଆରମ୍ଭ କରିବା ପୂର୍ବରୁ ଏକ ସାଧାରଣ ସଭାକୁ ସମ୍ବୋଧିତ କରି ରାଜନାଥ ଏଭଳି ତୁଳନା କରିଛନ୍ତି। ଧୋନିଙ୍କ ପରି ଶିବରାଜ ମଧ୍ୟ ବିଜୟ ସହ ମ୍ୟାଚ ଶେଷ କରିବାର କଳାକୁ ଆୟତ୍ତ କରିଛନ୍ତି।
ମଧ୍ୟପ୍ରଦେଶର ସିଏମ ଲୋକଙ୍କ ସମସ୍ୟା ପ୍ରତି ସମ୍ବେଦନଶୀଳ ଏବଂ ଆଗାମୀ ନିର୍ବାଚନରେ ପୁଣି ଥରେ ତାଙ୍କୁ ବିଜୟୀ କରାଇବାକୁ ସେ ଲୋକଙ୍କୁ ଅନୁରୋଧ କରିଛନ୍ତି। ସେ ପୂର୍ବତନ ମୁଖ୍ୟମନ୍ତ୍ରୀ କମଲ ନାଥଙ୍କୁ ସମାଲୋଚନା କରି କହିଛନ୍ତି ଡିସେମ୍ବର ୨୦୧୮ରୁ ମାର୍ଚ୍ଚ ୨୦୨୦ ମଧ୍ୟରେ କଂଗ୍ରେସ ସରକାରଙ୍କର ନେତୃତ୍ୱ ନେବାବେଳେ କେନ୍ଦ୍ରର କଲ୍ୟାଣ ଯୋଜନା, ବିଶେଷକରି ଗରିବଙ୍କ ପାଇଁ ଗୃହ ନିର୍ମାଣ ବନ୍ଦ କରାଯାଇଥିଲା। ଏହାର ଜବାବ ରାଜ୍ୟର ଜନସାଧାରଣ ଦେବେ।
