ପଦ୍ମପୁର,୮।୫(ଡି.ଏନ.ଏ.): ବରଗଡ଼ ଜିଲା ପଦ୍ମପୁର ଉପଖଣ୍ଡରେ ରବିଧାନ ସଂଗ୍ରହ କେବେ ହେବ ସେ ନେଇ ପ୍ରଶାସନିକ ସ୍ତରରେ ଏପର୍ଯ୍ୟନ୍ତ କୌଣସି ନିର୍ଦ୍ଧିଷ୍ଟ ତାରିଖ ଘୋଷଣା ହୋଇନାହିଁ। ଫଳରେ ଚାଷୀମାନେ ଧାନ ଅମଳ କରି ମଣ୍ଡିକୁ ଅପେକ୍ଷା କରିରହିଛନ୍ତି। ପଦ୍ମପୁର, ପାଇକମାଳ, ବିଜେପୁର, ଗାଇସିଲେଟ ବ୍ଲକର ଅନେକ ଚାଷୀଙ୍କ ଧାନ ଅମଳ ହୋଇସାରିଥିବା ବେଳେ ପଦ୍ମପୁର-ବରଗଡ଼ ମୁଖ୍ୟ ରାସ୍ତା, କ୍ଷେତ, ଖଳାରେ ଗଦା ହୋଇଛି। ହଠାତ୍ କାଳବୈଖାଖୀ ଜନିତ ବର୍ଷା ମାଡିଆସୁଥିବାରୁ ଧାନ ନଷ୍ଟ ହେବା ଆଶଙ୍କା ରହିଛି। ସେହିପରି ଆଗକୁ ଲଘୁଚାପ ଓ ବାତ୍ୟା ଭୟ ମଧ୍ୟ ଚାଷୀଙ୍କୁ ଘାରିଛି। ଅନ୍ୟପକ୍ଷେ ହିରାକୁଦ କମାଣ୍ଡ୍ ଏରିଆ ଚାଷୀମାନଙ୍କଠାରୁ ଆସନ୍ତା ୧୦ତାରିଖରୁ ଧାନ ସଂଗ୍ରହ ହେବ ବୋଲି ପ୍ରଶାସନିକ ସ୍ତରରେ ନିଷ୍ପତ୍ତି ହୋଇଛି। ଧାନ ଅମଳ ସତ୍ତ୍ୱେ ବିକ୍ରି ହୋଇ ନ ପାରିବାରୁ ପଦ୍ମପୁର ଉପଖଣ୍ଡ ଚାଷୀ ମହଲରେ ଅସନ୍ତୋଷ ପ୍ରକାଶ ପାଇଛି। ପଦ୍ମପୁର ଉପଖଣ୍ଡ ପାଇଁ ଶୀଘ୍ର ଧାନ ସଂଗ୍ରହ ତାରିଖ ଘୋଷଣା ସହ ଏକର ପ୍ରତି କେତେ ଧାନ ଚାଷୀ ବିକ୍ରି କରିବେ ତାହା ସ୍ପଷ୍ଟ କରିବା ପାଇଁ ଚାଷୀମାନେ ଦାବି କରିଛନ୍ତି। ଏଥର ପଦ୍ମପୁର ଉପଖଣ୍ଡର ୬ଟି ଯାକ ବ୍ଲକ ପଦ୍ମପୁର, ପାଇକମାଳ, ଝାରବନ୍ଧ, ଗାଇସିଲେଟ, ସୋହେଲା, ବିଜେପୁରରେ ସ୍ବୟଂ ସହାୟକ ଗୋଷ୍ଠୀ ମାଧ୍ୟମରେ ୧୬ଟି କେନ୍ଦ୍ର ଓ ପ୍ରାଥମିକ ସେବା ସମିତି ଦ୍ୱାରା ୩୧ଟି କେନ୍ଦ୍ରରେ ଧାନ ସଂଗ୍ରହ ହେବ ବୋଲି ସହକାରୀ ଯୋଗାଣ ଅଧିକାରୀ ସନ୍ତୋଷ କୁମାର ପଧାନ ସୂଚନା ଦେଇଛନ୍ତି। ତେବେ ମଣ୍ଡି ଖୋଲିବା ନେଇ କୌଣସି ତାରିଖ ସେ ସ୍ପଷ୍ଟ କରିନାହାନ୍ତି। ଏ ସମ୍ପର୍କରେ ଚାଷୀ ନେତା ରମେଶ ମହାପାତ୍ର କହିଛନ୍ତି, ସରକାରଙ୍କ ଧାନକିଣା ଏକ ଫାର୍ସରେ ପରିରତ ହୋଇଛି। ଏଯାଏ ପଦ୍ମପୁର ଉପଖଣ୍ଡରେ କେବେ ଧାନକିଣା ହେବ ଓ ଟୋକନ ଜେନେରେଟ ହେବ ସେ ନେଇ ସରକାର ସ୍ପଷ୍ଟ ନ କରିବା ଦୁର୍ଭାଗ୍ୟଜନକ ବୋଲି ମହାପାତ୍ର କହିଛନ୍ତି।
