ନୂଆଦିଲ୍ଲୀ,୧୧।୩ : ଗଣତାନ୍ତ୍ରିକ ମୂଲ୍ୟବୋଧକୁ ଗୁରୁତ୍ୱ ଦେଇ ଉପରାଷ୍ଟ୍ରପତି ଜଗଦୀପ ଧନକର ଶନିବାର କହିଛନ୍ତି ଯେ ଗଣତନ୍ତ୍ରର ମନ୍ଦିରର ସମ୍ମାନ ହ୍ରାସ କରିବାକୁ ଅନୁମତି ଦିଆଯାଇପାରିବ ନାହିଁ। କଂଗ୍ରେସ ନେତା ରାହୁଲ ଗାନ୍ଧୀଙ୍କ ନାମ ନ ନେଇ ସେ ତାଙ୍କୁ ଟାର୍ଗେଟ କରି କହିଛନ୍ତି ଯେ କିଛି ଲୋକ ଅଭିଯୋଗ କରୁଛନ୍ତି ବିଶ୍ୱର ବୃହତ୍ତମ ଗଣତନ୍ତ୍ରର ସଂସଦରେ ଏହି ମାଇକ ବନ୍ଦ କରାଯାଉଛି। ଏହାଠାରୁ ଅଧିକ ଅସତ୍ୟ କିଛି ହୋଇପାରିବ ନାହିଁ। ଉପରାଷ୍ଟ୍ରପତି ଚୌଧୁରୀ ଚରଣ ସିଂ ବିଶ୍ୱବିଦ୍ୟାଳୟରେ ଆୟୁର୍ବେଦ ମହାକୁମ୍ଭକୁ ସମ୍ବୋଧିତ କରି କହିଛନ୍ତି, ଆମେ କେବଳ ବୃହତ୍ତମ ଗଣତନ୍ତ୍ର ନୁହେଁ, ଆମେ ମଧ୍ୟ ଗଣତନ୍ତ୍ରର ଜନନୀ ଅଟୁ।
ଆମର ସମ୍ବିଧାନ ତିନି ବର୍ଷ ଧରି ଅନେକ ଜଟିଳ ଏବଂ ବିଭାଜନକାରୀ ପ୍ରସଙ୍ଗ ଉପରେ ବିତର୍କ କରି ଏସବୁର ସମାଧାନ କରିଥିଲା। କିନ୍ତୁ ତିନିବର୍ଷର ଦୀର୍ଘ ସମୟ ମଧ୍ୟରେ ଏଥିରେ କୌଣସି ବ୍ୟାଘାତ ଘଟି ନ ଥିଲା, ବାଚସ୍ପତିଙ୍କ ଆଗକୁ କେହି ଆସି ନ ଥିଲେ, ପୋଷ୍ଟର ଦେଖାଇ ନ ଥିଲେ। ଆଜି ଆମର ଆଚରଣ ଏହାର ବିପରୀତ ଅଟେ। ଉପରାଷ୍ଟ୍ରପତି ଏପରି ଏକ ପରିବେଶ ସୃଷ୍ଟି କରିବାକୁ ଆହ୍ବାନ ଦେଇଥିଲେ ଯେଉଁଠାରେ ରାଜ୍ୟସଭା, ଲୋକସଭା, ବିଧାନସଭାରେ ଗଣତନ୍ତ୍ରର ସଦସ୍ୟମାନଙ୍କ ଆଚରଣ ଆଦର୍ଶ ହେବା ଉଚିତ ବୋଲି ସେ କହିଛନ୍ତି।
ରାଜ୍ୟସଭାର ଅଧ୍ୟକ୍ଷ ହୋଇ ମୁଁ କହିବାକୁ ବାଧ୍ୟ ଯେ ଭାରତ ସଂସଦରେ ମାଇକ ବନ୍ଦ ହୁଏ ନାହିଁ। ହଁ, ଏକ ସମୟ ଥିଲା, ଏକ ଅନ୍ଧକାର ଅଧ୍ୟାୟ ଥିଲା, ତାହା ଥିଲା ଜରୁରୀକାଳୀନ ସମୟ। ଉପରାଷ୍ଟ୍ରପତି କହିଛନ୍ତି ଯେ ମୁଁ ମୋର ଦୁଇଟି ବିଦେଶ ଗସ୍ତ ସମୟରେ ଦେଖିଛି ଯେ ଯେତେବେଳେ ମୁଁ ନିଜକୁ ପରିଚିତ କରେ, ଲୋକମାନେ ମୋତେ ସମ୍ମାନର ସହ ଦେଖନ୍ତି, ଏହା ହେଉଛି ଆଜିର ଭାରତର ଶକ୍ତି। ତଥାପି କିଛି ଲୋକ ବିଦେଶରେ ଭାରତକୁ ବଦନାମ କରୁଛନ୍ତି।
ଆମର ଇତିହାସ ହଜାର ହଜାର ବର୍ଷ ପୁରୁଣା, ଆମେ ଏକ ମହାନ ରାଷ୍ଟ୍ର, ଆମ ଲୋକମାନେ ମହାନ। ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ପ୍ରଶଂସା କରି ଉପରାଷ୍ଟ୍ରପତି କହିଛନ୍ତି, ଉତ୍ତରପ୍ରଦେଶର ଲୋକମାନେ କେବେ ଭାବିଥିଲେ ଯେ ଆଇନ ଶୃଙ୍ଖଳା ପୁନଃସ୍ଥାପିତ ହେବ। କିନ୍ତୁ ଏହା ଘଟିଲା। କିଛି ଲୋକ ମୁଖ୍ୟମନ୍ତ୍ରୀଙ୍କ ବିଷୟରେ କହିଥିଲେ ଯେ ଦେଖିବା ତାଙ୍କ ଆଇନ ଶୃଙ୍ଖଳା କେତେ ଦିନ ରହିବ। କିନ୍ତୁ ଏହା ଚାଲିଛି। ନିନ୍ଦୁକ ଚୁପ୍ ହୋଇ ଯାଇଛନ୍ତି।
