ନୂଆଦିଲ୍ଲୀ,୪।୪: ହିମାଚଳ ପ୍ରଦେଶର ମଣ୍ଡିରୁ ଲୋକ ସଭା ନିର୍ବାଚନ ପାଇଁ ଭାଜପା ପକ୍ଷରୁ ପ୍ରତିଦ୍ୱନ୍ଦିତା କରିବେ ଅଭିନେତ୍ରୀ କଙ୍ଗନା ରଣାଓ୍ବତ। ତେବେ ଗୁରୁବାର ସେ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ନେଇ ଏକ ବିବାଦୀୟ ବୟାନ ଦେଇଛନ୍ତି। ସେ କହିଛନ୍ତି, ପ୍ରେମିକାଙ୍କୁ ବାହା ହୋଇ ନ ପାରିବାରୁ ରାଜନୀତିକୁ ଜବରଦସ୍ତି ଆସିଛନ୍ତି ରହୁଲ। ରାହୁଲଙ୍କ ବ୍ୟତୀତ ପ୍ରିୟଙ୍କା ଗାନ୍ଧୀଙ୍କୁ ମଧ୍ୟ ସେ ଜୋରଦାର ଟାର୍ଗେଟ କରିଛନ୍ତି। ରାହୁଲ ଓ ପ୍ରିୟଙ୍କାଙ୍କୁ ସେ ପରିସ୍ଥିତିର ଦାସ ବୋଲି ଉଲ୍ଲେଖ କରିଛନ୍ତି। ସେ କହିଛନ୍ତି, ଏହି ଦୁଇଜଣଙ୍କ ଭାଗ୍ୟ ପାଇଁ ତାଙ୍କ ମାଆ ତଥା ଦଳର ପୂର୍ବ ସଭାପତି ସୋନିଆ ଗାନ୍ଧୀ ଦାୟୀ ଅଟନ୍ତି। ରାହୁଲ ଜଣେ ମହତ୍ତ୍ୱାକାଙ୍ଖି ମାଆଙ୍କର ପୁଅ ଅଟନ୍ତି। ଦୁଇ ଭାଇଭଉଣୀ ତାଙ୍କ ଜୀବନରେ କିଛି ଭଲ କରିପାରିଥା’ନ୍ତେ ହେଲେ ତାଙ୍କ ମାଆ ସେମାନଙ୍କ ଉପରେ ଚାପ ପକାଇଛନ୍ତି।
ଏକ ସାକ୍ଷାତକାର ଦେଇ କଙ୍ଗନା ରାହୁଲଙ୍କ ପରିବାରକୁ ନେଇ ବିବାଦୀୟ ଟିପ୍ପଣୀ ଦେଇଛନ୍ତି। ସେ କହିଛନ୍ତି, ଶୁଣିବାକୁ ମିଳିଛି ରାହୁଲ ଜଣେ ମହିଳାଙ୍କୁ ପ୍ରେମ କରୁଥିଲେ। ହେଲେ ତାଙ୍କ ସହ ରାହୁଲଙ୍କ ବିବାହ ହୋଇ ପାରିଲା ନାହିଁ। ଏବେ ନା ସେ ବାହା ହୋଇ ପାରୁଛନ୍ତି ନା କ୍ୟାରିୟର କରି ପାରୁଛନ୍ତି। ତାଙ୍କ ଉପରେ ପରିବାରର ଚାପ ରହୁଛି। ରାହୁଲ ଓ ପ୍ରିୟଙ୍କା ଦୁହେଁ ଭଲ ଅଟନ୍ତି। ହେଲେ ତାଙ୍କ ମାଆ ତାଙ୍କୁ ସବୁବେଳେ ଅସୁବିଧାରେ ପକାଉଛନ୍ତି। ଦୁହିଁଙ୍କ ରାଜନୀତିରେ କୌଣସି ଭବିଷ୍ୟତ ନାହିଁ ବୋଲି କଙ୍ଗନା କହିଛନ୍ତି।
