ଶିଲଂ/ଇନ୍ଦୋର/ଗାଜିପୁର,୧୦ା୬:ନବ ଦମ୍ପତି ରାଜା ରଘୁବଂଶୀ ଓ ସୋନମ ହନିମୁନ୍ରେ ଇଷ୍ଟ୍ ଖାସି ହିଲ୍ସ ଚେରାପୁଞ୍ଜି ବୁଲିବାକୁ ଯାଉଥିଲେ। ମେ’ ୨୩ରେ ଉଭୟେ ନିଖୋଜ ହୋଇଯାଇଥିଲେ। ଏହାର ଦିନକ ପରେ ଦୁହଁିଙ୍କୁ ଶେଷଥର ପାଇଁ ନୋଙ୍ଗ୍ରିଆଟ୍ର ବାଲାଜୀ ହୋମ୍ଷ୍ଟେ’ରେ ଦେଖିବାକୁ ମିଳିଥିଲା। ରାଜା ଓ ସୋନମ ବୁଲାବୁଲି କରିବା ପାଇଁ ଭଡ଼ାରେ ନେଇଥିବା ଏକ ସ୍କୁଟର ନିଖୋଜ ହେବାର ଦିନକ ପରେ ସୋହରାରିମ୍ରେ ପରିତ୍ୟକ୍ତ ଅବସ୍ଥାରେ ଠାବ ହୋଇଥିଲା। ରିଆଟ୍ ଆର୍ଲିଅଙ୍ଗ୍ର ଓ୍ବେଇସାଡୋଙ୍ଗ୍ ପାର୍କିଂ ଲଟ୍ରେ ଥିବା ଏକ ଗଭୀର ଖାଇରୁ ଇନ୍ଦୋର ବ୍ୟବସାୟୀ ରାଜାଙ୍କ ମୃତଦେହ ଠାବ ହେବାର ୧୦ ଦିନ ପରେ ସେହି ସ୍ଥାନରୁ ଏକ ଦାଆ ମଧ୍ୟ ମିଳିଥିଲା। ରାଜାଙ୍କୁ ଏହି ଧାରୁଆ ଅସ୍ତ୍ରରେ ହାଣି ହତ୍ୟା କରାଯାଇଥିବା ପୋଲିସ ସନ୍ଦେହ କରିଥିଲା। ତେବେ ସ୍ତ୍ରୀ ସୋନମଙ୍କ ପତ୍ତା ମିଳି ନ ଥିବାରୁ ପୋଲିସ ତନାଘନା ଜାରି ରଖିଥିଲା। ଇତିମଧ୍ୟରେ ମେଘାଳୟର ଜଣେ ଟୁରିଷ୍ଟ ଗାଇଡ୍ ଏହି ଦମ୍ପତି ନିଖୋଜ ହେବା ଦିନ ସେମାନଙ୍କୁ ଅନ୍ୟ ୩ ଜଣଙ୍କ ସହ ଦେଖିଥିବା କଥା ଶନିବାର କହିଥିଲେ। ମେ’ ୨୩ ପୂର୍ବାହ୍ନ ୧୦ଟାରେ ସେହି ୫ ଜଣ ନୋଙ୍ଗ୍ରିଆଟ୍ରୁ ମଲାଖିଆଟ୍କୁ ୩,୦୦୦ ପାଦ ଉପରକୁ ଟ୍ରେକିଂ କରି ଚଢ଼ିଥିବା ବିଷୟ ସେ ପୋଲିସକୁ ଜଣାଇଥିଲେ। ଟୁରିଷ୍ଟ ଗାଇଡ୍ଙ୍କ ବୟାନ ଏଥିରେ ଅନ୍ୟମାନଙ୍କ ସମ୍ପୃକ୍ତି ନେଇ ପୋଲିସର ସନ୍ଦେହ ଦୃଢ଼ୀଭୂତ କରିଥିଲା। ସେମାନେ ସମସ୍ତେ ହିନ୍ଦୀ କହୁଥିବାରୁ ପୋଲିସର ତଲାସି ଅଭିଯାନ ରାଜ୍ୟ ବାହାରକୁ ଲମ୍ବିଥିଲା। ଏହି ୩ ଜଣ ବ୍ୟକ୍ତି କିଏ ତାହା ସ୍ପଷ୍ଟ ହୋଇ ନ ଥିଲେ ମଧ୍ୟ ଭିକି, ଆକାଶ ଓ ଆନନ୍ଦଙ୍କୁ ରାଜାଙ୍କ ହତ୍ୟା ଅଭିଯୋଗରେ ଗିରଫ କରାଯାଇଛି। ରାଜାଙ୍କୁ ହତ୍ୟା କରିବା ଲାଗି ସୋନମ ଏହି ୩ ଜଣଙ୍କୁ ସୁପାରି ଦେଇଥିଲେ। ସୋନମ ତାଙ୍କ ପୂର୍ବ ପ୍ରେମିକ ରାଜ କୁଶଓ୍ବାହଙ୍କୁ ବିବାହ କରିବା ପାଇଁ ସ୍ବାମୀଙ୍କୁ ରାସ୍ତାରୁ ହଟାଇବାକୁ ଚାହୁଁଥିଲେ। ଏଥିଲାଗି ବିବାହର ସପ୍ତାହେ ଭିତରେ ସେ ନିଜ ସ୍ବାମୀଙ୍କୁ ହତ୍ୟା କରାଇଛନ୍ତି। ରାଜ କୁଶଓ୍ବାହଙ୍କୁ ମଧ୍ୟ ଗିରଫ କରାଯାଇଥିବା ମେଘାଳୟ ପୋଲିସ ସୋମବାର ସ୍ପଷ୍ଟ କରିଛି। ପୋଲିସର କହିବା ହେଲା ସୋନମ ସ୍ବାମୀ ରାଜାଙ୍କୁ ହତ୍ୟା କରାଇବା ପାଇଁ ଅଭିଯୁକ୍ତମାନଙ୍କୁ ସୁପାରି ଦେଇଥିଲେ। ପୋଲିସ ସୂତ୍ର ଅନୁଯାୟୀ, ସୋନମ ରଘୁବଂଶୀ ତାଙ୍କ ପ୍ରେମିକଙ୍କ ସହ ମିଶି ଏହି ଅପରାଧ କରିଥିଲେ। ବିବାହର ମାତ୍ର ୫ ଦିନ ପରେ, ସୋନମ ରାଜା ରଘୁବଂଶୀଙ୍କ ହତ୍ୟାର ସମ୍ପୂର୍ଣ୍ଣ ସ୍କ୍ରିପ୍ଟ ଲେଖିଥିଲେ। ସିସିଟିଭି ଫୁଟେଜ ଓ ସେମାନଙ୍କ ସ୍ବୀକାରୋକ୍ତି ଏହି ଥିଓରିକୁ ଦୃଢ଼ କରିଛି। ରାଜାଙ୍କ ପରିବାର ସିବିଆଇ ତଦନ୍ତ ଦାବି କରିଛି। ସୋନମ ଓ ଅନ୍ୟ ଅଭିଯୁକ୍ତମାନଙ୍କୁ ମୃତ୍ୟୁଦଣ୍ଡ ଦିଆଯାଉ ବୋଲି ରାଜାଙ୍କ ମା’ ଉମା ରଘୁବଂଶୀ ଦାବି କରିଛନ୍ତି। ଏହି ବହୁଚର୍ଚ୍ଚିତ ମାମଲାର ଶୁଣାଣି ଫାଷ୍ଟଟ୍ରାକ୍ କୋର୍ଟରେ ହୋଇପାରେ ବୋଲି କୁହାଯାଉଛି।
