ନୂଆଦିଲ୍ଲୀ,୧୨।୧୨: ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀଙ୍କ ଝିଅ ଶର୍ମିଷ୍ଠା ମୁଖାର୍ଜୀ ଏକ ଚାଞ୍ଚଲ୍ୟକର ଖୁଲାସା କରିଛନ୍ତି। ଭରସା ଅଭାବରୁ ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀ ତାଙ୍କ ବାପାଙ୍କୁ ତାଙ୍କ କ୍ୟାବିନେଟରୁ ହଟାଇ ଦେଇଥିବା ସେ କହିଛନ୍ତି। ଶର୍ମିଷ୍ଠା ପିତାଙ୍କ ଉପରେ ଲେଖାଯାଇଥିବା ‘ପ୍ରଣବ, ମାଇ ଫାଦର: ଏ ଡଟର୍ ରିମେମ୍ବରର୍ସ’ ପୁସ୍ତକ ଉନ୍ମୋଚନ ଅବସରରେ ଶର୍ମିଷ୍ଟା କହିଛନ୍ତି, ରାଜୀବ ଗାନ୍ଧୀ କିମ୍ବା ସୋନିଆ ଗାନ୍ଧୀ ମୋ ବାପାଙ୍କ ବିଷୟରେ କ’ଣ ଭାବୁଥିଲେ, ଏହା କେବଳ ସେମାନେ ଜାଣନ୍ତି। କିନ୍ତୁ ମୋ ବାପାଙ୍କର ନିଜସ୍ବ ବିଶ୍ଳେଷଣ ଥିଲା। ସେ ତାଙ୍କ ନୋଟରେ ଲେଖିଥିଲେ ଯେ, ରାଜୀବ ଗାନ୍ଧୀ ଭାବୁଥିଲେ ଯେ ମୁଁ ଜଣେ କଠିନ ବ୍ୟକ୍ତି, ଯିଏ ଅନ୍ଧ ଭାବରେ କାହାକୁ ମାନି ପାରିବ ନାହିଁ। ବୋଧହୁଏ ଏହି କାରଣରୁ ରାଜୀବ ଗାନ୍ଧୀ ମୋ ବାପାଙ୍କୁ କ୍ୟାବିନେଟରୁ ହଟାଇ ଦେଇଥିଲେ।
ଶର୍ମିଷ୍ଠା ମୁଖାର୍ଜୀ କହିଛନ୍ତି, ମୋ ବାପା କହୁଥିଲେ ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ସହ କାର୍ଯ୍ୟକାଳ ତାଙ୍କ ରାଜନୈତିକ କ୍ୟାରିୟରର ‘ସୁବର୍ଣ୍ଣ ସମୟ’ ଥିଲା। ଶର୍ମିଷ୍ଠା ପୂର୍ବତନ ରାଷ୍ଟ୍ରପତି ପ୍ରଣବଙ୍କ କଂଗ୍ରେସ ନେତା ରାହୁଲ ଗାନ୍ଧୀଙ୍କ ମୂଲ୍ୟାଙ୍କନ ବିଷୟରେ ମଧ୍ୟ କହିଥିଲେ, ଯେଉଁ କାରଣରୁ ତାଙ୍କ ପୁସ୍ତକର କିଛି ଅଂଶ ବିବାଦ ସୃଷ୍ଟି କରିଛି। ଶର୍ମିଷ୍ଠା କହିଛନ୍ତି, ତାଙ୍କ ପିତା ମଧ୍ୟ ପ୍ରସ୍ତାବିତ ନିୟମକୁ ବିରୋଧ କରିଥିଲେ, ଯାହାର ଏକ କପି ରାହୁଲ ଗାନ୍ଧୀ ସେପ୍ଟେମ୍ବର ୨୦୧୩ରେ ଏକ ସାମ୍ବାଦିକ ସମ୍ମିଳନୀରେ ଚିରି ଦେଇଥିଲେ, କିନ୍ତୁ ଏହାକୁ ସଂସଦରେ ଆଲୋଚନା କରାଯିବା ଉଚିତ ବୋଲି ସେ ବିଶ୍ୱାସ କରିଥିଲେ।
