ଗୁଆହାଟୀ,୨୧ା୧୨(ପି.ଟି./ଏଜେନ୍ସି): ଜଙ୍ଗଲରେ ଭିତ୍ତିଭୂମି ନିର୍ମାଣ ପାଇଁ ମାନବୀୟ ଓ ବ୍ୟବସାୟିକ କାର୍ଯ୍ୟକଳାପ ସହ ହାତୀ ଚଲାପଥ ଦେଇ ରେଳଲାଇନ ବିଛାଇବା ପ୍ରାଣୀଙ୍କ ଲାଗି ବିପଦ ସାଜୁଛି। ହାତୀପଲ ଖାଦ୍ୟ ଓ ଜଳ ଅନ୍ୱେଷଣରେ ଯାଉଥିବାବେଳେ ଦ୍ରୁତ ଧାବମାନ ଟ୍ରେନ୍ ଧକ୍କାରେ ପ୍ରାଣ ହରାଉଛନ୍ତି। ଏହାର ସଦ୍ୟ ଦୃଷ୍ଟାନ୍ତ ଦେଖିବାକୁ ମିଳିଛି ଆସାମରେ। ଏହି ଉତ୍ତର-ପୂର୍ୱାଞ୍ଚଳ ରାଜ୍ୟର ହୋଜାଇ ଜିଲାରେ ଶନିବାର ଭୋର ସମୟରେ ରେଳଲାଇନ୍ ଉପରେ ସାଇରଙ୍ଗରୁ ନୂଆଦିଲ୍ଲୀ ଅଭିମୁଖେ ଯାଉଥିବା ରାଜଧାନୀ ଏକ୍ସପ୍ରେସ୍ ଟ୍ରେନ୍ ହାତୀପଲ ଉପରେ ମାଡ଼ିଯିବାରୁ ୭ ହାତୀଙ୍କ ମୃତ୍ୟୁ ଘଟିଛି। ଏଥିରେ ଅନ୍ୟ ଏକ ହାତୀ ଆହତ ହୋଇଛି। ଉକ୍ତ ଦୁର୍ଘଟଣାରେ ଟ୍ରେନ୍ର ୫ଟି ବଗି ଲାଇନ୍ଚ୍ୟୁତ ହୋଇଛି। ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା ଜଙ୍ଗଲ ବିଭାଗକୁ ଦୁର୍ଘଟଣାର ତଦନ୍ତ ନିର୍ଦ୍ଦେଶ ଦେବା ସହ ଏହାର ପୁନରାବୃତ୍ତି ଏଡ଼ାଇବା ପାଇଁ ଉପଯୁକ୍ତ ପଦକ୍ଷେପ ନେବାକୁ କହିଛନ୍ତି। ଡିଜିଟାଲ ଯୁଗରେ ପ୍ରାଣୀଙ୍କ ଉପରେ ନଜର ରଖିବା ପାଇଁ କୃତ୍ରିମ ବୁଦ୍ଧିମତ୍ତା (ଏଆଇ) ସୁବିଧା ଥାଇ ମଧ୍ୟ ଏଭଳି ଦୁର୍ଘଟଣା ଘଟୁଥିବାରୁ ବିରୋଧୀ କଂଗ୍ରେସ ଏହାକୁ ସରକାରଙ୍କ ଯୋଜନାବିହୀନ କାର୍ଯ୍ୟର ପରିଣାମ ବୋଲି କହି ସମାଲୋଚନା କରିଛି।
ଆସାମର ହୋଜାଇ ଜିଲା ନର୍ଥଇଷ୍ଟ ଫ୍ରଣ୍ଟିୟର ରେଲଓ୍ୱେ ଡିଭିଜନ୍ରେ ଶନିବାର ରାତି ପ୍ରାୟ ୨ଟା ୧୫ରେ ଏକ ଟ୍ରେନ୍ ଦୁର୍ଘଟଣା ଘଟିଛି। ମିଜୋରାମର ସାଇରଙ୍ଗରୁ ନୂଆଦିଲ୍ଲୀର ଆନନ୍ଦ ବିହାର ଟର୍ମିନାଲକୁ ସଂଯୋଗ କରୁଥିବା ରାଜଧାନୀ ଏକ୍ସପ୍ରେସ୍ ଜଙ୍ଗଲ ଭିତର ଦେଇ ଗତି କରୁଥିବାବେଳେ ସେହି ସମୟରେ ରେଳଲାଇନ୍ ଅତିକ୍ରମ କରୁଥିବା ଏକ ହାତୀପଲ ଉପରକୁ ମାଡ଼ିଯାଇଛି।
ଘଟଣାସ୍ଥଳରେ ୭ ହାତୀଙ୍କ ମୃତ୍ୟୁ ଘଟିଥିବାବେଳେ ଅନ୍ୟ ଏକ ହାତୀ ଆହତ ହୋଇଛି। ସେତେବେଳେ କୁହୁଡ଼ି ଯୋଗୁ କମ୍ ଦେଖାଯାଉଥିଲା। ହାତୀପଲ ରେଳଲାଇନ୍ ଉପରେ ଚଢ଼ିଆସିଥିବା ନିକଟରୁ ଦେଖିବା ପରେ ଲୋକୋପାଇଲଟ୍ ରଖି ଏମର୍ଜେନ୍ସି ବ୍ରେକ୍ ଦେଇଥିଲେ ହେଁ ଟ୍ରେନ୍କୁ ନିୟନ୍ତ୍ରଣ କରିପାରି ନ ଥିଲେ। ଫଳରେ ହାତୀପଲକୁ ଧକ୍କାଦେବା ପରେ ଟ୍ରେନ୍ର ୫ଟି ବଗି ଲାଇନ୍ଚ୍ୟୁତ ହୋଇଯାଇଥିଲା। ଏଥିଯୋଗୁ ଉକ୍ତ ରେଳପଥ ଦେଇ ଟ୍ରେନ୍ ଚଳାଚଳ ବାଧାପ୍ରାପ୍ତ ହୋଇଥିଲା। ଅନେକ ଟ୍ରେନ୍କୁ ଭିନ୍ନ ରୁଟ୍କୁ ଡାଇଭର୍ଟ କରାଯାଇଥିଲା। ନର୍ଥ ଫ୍ରଣ୍ଟିୟର ଜେନେରାଲ ମ୍ୟାନେଜରଙ୍କ ସମେତ ଲୁମ୍ଡିଙ୍ଗ୍ ଡିଭିଜନ୍ର ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ପହଞ୍ଚତ୍ ପ୍ରଭାବିତ ଯାତ୍ରୀଙ୍କ ପାଇଁ ଯାତ୍ରା ବନ୍ଦୋବସ୍ତ କରିଥିଲେ। ସକାଳ ପ୍ରାୟ ୬ଟା ୧୫ରେ ଟ୍ରେନ୍ ଚଳାଚଳ ସ୍ୱାଭାବିକ ହୋଇଥିଲା। ଏହି ପ୍ରସଙ୍ଗରେ କଂଗ୍ରେସ ଏମ୍ପି ଗୌରବ ଗୋଗୋଇ କହିଛନ୍ତି, ଜଙ୍ଗଲ ମଧ୍ୟରେ ହିମନ୍ତ ବିଶ୍ୱଶର୍ମା ସରକାରଙ୍କ ଯୋଜନାବିହୀନ ଦ୍ରୁତ ନିର୍ମାଣ କାର୍ଯ୍ୟ ଯୋଗୁ ଜୀବଜନ୍ତୁଙ୍କୁ ପ୍ରଭାବିତ କରୁଛି।
