ନୂଆଦିଲ୍ଲୀ,୧୨।୧୦: ସରକାରଙ୍କୁ ଘେରିଛନ୍ତି କଂଗ୍ରେସ ସମେତ ବିରୋଧୀ ଦଳ। ସୋମବାର (୧୨ ଅକ୍ଟୋବର) ବିରୋଧୀ ଦଳ ନେତା ରାହୁଲ ଗାନ୍ଧୀ ଜ୍ଞାନେଶ କୁମାରଙ୍କୁ ଇସ୍ତଫା ଦେଇ ଏହି ପ୍ରସଙ୍ଗରୁ ହଟିଯିବାକୁ ଆହୱାନ ଦେଇଛନ୍ତି। ଏପରିକି ସେ ଆପ୍ରୁଭର (ସରକାରୀ ପକ୍ଷର ସାକ୍ଷୀ) ହୋଇଯିବାକୁ କହିବା ସହ ଭୁଲ କରିଥିଲେ ମଧ୍ୟ ତାଙ୍କୁ କ୍ଷମା କରାଯାଇପାରେ ବୋଲି କହିଛନ୍ତି।
ରାହୁଲ ଗାନ୍ଧୀ କହିଛନ୍ତି, ଜ୍ଞାନେଶ କୁମାରଙ୍କ ପାଖକୁ ମୋର ବାର୍ତ୍ତା ଯାଉଛି। ସେ ମଧ୍ୟ ପ୍ରେସ କନଫରେନ୍ସ ଦେଖୁଛନ୍ତି। ମୁଁ ତାଙ୍କୁ କହିବାକୁ ଚାହୁଁଛି, ଆପଣ ଆପ୍ରୁଭର ହୋଇଯାଆନ୍ତୁ। ଆପଣ ଭୁଲ କରିଛନ୍ତି, ଇସ୍ତଫା ଦେଇ ପଦରୁ ହଟିଯାଆନ୍ତୁ। ହୁଏତ ଏହାପରେ ଆମେ ଆପଣଙ୍କୁ କ୍ଷମା କରିଦେଇପାରୁ।
ସେ ଆହୁରି କହିଛନ୍ତି ଯେ ତାଙ୍କ ମତରେ ଜ୍ଞାନେଶ କୁମାର ମୁଖ୍ୟ ଅପରାଧୀ ନୁହନ୍ତି। ତାଙ୍କ ଉପରେ ଚାପ ଥାଇପାରେ। ତେଣୁ ସେ ଆଗକୁ ଆସି ସତ କହିବା ଉଚିତ। ରାହୁଲ କହିଛନ୍ତି, ଆମେ ଲୋକଙ୍କୁ କ୍ଷମା କରୁ। ଆମେ କ୍ରୂର ନୁହେଁ। ରାହୁଲ ଗାନ୍ଧୀ କହିଛନ୍ତି ଯେ ଭୋଟ ଚୋରି ବିରୋଧରେ ଗତ ୪-୫ ଦିନ ଧରି ଜନଆନ୍ଦୋଳନ ଦେଖିବାକୁ ମିଳୁଛି। କିନ୍ତୁ ଏହା ବିରୋଧରେ ପ୍ରତିରୋଧ ବହୁ ପୂର୍ବରୁ ଆରମ୍ଭ ହୋଇଥିଲା। ଗତ ୧୦ରୁ ୧୨ ବର୍ଷ ଧରି ଏହି ପ୍ରତିରୋଧ ଜାରି ରହିଥିବା ବେଳେ ଏବେ ତାହା ସାମ୍ନାକୁ ଆସୁଛି ବୋଲି ସେ କହିଛନ୍ତି।
ଦିଲ୍ଲୀରେ ବିରୋଧ ପ୍ରଦର୍ଶନକୁ ଅନୁମତି ନ ମିଳିବା ପ୍ରସଙ୍ଗରେ ରାହୁଲ ଗାନ୍ଧୀ ପୋଲିସର କାର୍ଯ୍ୟଶୈଳୀ ଉପରେ ପ୍ରଶ୍ନ ଉଠାଇଛନ୍ତି। ତାଙ୍କ ଅଭିଯୋଗ ଅନୁଯାୟୀ, ଭାଜପା ଓ ଆର୍ଏସଏସ ସହ ଜଡ଼ିତ କିଛି ଲୋକ ମହିଳାଙ୍କୁ ମାଡ଼ ମାରୁଥିବା ବେଳେ ପୋଲିସ ସେମାନଙ୍କ ବିରୋଧରେ ଆବଶ୍ୟକ ପଦକ୍ଷେପ ନେଉନାହିଁ। ଅନ୍ୟପଟେ ଦେଶଭକ୍ତ ଯୁବକମାନଙ୍କୁ ମାଡ଼ ମାରିବାକୁ ପୋଲିସକୁ କୁହାଯାଉଛି ବୋଲି ସେ ଅଭିଯୋଗ କରିଛନ୍ତି।
ରାହୁଲ କହିଛନ୍ତି ଯେ ବିରୋଧୀ ଦଳକୁ ଦିଲ୍ଲୀରେ ପ୍ରତିବାଦ କରିବାକୁ ଅନୁମତି ଦିଆଯାଇନଥିଲା। ପୋଲିସ ତାଙ୍କୁ ନିଜ ଘରେ ପ୍ରତିବାଦ କରିବାକୁ କହିଥିଲା। ଏହାପରେ ଅନ୍ୟ କୌଣସି ସ୍ଥାନ ଦେବାକୁ ସେ ଅନୁରୋଧ କରିଥିଲେ ମଧ୍ୟ ଅନୁମତି ମିଳିନଥିଲା। ପରେ ଜନ୍ତରମନ୍ତର ଯିବାକୁ ଉଦ୍ୟମ କରିବା ସମୟରେ ମଧ୍ୟ ସେମାନଙ୍କୁ ଅଟକାଯାଇଥିଲା ଏବଂ ମାଡ଼ ମରାଯାଇଥିବା ସେ ଦାବି କରିଛନ୍ତି। ଏହାପରେ ବିରୋଧୀ ଦଳର ନେତାମାନେ ରାଜଘାଟରେ ଏକାଠି ହୋଇଥିଲେ। ରାହୁଲ ଗାନ୍ଧୀ କହିଛନ୍ତି ଯେ ଏହି ଆନ୍ଦୋଳନ କେବଳ ୪-୫ ଦିନର ଘଟଣା ନୁହେଁ। ବର୍ଷ ବର୍ଷ ଧରି ଚାଲିଥିବା ପ୍ରତିରୋଧ ଏବେ ଅଧିକ ସ୍ପଷ୍ଟ ଭାବରେ ପ୍ରକାଶ ପାଉଛି। ଆଗକୁ ମଧ୍ୟ ଏହି ପ୍ରତିବାଦ ଜାରି ରହିବ ବୋଲି ସେ କହିଛନ୍ତି।