ଜଗତ୍ସିଂହପୁର ଅଫିସ, ୯ା୧: ଜଗତ୍ସିଂହପୁର ଜିଲା ମୁଖ୍ୟାଳୟରେ ରବିବାର ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଛି। ସହରର ଗୋପାଳସାଗର ଓ କଲେଜ ଛକ ଅଞ୍ଚଳରେ ଏକ ବୁଲା କୁକୁର ଇତସ୍ତତ ଭାବେ ଧାଉଁଥିଲା। କେତେବେଳେ କାନ୍ଥରେ ତ କେତେବେଳେ ପାଚେରିରେ ପିଟି ହୋଇ ଯାଉଥିଲା। କେହି ତା’ପାଖକୁ ଗଲେ ସେ ବିଚଳିତ ହୋଇ ଯୁଆଡେ ପାରୁଥିଲା ଧାଉଁଥିଲା। ପାଖାପାଖି ୪ ଦିନ ପୂର୍ବରୁ କୁକୁରଟିର ମୁଣ୍ଡ କୌଣସିମତେ ଏକ ପ୍ଲାଷ୍ଟିକ ଡବା ଭିତରେ ପଶି ଯାଇଥିବାରୁ ସେ ଭୟଭୀତ ହୋଇ ଏଣେତେଣେ ଧାଉଁଥିଲା। ଲୋକେ ଏହା ଦେଖି ତାକୁ ବଞ୍ଚାଇବା ପାଇଁ ଧରିବାକୁ ଚେଷ୍ଟା କରିଛନ୍ତି। କିନ୍ତୁ ଧରିବା ସମ୍ଭବ ହେଉନି। ଏକପଟେ ଖାଦ୍ୟପେୟ ନ ଥିବାବେଳେ ଅନ୍ୟପଟେ ଜୀବନ ପ୍ରତି ଭୟ କୁକୁରଟିର ମାନସିକ ସ୍ଥିତିକୁ ଦୋହଲାଇ ଦେଇଛି। ଉକ୍ତ କୁକୁରର ଏଭଳି ଅବସ୍ଥା କିଏ କଲେ କି ଆକସ୍ମିକ ଥିଲା ତାହା ଏ ପର୍ଯ୍ୟନ୍ତ ସ୍ପଷ୍ଟ ହୋଇ ପାରିନାହିଁ। କିନ୍ତୁ ତାର ଗତିବିଧି ଅନୁଧ୍ୟାନ ପରେ ଲୋମ ଟାଙ୍କୁରୀ ଉଠିଥିଲା।
ରବିବାର କୁକୁରଟି ଗୋପାଳସାଗର କେନାଲ ରାସ୍ତାରେ କଲେଜ ଛକ ଆଡକୁ ଧାଉଁଥିବାବେଳେ ହଠାତ୍ ଗଣେଶ ମନ୍ଦିର ନିକଟରେ ଅଟକି ପୁଣି ପଛକୁ ମୁହଁ କରି ଚାଲିଯିବା ପାଇଁ ଚେଷ୍ଟା କରୁଥିଲା। ଏହି ସମୟରେ ଗୋପାଳସାଗର ପଟୁ ଏକ ଅଟୋ ଆସୁଥିବା ଦେଖି ହଠାତ୍ ବିଚଳିତ ହୋଇଯାଇଥିଲା। ଶେଷରେ ଚଳନ୍ତି ଅଟୋ ଚକା ତଳକୁ ଚାଲି ଯାଇଥିଲା। ଗାଡ଼ିର ଚକା ଚଢି ତା’ଉପରେ ଯାଇଥିଲେ ସୁଦ୍ଧା ସେ ସୋଭାଗ୍ୟବଶତଃ ବଞ୍ଚତ୍ ଯାଇଥିଲା। ସଙ୍ଗେ ସଙ୍ଗେ ବାହାରି ପୁଣି ଧାଇଁଥିଲା। ଏହି ସମୟରେ ଏକ ବିଦ୍ୟୁତ ଖୁଣ୍ଟରେ ମଧ୍ୟ ପିଟି ହୋଇ ଯାଇଥିଲା। ତା ପରେ ଚିତ୍କାର କରି ପାର୍ଶ୍ୱ ବଣୁଆ ସ୍ଥାନକୁ ଧାଇଁଥିଲା। ଏହି ସମୟରେ ଉପସ୍ଥିତ ଲୋକେ କୁକୁରଟିର କଣ ହେଲା ଜାଣିବା ପାଇଁ ପିଛା କରିଥିଲେ ସୁଦ୍ଧା ସନ୍ଧାନ ପାଇ ନ ଥିଲେ। ଏ ସମ୍ପର୍କରେ କେତେଜଣ ବ୍ୟକ୍ତି କହିଛନ୍ତି, କୁକୁରଟି କୌଣସି ସ୍ଥାନରେ ପଡିଥିବା ପ୍ଲାଷ୍ଟିକ ଡବାରେ ଖାଦ୍ୟ ଦେଖି ଖାଇବା ପାଇଁ ମୁହଁ ପୁରାଇ ଦେଇଥାଇ ପାରେ ବୋଲି ଅନୁମାନ କରାଯାଉଛି। ହେଲେ ତା ପରେ ମୁଣ୍ଡ ନ ବାହାରିବାରୁ ଏଭଳି ପରିସ୍ଥିତି ସୃଷ୍ଟି ହୋଇଛି। ଏ ସମ୍ପର୍କରେ ଜିଲା ମୁଖ୍ୟ ପ୍ରାଣୀ ଚିକିତ୍ସା ଅଧିକାରୀ (ସିଡିଭିଓ) ବୀର କିଶୋର ପରିଡ଼ା
କହିଛନ୍ତି, ସେ ଆନିମଲ ହେଲ୍ପଲାଇନ୍ ୧୯୬୨କୁ ଫୋନ କରିବାକୁ କହିଥିଲେ। ଏହାପରେ ୧୯୬୨କୁ ଫୋନ କରାଯିବାରୁ ଏହି ସେବା ସେମାନେ କରିପାରିବେ ନାହିଁ ବୋଲି ଉତ୍ତର ଆସିଥିଲା। କେବଳ ଲୋକେ କୁକୁରକୁ ଧରି ପ୍ରାଣୀ ଚିକିତ୍ସାଳୟ ନେଲେ ସେଠାରେ ପ୍ରତିକାର ବ୍ୟବସ୍ଥା କରାଯାଇ ପାରିବ ବୋଲି କୁହାଯାଇଥିଲା। ସୌଭାଗ୍ୟ ଜଗତ୍ସିଂହପୁରରେ ଥିବା ଆନିମଲ ହେଲ୍ପଲାଇନ୍ କର୍ମକର୍ତ୍ତାମାନେ ସହଯୋଗର ହାତ ବଢ଼ାଇଥିଲେ। ସେମାନେ ସନ୍ଧ୍ୟାରେ କୁକୁରଟିର ସନ୍ଧାନ ପାଇଁ ଚେଷ୍ଟା କରିଥିଲେ ସୁଦ୍ଧା ତାର ପତ୍ତା ମିଳି ନ ଥିଲା। ସୋମବାର ପୁଣିଥରେ ଚେଷ୍ଟା କରାଯିବ ବୋଲି ସୂଚନା ଦିଆଯାଇଛି।
