ଭୁବନେଶ୍ୱର,୧୯ା୬(ସୁନିତ୍ ମିଶ୍ର): ଓଡ଼ିଶାରେ ଭାରତୀୟ ଜନତା ପାର୍ଟି ସରକାର ଗଠନ କରି ଦୁଇ ବର୍ଷ ପୂରଣ କରିଥିବା ବେଳେ ରାଜ୍ୟ ପ୍ରଶାସନରେ ନୂଆ ଏବଂ ଗମ୍ଭୀର ପ୍ରଶ୍ନବାଚୀ ସୃଷ୍ଟି ହୋଇଛି। ସରକାର ବଦଳିବା ପରେ ପୂର୍ବ ସରକାରଙ୍କ ସମୟରେ ଜନସାଧାରଣଙ୍କ ଟିକସ ଟଙ୍କାରେ ଗଢ଼ି ଉଠିଥିବା ବହୁ କୋଟି ଟଙ୍କାର ‘ଡିଜିଟାଲ ସମ୍ପତ୍ତି’ଗୁଡ଼ିକ କ’ଣ ହେଲା ଏବଂ ସେଗୁଡ଼ିକର ହସ୍ତାନ୍ତର ପ୍ରକ୍ରିୟା ଠିକ୍ ଭାବେ ହୋଇଛି କି ନାହିଁ, ସେନେଇ କୌଣସି ସ୍ପଷ୍ଟ ସୂଚନା ମିଳୁନାହିଁ। ଏହାର ସବୁଠାରୁ ବଡ଼ ଉଦାହରଣ ଦେଖିବାକୁ ମିଳିଛି ଭାରତର ଅନ୍ୟତମ ବୃହତ୍ ଆଞ୍ଚଳିକ ସୋସିଆଲ ମିଡିଆ ପ୍ଲାଟ୍ଫର୍ମ ‘ଡେଲିହଣ୍ଟ’ରେ। ପୂର୍ବରୁ ବିଜେଡି ସରକାର ସମୟରେ ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସରକାରୀ ପ୍ରଚାର ପାଇଁ ‘ସିଏମ୍ଓ ଓଡ଼ିଶା’ ନାମରେ ଏକ ଭେରିଫାଏଡ୍ ଡେଲିହଣ୍ଟ୍ ଆକାଉଣ୍ଟ ତିଆରି କରାଯାଇଥିଲା। ୨୦୨୪ ନିର୍ବାଚନ ପରେ ରାଜ୍ୟରେ ଭାଜପା ଶାସନକୁ ଆସିଲା ଏବଂ ନବୀନ ପଟ୍ଟନାୟକ ବିରୋଧୀ ଦଳ ନେତା (ଏଲ୍ଓପି) ହେଲେ। ଆଶ୍ଚର୍ଯ୍ୟର କଥା ହେଉଛି, ପୂର୍ବର ସରକାରୀ ‘ସିଏମ୍ଓ ଓଡ଼ିଶା’ ଆକାଉଣ୍ଟଟି ବର୍ତ୍ତମାନ ‘ଅଫିସ୍ ଅଫ୍ ଏଲ୍ଓପି ଓଡ଼ିଶା’ ନାମରେ ପରିଚାଳିତ ହେଉଛି, ଯାହାର ଫଲୋଅର୍ସ ସଂଖ୍ୟା ପ୍ରାୟ ୧୬ ଲକ୍ଷରୁ ଅଧିକ। ଯଦି ଏହା ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟର ଏକ ସରକାରୀ ଡିଜିଟାଲ ଆକାଉଣ୍ଟ ଥିଲା, ତେବେ ଏହା କୌଣସି ସରକାରୀ ସ୍ପଷ୍ଟୀକରଣ କିମ୍ବା ଆନୁଷ୍ଠାନିକ ପ୍ରକ୍ରିୟା ବିନା ବିରୋଧୀ ଦଳ ନେତାଙ୍କ ବ୍ୟକ୍ତିଗତ/ଦଳୀୟ ଆକାଉଣ୍ଟରେ କିଭଳି ପରିଣତ ହେଲା ବୋଲି ପ୍ରଶ୍ନ ଉଠୁଛି। ସେହିପରି ସରକାରୀ ପ୍ଲାଟଫର୍ମ ଜରିଆରେ ଗଢ଼ାଯାଇଥିବା ଏହି ଜନସମ୍ପର୍କର ନିୟନ୍ତ୍ରଣ ବର୍ତ୍ତମାନ କାହା ହାତରେ ରହିଛି ବୋଲି ମଧ୍ୟ ପ୍ରଶ୍ନ ଉଠିବା ସ୍ବାଭାବିକ।
ଡେଲିହଣ୍ଟ୍ ପ୍ଲାଟଫର୍ମ ଓଡ଼ିଶାରେ ପ୍ରାୟ ୭୦ ଲକ୍ଷରୁ ୧ କୋଟି ଲୋକଙ୍କ ପାଖରେ ପହଞ୍ଚିଥାଏ, କାରଣ ଅଧିକାଂଶ ଆଣ୍ଡ୍ରଏଡ୍ ସ୍ମାର୍ଟଫୋନ୍ରେ ଏହା ପୂର୍ବରୁ ହିଁ ସଂଯୁକ୍ତ ହୋଇ ରହିଥାଏ। ରାଜ୍ୟ ସରକାରଙ୍କ ସୂଚନା ଓ ଲୋକସମ୍ପର୍କ ବିଭାଗର ଡେଲିହଣ୍ଟ୍ ହ୍ୟାଣ୍ଡେଲ୍ରେ ମଧ୍ୟ ପ୍ରାୟ ୧୫ ଲକ୍ଷ ଫଲୋଅର୍ସ ଅଛନ୍ତି। କିନ୍ତୁ ଆଶ୍ଚର୍ଯ୍ୟର ବିଷୟ, ୨୦୨୫ ଜୁଲାଇ ୨୫ ପରଠାରୁ ଏହି ଆକାଉଣ୍ଟରେ କୌଣସି ନୂଆ ସୂଚନା ବା ଅପଡେଟ୍ ଦିଆଯାଇନାହିଁ। ଏହି ଦୁଇଟିଯାକ ଆକାଉଣ୍ଟକୁ ମିଶାଇଲେ ପ୍ରାୟ ୩୦ ଲକ୍ଷରୁ ଅଧିକ ଜନସାଧାରଣଙ୍କ ଏକ ବିଶାଳ ଡିଜିଟାଲ ସ୍ରୋତ ରହିଛି। ମାତ୍ର ଗୋଟିଏ ଆକାଉଣ୍ଟର ପରିଚୟ ବଦଳିଯିବା ଏବଂ ଅନ୍ୟଟି ବର୍ଷେ ଧରି ନିଷ୍କ୍ରିୟ ରହିବା ସ୍ପଷ୍ଟ କରୁଛି ଯେ, ରାଜ୍ୟ ସରକାର ସେମାନଙ୍କର ଡିଜିଟାଲ ସମ୍ପତ୍ତିର ଠିକ୍ ଅଡିଟ କିମ୍ବା ଦାୟିତ୍ୱ ଗ୍ରହଣ ପ୍ରକ୍ରିୟା କରିନାହାନ୍ତି।
ରାଜ୍ୟ ପ୍ରଶାସନରେ ସମ୍ପତ୍ତି ଏବଂ ସରକାରୀ ସେଭିଂସ୍ର ଅବହେଳା କେବଳ ଡିଜିଟାଲ ଦୁନିଆରେ ସୀମିତ ନାହିଁ। ପୂର୍ବ ସରକାର ସମୟର ସ୍ବାମୀ ଲକ୍ଷ୍ମଣାନନ୍ଦ ସରସ୍ବତୀ ହତ୍ୟାକାଣ୍ଡ ଏବଂ ସମ୍ ହସ୍ପିଟାଲ ଅଗ୍ନିକାଣ୍ଡଜନିତ ଗୁରୁତ୍ୱପୂର୍ଣ୍ଣ ତଦନ୍ତ ରିପୋର୍ଟ ସିଏମ୍ଓ କାର୍ଯ୍ୟାଳୟରୁ ଗାଏବ ହୋଇଯାଇଥିବା ନେଇ ଗୃହ ବିଭାଗ ଥାନାରେ ଏଫ୍ଆଇଆର୍ ଦାଏର କରିଛି। ଅନ୍ୟପଟେ ନିକଟରେ ଉଚ୍ଚଶିକ୍ଷା ବିଭାଗ ପକ୍ଷରୁ ସୋସିଆଲ ମିଡିଆରେ ଜାରି କରାଯାଇଥିବା ସରକାରୀ ବିଜ୍ଞାପନରେ କୃତ୍ରିମ ବୁଦ୍ଧିମତ୍ତା (ଏଆଇ)ର ବ୍ୟବହାର କରାଯାଇ ଓଡ଼ିଶାର ସରକାରୀ ପ୍ରତୀକ ବା ରାଜ୍ୟ ଲୋଗୋକୁ ସମ୍ପୂର୍ଣ୍ଣ ବିକୃତ ରୂପେ ପ୍ରଦର୍ଶନ କରାଯାଇଥିଲା, ଯାହାକୁ ନେଇ ବିବାଦ ଦେଖାଦେଇଥିଲା।
ଆଜିର ଆଧୁନିକ ଯୁଗରେ ସରକାରୀ ସମ୍ପତ୍ତି କହିଲେ କେବଳ ସରକାରୀ କୋଠାବାଡ଼ି, ଗାଡ଼ି କିମ୍ବା କାଗଜ ଫାଇଲ୍କୁ ବୁଝାଏନାହିଁ। ଜନସାଧାରଣଙ୍କ ଅର୍ଥରେ ତିଆରି ହୋଇଥିବା ସରକାରୀ ୱେବ୍ସାଇଟ୍, ସୋସିଆଲ ମିଡିଆ ଆକାଉଣ୍ଟ, ମୋବାଇଲ ଆପ୍ସ, ଡିଜିଟାଲ ଆର୍କାଇଭ ଏବଂ ବହୁ କୋଟି ଫଲୋଅର୍ସଙ୍କ ଗ୍ରୁପ୍ ମଧ୍ୟ ସରକାରଙ୍କ ମୂଲ୍ୟବାନ ସମ୍ପତ୍ତି। ଏଗୁଡ଼ିକର ମାଲିକାନା କେଉଁ ବିଭାଗ ପାଖରେ ରହିବ, ସରକାର ବଦଳିଲେ ଏହାର ହସ୍ତାନ୍ତର କିଭଳି ହେବ, ସେଥିପାଇଁ ଏକ କେନ୍ଦ୍ରୀୟ ତାଲିକା ଏବଂ ନିର୍ଦ୍ଦିଷ୍ଟ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର ରହିବା ନିହାତି ଜରୁରୀ। ସରକାର ବଦଳିବାର ଦୁଇ ବର୍ଷ ପରେ ଓଡ଼ିଶାର ଜନସାଧାରଣ ଏହି ସବୁ ପ୍ରଶ୍ନର ଠିକ୍ ଉତ୍ତର ଚାହାନ୍ତି।
