ରାଜକନିକା,୧ା୧୦(ଡି.ଏନ.ଏ.): କେନ୍ଦ୍ରାପଡ଼ା ଜିଲା ରାଜକନିକା ବ୍ଲକ ନହୁଣି ଗ୍ରାମର ତ୍ରିଲୋଚନ ବେହେରାଙ୍କ ବିରଳ କଳାକୃତି ଡେରାଡୁନସ୍ଥିତ ଇଣ୍ଡିଆନ୍ ମିଲିଟାରୀ ଏକାଡେମୀ (ଆଇଏମ୍ଏ)ରେ ସ୍ଥାନ ପାଇଛି। ନହୁଣି ଗ୍ରାମ ବ୍ରାହ୍ମଣ ଶାସନର ତ୍ରିଲୋଚନ ଗରିବ କୁମ୍ଭାର ପରିବାରରେ ଜନ୍ମ ହୋଇଥିଲେ ମଧ୍ୟ ତାଙ୍କ କଳାକୃତି ରାଜ୍ୟ ପାଇଁ ଗୌରବ ଆଣିଛି। ତ୍ରିଲୋଚନ ତାଙ୍କ କଳାକୃତିରେ ୧୯୭୧ ଭାରତ ପାକିସ୍ତାନ ଯୁଦ୍ଧରେ ଆତ୍ମବଳୀ ଦେଇଥିବା ଯବାନମାନଙ୍କ ଘମାଘେଟ୍ ଲଢ଼େଇକୁ ପ୍ରଦର୍ଶନ କରିଛନ୍ତି। ବିଭିନ୍ନ ଅଞ୍ଚଳରୁ ଆସୁଥିବା ଲୋକମାନେ ତାଙ୍କର ଏହି କଳାକୃତିକୁ ଦେଖି ପ୍ରଶଂସା କରୁଛନ୍ତି। ଏହା ଓଡ଼ିଆ ଅସ୍ମିତାର ପରିଚୟ ଆଣିଛି। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ତ୍ରିଲୋଚନଙ୍କୁ ଏଥିପାଇଁ ପ୍ରଶଂସା କରିବା ସହିତ ଆର୍ଥିକ ସହାୟତା ଯୋଗାଇ ଦେବାକୁ ପ୍ରତିଶ୍ରୁତି ଦେଇଛନ୍ତି।
ତ୍ରିଲୋଚନ ଦିନେ ବାପାଙ୍କ ସହ ମିଶି ଗାଁରେ ମାଟିହାଣ୍ଡି ଗଢ଼ି ବିକ୍ରି କରି ପରିବାର ଚଳାଉଥିଲେ। ଏହାପରେ ସେ ଭାଲକୁଣୀ, ଗଣେଶ,ସରସ୍ବତୀଙ୍କ ମୂର୍ତ୍ତି ତିଆରି କରି ନିଜର କଳାକୃତିର ପରିଚୟ ଦେଇଥିଲେ। ଅଳ୍ପଦିନ ମଧ୍ୟରେ ତାଙ୍କ ମୂର୍ତ୍ତି ତିଆରି କଳା ରାଜକନିକା ଅଞ୍ଚଳରେ ସ୍ବତନ୍ତ୍ର ପରିଚୟ ସୃଷ୍ଟି କରିଥିଲା। ଏହାପରେ ଆଉ ପଛକୁ ଫେରି ଚାହିଁ ନାହାନ୍ତି ତ୍ରିଲୋଚନ। ତାଙ୍କର ବହୁ କଳାକୃତି ଉତ୍ତରପ୍ରଦେଶରେ ଉଚ୍ଚ ପ୍ରଶଂସିତ ହୋଇଛି। ଦିନେ ପୁନେସ୍ଥିତ ଜଣେ ଅଣଓଡ଼ିଆ ଅଫିସର ୨ ମାସ ମଧ୍ୟରେ ତାଙ୍କର ବିରଳ କଳାକୃତିକୁ ଆଇଏମ୍ଏକୁ ପଠାଇବାକୁ ନିର୍ଦ୍ଦେଶ ଦେଇଥିଲେ। ଏହାପରେ ତ୍ରିଲୋଚନ ଅନ୍ୟ ମୂର୍ତ୍ତି କାରିଗରଙ୍କ ସହିତ ନିଜର କଳାକୃତୀ ତିଆରିରେ ଲାଗି ପଡ଼ିଥିଲେ। ଆଜି ତାଙ୍କର କଳାକୃତି ଆଇଏମ୍ଏର ଦ୍ୱାରଦେଶରେ ଶୋଭା ପାଉଛି।
