ଜୟପୁର,୨୬ ।୯: ରାଜସ୍ଥାନ ମୁଖ୍ୟମନ୍ତ୍ରୀ ଚେହେରାକୁ ନେଇ ସୃଷ୍ଟି ହୋଇଥିବା ରାଜନୈତିକ ସଙ୍କଟ ଚରମ ସ୍ଥିତିରେ ପହଞ୍ଚିଛି । ରାଜ୍ୟରେ ଅଶୋକ ଗେହଲୋଟ ଓ ସଚ୍ଚିନ ପାଇଲଟଙ୍କ ସମର୍ଥକଙ୍କ ମଧ୍ୟରେ ମୁହାଁମୁହିଁ ସ୍ଥିତି ଉପୁଜିଛି । ଇତି ମଧ୍ୟରେ କଂଗ୍ରେସ ବିଧାୟକ ଦଳ ବୈଠକରେ ରାଜସ୍ଥାନର ନୂଆ ମୁଖ୍ୟମନ୍ତ୍ରୀ ଘୋଷଣାକୁ ୧୯ ଅକ୍ଟୋବର ପର୍ଯ୍ୟନ୍ତ ଘୁଞ୍ଚାଇ ଦିଆଯାଇଛି । ଅନୁମାନ କରାଯାଉଛି କି ରାଜସ୍ଥାନ ନୂଆ ମୁଖ୍ୟମନ୍ତ୍ରୀଙ୍କ ଘୋଷଣା କଂଗ୍ରେସ ଅଧ୍ୟକ୍ଷ ନିର୍ବାଚନ ଫଳାଫଳ ଆସିବା ପରେ ହେବ । ମିଳିଥିବା ସୂଚନା ଅନୁଯାୟୀ, ରାଜସ୍ଥାନର ସମସ୍ତ ବିଧାୟକ ୧୯ ଅକ୍ଟୋବରରେ ରାଜଧାନୀ ଦିଲ୍ଲୀ ଯିବେ ଓ ସୋନିଆ ଗାନ୍ଧୀଙ୍କୁ ଭେଟି ସେମାନଙ୍କ ପକ୍ଷ ରଖିବେ । ଏହାପରେ ହିଁ ମୁଖ୍ୟମନ୍ତ୍ରୀ ପଦର ନାମ ଘୋଷଣା କରାଯିବ ।
ସୂଚନାଯୋଗ୍ୟ, ରବିବାର ରାଜସ୍ଥାନରେ ହେବାକୁ ଥିବା ବିଧାୟକ ଦଳର ବୈଠକରେ ନୂଆ ମୁଖ୍ୟମନ୍ତ୍ରୀଙ୍କ ନାମ ସ୍ଥିର କରାଯାଇଥାଆନ୍ତା । ହେଲେ ଏହା ପୂର୍ବରୁ କଂଗ୍ରେସର ୯୨ ବିଧାୟକ ଇସ୍ତଫା ଦେଇଦେଲେ । ଏହାପରେ ରାଜସ୍ଥାନ ରାଜନୀତିରେ ଉପୁଜିଲା ସଙ୍କଟ । ଏହାର ସମାଧାନ ପାଇଁ ଦଳ ମୁଖିଆ ମହାସଚିବ କେସି ଭେଣୁଗୋପଳଙ୍କୁ ଏହାର ଦାୟିତ୍ୱ ଦେଇଛନ୍ତି ।
