ଭୁବନେଶ୍ୱର, ୧୭।୧(ବ୍ୟୁରୋ): କରୋନା ପାଇଁ ଶିକ୍ଷା ବ୍ୟବସ୍ଥା ଗୁରୁତର ପ୍ରଭାବିତ ହୋଇଛି। ଏପରିସ୍ଥିତିରେ ଏ କ୍ଷେତ୍ରରେ ସଂସ୍କାର ଆଣିବାକୁ ଲକ୍ଷ୍ୟ ରଖିଛି ବିଦ୍ୟାଳୟ ଓ ଗଣଶିକ୍ଷା ବିଭାଗ। ଗୁଣାତ୍ମକ ଶିକ୍ଷା ବ୍ୟବସ୍ଥାର ସୁଦୃଢ଼ୀକରଣ ସହ ପିଲାଙ୍କ ବୌଦ୍ଧିକ ବିକାଶ ପାଇଁ ପଦକ୍ଷେପ ନିଆଯିବ। ସରକାର ରାଜ୍ୟବ୍ୟାପୀ ଅଷ୍ଟମ ଶ୍ରେଣୀ ଲାଗି ୧୪,୬୦୧ ସ୍କୁଲରେ ଅତିରିକ୍ତ ଶ୍ରେଣୀ କକ୍ଷ ଖୋଲିବାକୁ ନିଷ୍ପତ୍ତି ନେଇଥିବାବେଳେ ବର୍ତ୍ତମାନ ସୁଦ୍ଧା ୧୩,୮୨୩ଟି ସ୍କୁଲରେ ନିର୍ମାଣ ଶେଷ ହୋଇଛି। ୪୬୮ଟି ସ୍କୁଲରେ ନିର୍ମାଣ ଚାଲିଥିବାବେଳେ ବଳକା ୩୧୦ଟି ସ୍କୁଲରେ ଖୁବ୍ଶୀଘ୍ର କାର୍ଯ୍ୟ ଆରମ୍ଭ ହେବ ବୋଲି ଜଣାପଡ଼ିଛି। ଏହାବ୍ୟତୀତ ସମସ୍ତ ସ୍କୁଲରେ ଭ୍ରାମ୍ୟମାଣ ବିଜ୍ଞାନ ପ୍ରଦର୍ଶନୀ ସହ ୭୫୦ ସ୍କୁଲରେ ୱାଲ୍ ପେଣ୍ଟିଂ କରାଯାଇ ଶୈକ୍ଷିକ ପରିବେଶକୁ ଆକର୍ଷଣୀୟ କରାଯିବ।
ବିଭାଗର ଜଣେ ବରିଷ୍ଠ ଅଧିକାରୀଙ୍କ କହିବାନୁସାରେ, ରାଜ୍ୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ମୋଟ୍ ୬୫,୨୭୯ ସ୍କୁଲ ରହିଛି। ସେଥିମଧ୍ୟରୁ ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ୩୬,୦୭୦ ସ୍କୁଲ ଥିବାବେଳେ ୨୨,୦୧୯ ଉଚ୍ଚ ପ୍ରାଥମିକ ସ୍କୁଲ ରହିଛି। ଚଳିତବର୍ଷଠାରୁ ସବୁ ସ୍କୁଲରେ ପିଲାଙ୍କୁ ଦକ୍ଷତା ପ୍ରମାଣପତ୍ର ଦିଆଯିବ। ପ୍ରଥମ ଓ ଦ୍ୱତୀୟ ଶ୍ରେଣୀରେ ସର୍ବାଧିକ ମାର୍କ ରଖିଥିବା ୧୨,୧୭,୮୪୮ ପିଲାଙ୍କୁ ପୋଗ୍ରେସ ରିପୋର୍ଟ, ଲର୍ନିଂ କିଟ୍ ଏବଂ ୱାର୍କ ବୁକ୍ ପ୍ରଦାନ କରାଯିବ। ସେହିଭଳି କେବଳ ଅଷ୍ଟମ ଶ୍ରେଣୀର ୫୨,୨୯୭ଜଣ ପିଲାଙ୍କୁ ଗଣିତ ଏବଂ ବିଜ୍ଞାନ କିଟ୍ ପ୍ରଦାନ କରାଯିବ। ଏଥିପାଇଁ ସମଗ୍ର ଶିକ୍ଷା ଯୋଜନାରେ ମିଳିଥିବା ଅନୁଦାନରୁ ଅର୍ଥ ଖର୍ଚ୍ଚ କରାଯିବ। ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଯେଉଁ ଛାତ୍ରୀଛାତ୍ର ୬୦ପ୍ରତିଶତରୁ ଅଧିକ ମାର୍କ ରଖିବେ ସେମାନଙ୍କୁ ଏହି ସୁବିଧା ପ୍ରଦାନ କରାଯିବ।
ସେପଟେ ରାଜ୍ୟରେ ସବୁ ସ୍କୁଲରେ ବ୍ୟାପକ ପରିବର୍ତ୍ତନ ଆଣିବାକୁ ବିଭାଗ ଲକ୍ଷ୍ୟ ରଖିଛି। ମାସକରେ ୨ଥର ସମୀକ୍ଷା ବୈଠକ ଓ ଜିଲାସ୍ତରରେ ୪ ଥର ସମୀକ୍ଷା ବୈଠକ ଆୟୋଜନ କରାଯାଉଛି। ଶିକ୍ଷା ବ୍ୟତୀତ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପିଲାଙ୍କ ବିଜ୍ଞାନ ଦକ୍ଷତା ବୃଦ୍ଧି ଲାଗି ଖୁବ୍ଶୀଘ୍ର ଭ୍ରାମ୍ୟମାଣ ପ୍ରଦର୍ଶନର ଆୟୋଜନ କରାଯିବ। ସେହିପରି ଷଷ୍ଠରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଛାତ୍ରଙ୍କୁ ସ୍ବତନ୍ତ୍ର କ୍ରୀଡ଼ା ପ୍ରଶିକ୍ଷଣ ପ୍ରଦାନ କରାଯିବ। ଚିତ୍ର ମାଧ୍ୟମରେ ପିଲାଙ୍କୁ ଶିକ୍ଷାଦାନ ଲାଗି ରାଜ୍ୟର ୭୫୦ ସ୍ବତନ୍ତ୍ର ସ୍କୁଲରେ ୱାଲ୍ ପେଣ୍ଟିଂ କରାଯିବ, ଯେଉଁଥିରେ ଗଣିତ ଏବଂ ବିଜ୍ଞାନର ସୂତ୍ର ଦେଖିବାକୁ ମିଳିବ।
