ବ୍ରହ୍ମପୁର,୧୨ା୨(ସୁବାସ ଚନ୍ଦ୍ର ପାଢ଼ୀ): ମହାରାଜା କୃଷ୍ଣଚନ୍ଦ୍ର ଗଜପତି (ଏମ୍କେସିଜି) ମେଡିକାଲ କଲେଜରେ ଗତ ୯ ତାରିଖ ରାତିରେ ଜଣେ ପ୍ରଥମ ବର୍ଷର ଏମ୍ବିବିଏସ୍ ଛାତ୍ରଙ୍କୁ ର଼୍ୟାଗିଂ କରାଯାଇଥିବା ଅଭିଯୋଗ ହୋଇଛି। ଛାତ୍ର ଜଣଙ୍କ ହଷ୍ଟେଲକୁ ଫେରୁଥିବା ବେଳେ ମେଡିକାଲ ପରିସରରେ ତାଙ୍କୁ ୨ ଜଣ ସିନିୟର ଛାତ୍ର ଆକ୍ରମଣ କରିଛନ୍ତି। ଆକ୍ରମଣର ଶିକାର ହୋଇଥିବା ଛାତ୍ରଜଣଙ୍କ ଏ ନେଇ ବୈଦ୍ୟନାଥପୁର ଥାନା ଓ ଦିଲ୍ଲୀସ୍ଥିତ ଆଣ୍ଟି ର଼୍ୟାଗିଂ ସେଲର ମୁଖ୍ୟାଳୟରେ ପୃଥକ୍ ଭାବେ ଅଭିଯୋଗ କରିବା ପରେ ଆଣ୍ଟି ର଼୍ୟାଗିଂ ସେଲ ପକ୍ଷରୁ ତଦନ୍ତ ଆରମ୍ଭ ହୋଇଛି। ବୈଦ୍ୟନାଥପୁର ଥାନା ପକ୍ଷରୁ ମଧ୍ୟ ୨ ଛାତ୍ରଙ୍କ ବିରୋଧରେ ନଂ.୯୬/୨୪ରେ ଏକ ମାମଲା ରୁଜୁ ହୋଇଛି। ପୋଲିସ ସେମାନଙ୍କୁ ଧାରା ୪୧ ସିଆରପିସିରେ ନୋଟିସ କରିଛି। ଉଭୟଙ୍କୁ ଥାନାରେ ହାଜର ହେବାକୁ କୁହାଯାଇଥିବା ବେଳେ ଘଟଣାର ତଦନ୍ତ ଚାଲିଥିବା ବ୍ରହ୍ମପୁର ଏସ୍ପି ଡ. ସର୍ବଣା ବିବେକ ଏମ. ସୂଚନା ଦେଇଛନ୍ତି। ସେହିପରି ଏମ୍କେସିଜି ଆଣ୍ଟି ର଼୍ୟାଗିଂ ସେଲ୍ ଘଟଣାର ତଦନ୍ତ କରିବାକୁ ପୋଲିସ ପକ୍ଷରୁ କଲେଜର ପ୍ରିନ୍ସିପାଲଙ୍କୁ ଚିଠି ହୋଇଥିବା ସେ କହିଛନ୍ତି।
ଅନ୍ୟପକ୍ଷରେ ପ୍ରଥମ ବର୍ଷ ଛାତ୍ରଙ୍କୁ ହୋଇଥିବା ର଼୍ୟାଗିଂ ଅଭିଯୋଗର ତଦନ୍ତ ହେବ। ଏଥିପାଇଁ ଉଭୟ ପକ୍ଷ ଲିଖିତ ଭାବେ ସେମାନଙ୍କ ପକ୍ଷ ରଖିବେ ବୋଲି ମେଡିକାଲ କଲେଜ ଅଧ୍ୟକ୍ଷ ତଥା ଡିନ୍ ପ୍ରଫେସର ଡା.ସନ୍ତୋଷ କୁମାର ମିଶ୍ର କହିଛନ୍ତି। ପରେ ମେଡିକାଲ କଲେଜର ଆଣ୍ଟି ର଼୍ୟାଗିଂ ସେଲର କମିଟି ଅଭିଯୋଗର ଯାଞ୍ଚ କରିବ। ପ୍ରମାଣକୁ ଆଧାର କରି ପରବର୍ତ୍ତୀ ପଦକ୍ଷେପ ନିଆଯିବ ବୋଲି ସେ କହିଛନ୍ତି। ଦିଲ୍ଲୀସ୍ଥିତ ଆଣ୍ଟି ର଼୍ୟାଗିଂ ସେଲର ମୁଖ୍ୟାଳୟରୁ ଏମ୍କେସିଜି ମେଡିକାଲ କଲେଜ ଅଧ୍ୟକ୍ଷଙ୍କୁ ଘଟଣାର ତଦନ୍ତ କରିବା ପାଇଁ ନିର୍ଦ୍ଦେଶ ଆସିଛି। ଏହି ନିର୍ଦ୍ଦେଶ ପ୍ରକାରେ ଘଟଣାର ତଦନ୍ତ କରାଯିବ ବୋଲି ମେଡିକାଲ କଲେଜ ଅଧ୍ୟକ୍ଷ କହିଛନ୍ତି।
