ଓ୍ବାର୍ସା,୨୬ା୨: ରୁଷିଆ ରାଷ୍ଟ୍ରପତି ଭ୍ଲାଡିମିର୍ ପୁଟିନ୍ ବିଶ୍ୱ ନେତାମାନଙ୍କୁ ଖୋଲାଖୋଲି ଭାବେ ଆଣବିକ ଅସ୍ତ୍ର ବ୍ୟବହାର କରିବାର ଭୟ ଦେଖାଇଛନ୍ତି। ୟୁକ୍ରେନ୍ ଉପରେ ରୁଷିଆର ଆକ୍ରମଣ ରୋକିବାକୁ କୌଣସି ରାଷ୍ଟ୍ର ଯଦି ସାମରିକ ଶକ୍ତି ବ୍ୟବହାର କରିବାର ଦୁଃସାହସ କରେ ତେବେ ତାଙ୍କ ପାଖରେ ଆଣବିକ ଅସ୍ତ୍ର ରହିଛି ବୋଲି ପୁଟିନ୍ ଚେତାବନୀ ଦେଇଛନ୍ତି। ହୁଏତ ଏହା ରୁଷିଆ ରାଷ୍ଟ୍ରପତିଙ୍କ ଫାଙ୍କା ଧମକ ହୋଇପାରେ। ତେବେ ତାଙ୍କର ଏଭଳି ମନ୍ତବ୍ୟରୁ ୟୁକ୍ରେନ୍ ଆକ୍ରମଣ ଆଣବିକ ଯୁଦ୍ଧର ରୂପ ନେଇପାରେ ବୋଲି ଆଶଙ୍କା ପ୍ରକାଶ ପାଇଛି।
ରୁଷ ବିଭାଜିତ ହେବା ସତ୍ତ୍ୱେ ରୁଷିଆ ଏବେ ଅନ୍ୟତମ ସବୁଠୁ ଶକ୍ତିଶାଳୀ ଆଣବିକ ଶକ୍ତିସମ୍ପନ୍ନ ରାଷ୍ଟ୍ର ଭାବେ ରହିଆସିଛି ବୋଲି ଗୁରୁବାର ୟୁକ୍ରେନ୍ ଆକ୍ରମଣ ପୂର୍ବରୁ ପୁଟିନ୍ ଉଦ୍ବୋଧନ ଦେଇ କହିଥିଲେ। ସେ କହିଥିଲେ, ମସ୍କୋ ପାଖରେ ଅନେକ ଅତ୍ୟାଧୁନିକ ଅସ୍ତ୍ରଶସ୍ତ୍ର ରହିଛି। ତେଣୁ କେହି ଏହା ଉପରେ ଆକ୍ରମଣ ଉଦ୍ୟମ କଲେ ପରାସ୍ତ ହେବା ନିଶ୍ଚିତ ଏଥିରେ ସନ୍ଦେହ ନାହିଁ। ରୁଷିଆ ଉପରେ ସିଧାସଳଖ ଆକ୍ରମଣର ପରିଣାମ ଭୟାବହ ହେବ ବୋଲି ପୁଟିନ୍ ଚେତାବନୀ ଦେଇଥିଲେ।
