ମୁମ୍ବାଇ,୨୪।୮: ମହାରାଷ୍ଟ୍ରର ପୁଣେରେ କଂଗ୍ରେସ ଏମପି ତଥା ଲୋକ ସଭା ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ଏକ କାର୍ଯ୍ୟକ୍ରମର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । ଭିଡିଓରେ ଜଣେ ଛାତ୍ରୀ ସେଲ୍ଫି ନେବା ପରେ ହଠାତ୍ ରାହୁଲ ଗାନ୍ଧୀଙ୍କ ଗାଲରେ କିସ୍ କରୁଥିବା ଦେଖାଯାଉଛି । ଏହି ଘଟଣା ପୁଣେରେ ଆୟୋଜିତ ଯୁବପିଢ଼ିଙ୍କ କାର୍ଯ୍ୟକ୍ରମ ‘ଛାତ୍ରଙ୍କ ଗୁଞ୍ଜ’ ସମୟରେ ଘଟିଥିବା ଜଣାପଡ଼ିଛି।
ଭାଇରାଲ ଭିଡିଓରେ ରାହୁଲ ଗାନ୍ଧୀ ମଞ୍ଚ ଉପରେ ଅନ୍ୟମାନଙ୍କ ସହ ସେଲ୍ଫି ନେଉଥିବା ଦେଖାଯାଉଛି। ଏହି ସମୟରେ ଜଣେ ଯୁବତୀ ତାଙ୍କ ନିକଟକୁ ଆସି ସେଲ୍ଫି ନେବା ପରେ ହଠାତ୍ ତାଙ୍କ ଗାଲରେ କିସ୍ କରିଥିଲେ। ଏହାପରେ ରାହୁଲ ଗାନ୍ଧୀ କିଛି ସମୟ ଛାତ୍ରୀଙ୍କ ସହ କଥା ହୋଇଥିଲେ । ପରେ ସୁରକ୍ଷାକର୍ମୀଙ୍କ ସହ ମଞ୍ଚରୁ ତଳକୁ ଚାଲିଯାଇଥିଲେ।ଘଟଣାର ଭିଡିଓ ‘ଏକ୍ସ’ରେ ସେୟାର ହେବା ପରେ ଦ୍ରୁତଗତିରେ ଭାଇରାଲ ହୋଇଥିଲା। କିଛି ସୋସିଆଲ ମିଡିଆ ୟୁଜର ଏହାକୁ ‘କ୍ୟୁଟ୍ ମୋମେଣ୍ଟ’ ବୋଲି କହିଥିବା ବେଳେ, ଆଉ କିଛି ଲୋକ ଛାତ୍ରୀଙ୍କ ଆତ୍ମବିଶ୍ୱାସ ଓ ସ୍ୱାଭାବିକ ବ୍ୟବହାର ସହ ଏହି ଘଟଣାକୁ ଯୋଡ଼ିଛନ୍ତି।
ରାହୁଲ ଗାନ୍ଧୀଙ୍କ ପୁଣେ ଗସ୍ତ କେବଳ ଏହି ଭାଇରାଲ ଭିଡିଓ ପାଇଁ ଚର୍ଚ୍ଚାରେ ନାହିଁ। ‘ଛାତ୍ରଙ୍କ ଗୁଞ୍ଜ’ କାର୍ଯ୍ୟକ୍ରମରେ ସେ ମହିଳା, ଯୁବପିଢ଼ି ଏବଂ ସାମାଜିକ ବ୍ୟବସ୍ଥା ସହ ଜଡ଼ିତ ବିଭିନ୍ନ ପ୍ରସଙ୍ଗରେ ନିଜ ମତ ରଖିଥିଲେ। କାର୍ଯ୍ୟକ୍ରମରେ ରାହୁଲ ଗାନ୍ଧୀ ଜନ୍ତରମନ୍ତରରେ ହୋଇଥିବା ଛାତ୍ର ଆନ୍ଦୋଳନର ମଧ୍ୟ ଉଲ୍ଲେଖ କରିଥିଲେ। ଏହି ଅବସରରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟାର୍ଗେଟ୍ କରିଥିଲେ । ତାଙ୍କ ବୟାନକୁ ନେଇ ଭାଜପା ଓ କଂଗ୍ରେସ ମଧ୍ୟରେ ରାଜନୈତିକ ବାକ୍ଯୁଦ୍ଧ ମଧ୍ୟ ଆରମ୍ଭ ହୋଇଥିଲା।