ନୂଆଦିଲ୍ଲୀ,୧୫।୭: ଏଫଏମ କଲେଜ ଛାତ୍ରୀ ସୋମ୍ୟାଶ୍ରୀଙ୍କ ମୃତ୍ୟୁ ଘଟଣାରେ ପୂରା ରାଜ୍ୟ ଉଠୁଛି ପଡୁଛି। ତେବେ ଏହା ଜାତୀୟ ରାଜନୀତିରେ ମଧ୍ୟ ଚହଳ ପକାଇଛି। ଯାହାକୁ ନେଇ କଂଗ୍ରେସ ନେତା ରାହୁଲ ଗାନ୍ଧୀ ଓ ଧର୍ମେନ୍ଦ୍ର ପ୍ରଧାନ ମୁହାଁମୁହିଁ ହୋଇଛନ୍ତି। ସୋମ୍ୟାଶ୍ରୀଙ୍କ ମୃତ୍ୟୁ ଘଟଣାକୁ ନେଇ ରାହୁଲ ମୁହଁ ଖୋଲିଥିବାବେଳେ ଏହାକୁ କଡ଼ା କାଉଣ୍ଟର କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ।
କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ରାହୁଲ ଗାନ୍ଧୀଙ୍କୁ ଛାତ୍ରୀଙ୍କ ମୃତ୍ୟୁ ମାମଲାକୁ ରାଜନୀତିକରଣ କରିବା ଅଭିଯୋଗରେ କଟୁ ସମାଲୋଚନା କରିଛନ୍ତି। ପ୍ରଧାନ କହିଛନ୍ତି ଯେ, ରାହୁଲ ଏକ ଗୁରୁତର ଓ ସମ୍ବେଦନଶୀଳ ଘଟଣାକୁ “ଶସ୍ତା ରାଜନୀତି” ପାଇଁ ବ୍ୟବହାର କରୁଛନ୍ତି, ଯାହା ତାଙ୍କର “ସଂକୀର୍ଣ୍ଣ ମାନସିକତା”କୁ ପ୍ରତିଫଳିତ କରୁଛି।
ବାଲେଶ୍ୱର ଫକୀର ମୋହନ ସୱୟଂଶାସିତ ମହାବିଦ୍ୟାଳୟର ଜଣେ ଛାତ୍ରୀ ଯୌନ ର୍ନିଯାତନା ଅଭିଯୋଗ ପରେ ଜୁଲାଇ ୧୨ ତାରିଖରେ ଆତ୍ମଦାହ କରିଥିଲେ। ସେ ଏକ ଔପଚାରିକ ଅଭିଯୋଗ ଦାଖଲ କରିଥିଲେ ଏବଂ ଅଧ୍ୟକ୍ଷଙ୍କ ନିକଟରେ ସାହାଯ୍ୟ ମାଗିଥିଲେ, କିନ୍ତୁ ତାଙ୍କ ଅଭିଯୋଗ ଉପରେ କୌଣସି ପଦକ୍ଷେପ ନିଆଯାଇ ନଥିଲା। ଜୁଲାଇ ୧୪ ତାରିଖରେ ଭୁବନେଶ୍ୱର ଏମ୍ସରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା।
ରାହୁଲ ଗାନ୍ଧୀ ଏକ ଏକ୍ସ ପୋଷ୍ଟରେ ଏହି ଘଟଣାକୁ “ଭାଜପାର ସିଷ୍ଟମ ଦ୍ୱାରା ସଂଗଠିତ ହତ୍ୟା” ବୋଲି ଅଭିହିତ କରି ଅଭିଯୋଗ କରିଛନ୍ତି ଯେ ଛାତ୍ରୀଙ୍କୁ ନ୍ୟାୟ ପ୍ରଦାନ କରିବା ପରିବର୍ତ୍ତେ ଧମକ, ପ୍ରତାରଣା ଓ ଅପମାନ ସହିବାକୁ ପଡେ। ସେ ଓଡ଼ିଶା ସରକାର ଏବଂ ଭାଜପା ଉପରେ ନିଶାନା ସାଧି କହିଛନ୍ତି ଯେ ଅଭିଯୁକ୍ତଙ୍କୁ ସୁରକ୍ଷା ଦିଆଯାଉଛି।
ଏହାକୁ ନେଇ ଧର୍ମେନ୍ଦ୍ର ପାଲଟା ଜବାବରେ କହିଛନ୍ତି ଯେ, ଓଡ଼ିଶା ସରକାର ଏହି ଘଟଣାରେ ଦୋଷୀମାନଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବ। ଭାଜପା ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସବୁବେଳେ ମହିଳା ସୁରକ୍ଷା ଓ ନ୍ୟାୟ ପାଇଁ କାର୍ଯ୍ୟ କରିଆସୁଛନ୍ତି ବୋଲି ଦାବି କରିଛନ୍ତି। ଏହା ସହିତ, ସେ ରାହୁଲଙ୍କୁ ଏହି ଦୁଃଖଦ ଘଟଣାକୁ ରାଜନୈତିକ ଫାଇଦା ପାଇଁ ବ୍ୟବହାର ନ କରିବାକୁ ଅନୁରୋଧ କରିଛନ୍ତି।
ଏହି ଘଟଣାକୁ ନେଇ ରାଜନୈତିକ ଉତ୍ତେଜନା ବୃଦ୍ଧି ପାଇଛି। କଂଗ୍ରେସ ସମେତ ଅନ୍ୟ ବିରୋଧୀ ଦଳମାନେ ଜୁଲାଇ ୧୭ରେ ଓଡ଼ିଶା ବନ୍ଦ ଡାକରା ଦେଇଛନ୍ତି, ଯେଉଁଥିରେ ନ୍ୟାୟବିଚାର ତଦନ୍ତ ଓ ରାଜ୍ୟ ଉଚ୍ଚ ଶିକ୍ଷା ମନ୍ତ୍ରୀଙ୍କ ଇସ୍ତଫା ଦାବି କରାଯାଇଛି।
