ଜୟପୁର,୬।୧୦: ଭାଜପାର ଆଧିକାରୀକ ଟୁଇଟର ହ୍ୟାଣ୍ଡେଲରୁ ରାହୁଲ ଗାନ୍ଧୀଙ୍କୁ ‘ରାବଣ’ ଦର୍ଶାଇ ଏକ ପୋଷ୍ଟର ଶେୟାର କରାଯାଇଥିଲା। ଏହାକୁ ନେଇ ବିରୋଧୀ ଦଳ ଭାଜପାକୁ ଟାର୍ଗେଟ କରୁଥିବା ବେଳେ ରାଜସ୍ଥାନର ରାଜଧାନୀ ଜୟପୁରରେ ଦଳ ରାଷ୍ଟ୍ରୀୟ ସଭାପତି ଜେପି ନଡ୍ଡାଙ୍କ ବିରୋଧରେ ଏକ ମାମଲା ରୁଜୁ ହୋଇଛି। ‘ରାବଣ’ ପୋଷ୍ଟର ଉପରେ ଆପତ୍ତି ଦର୍ଶାଇ ଜୟପୁରର ଓକିଲ ଜସୱନ୍ତ ଗୁରୁଜର ଏହି ଅଭିଯୋଗ କରିଛନ୍ତି।
ଅପରପକ୍ଷେ ଭାଜପା ଟୁଇଟର ହ୍ୟାଣ୍ଡେଲରୁ ପ୍ରସ୍ତୁତ ଏହି ପୋଷ୍ଟକୁ ଦେଖି ପ୍ରିୟଙ୍କା ଗାନ୍ଧୀ ମଧ୍ୟ ଟୁଇଟ୍ କରିଛନ୍ତି। ପ୍ରିୟଙ୍କା ଲେଖିଛନ୍ତି, ଆପଣ ରାଜନୀତି ଏବଂ ବିତର୍କକୁ କେଉଁ ସ୍ତରରେ କେତେ ତଳକୁ ନେଇଯିବାକୁ ଚାହୁଁଛନ୍ତି? ଆପଣଙ୍କ ଦଳର ଅଫିସିଆଲ ଟୁଇଟର ହ୍ୟାଣ୍ଡେଲ ଦ୍ୱାରା କରାଯାଉଥିବା ହିଂସାତ୍ମକ ଏବଂ ଉତ୍ତେଜନାମୂଳକ ଟୁଇଟ ସହିତ ଆପଣ ସହମତ କି? ବୋଲି ସେ ଲେଖିଛନ୍ତି।
ପ୍ରକାଶ ଯେ, ୨୦୨୪ ବିଧାନସଭା ନିର୍ବାଚନ ପୂର୍ବରୁ ଶାସକ-ବିରୋଧୀ ଦଳ ମଧ୍ୟରେ ପୋଷ୍ଟର ଓ୍ବାର(ଆକ୍ରମଣ) ବୃଦ୍ଧି ପାଇଛି। ସୋସିଆଲ ମିଡିଆରୁ ଏହା ପ୍ରଥମେ ଆରମ୍ଭ ହୋଇ ପରସ୍ପର ବିରୋଧରେ କଟାକ୍ଷରେ ପହଞ୍ଚୁଛି। ଏହି କ୍ରମରେ କଂଗ୍ରେସ ପକ୍ଷରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଅମିତ ଶାହାଙ୍କ ଏକ ଫଟୋ ପୋଷ୍ଟ କରି ‘ସବୁଠାରୁ ବଡ଼ ମିଛୁଆ’ ଏବଂ ‘ଜୁମ୍ଲା ବଏ’ ବୋଲି ଲେଖାଯାଇଥିଲା। ଏହାର ଗୋଟିଏ ଦିନ ପରେ ଭାଜପା ରାହୁଲ ଗାନ୍ଧୀଙ୍କୁ ରାବଣ ସଜାଇ ତାଙ୍କର ଏକ ପୋଷ୍ଟର ଶେୟାର କରିଛି। ଉକ୍ତ ପୋଷ୍ଟରକୁ ନେଇ ଭାଜପା ଉପରେ କଂଗ୍ରେସ ଖପ୍ପା ହୋଇଛି ।
