ଲେଫ୍ରିପଡ଼ା,୭।୧(ଡ଼ି.ଏନ.ଏ.): ସୁନ୍ଦରଗଡ଼ ଜିଲା ଲେଫ୍ରିପଡ଼ା ବ୍ଲକ ଅନ୍ତର୍ଗତ ରାଏଡିହି ପଞ୍ଚାୟତର ଚନ୍ଦଲୀପାହାଡ଼ରେ ଥିବା ଶକ୍ତିପୀଠରେ ଶୁକ୍ରବାର ପୁଷପୁନି ଯାତ୍ରା ଅନୁଷ୍ଠିତ ହୋଇଛି। ଆୟୋଜିତ ଯାତ୍ରାରେ ପଡ଼ୋଶୀ ଝାରସୁଗୁଡ଼ା ଜିଲା ସହ ଛତିଶଗଡ଼ ରାଜ୍ୟର ବିଭିନ୍ନ ଗ୍ରାମ ସମେତ ଅଞ୍ଚଳର ହଜାର ହଜାର ଶ୍ରଦ୍ଧାଳୁଙ୍କ ସମାଗମ ହୋଇଥିଲା। ମାନସିକ ପୂରଣ ସକାଶେ ଶକ୍ତିପୀଠରେ ବହୁ ସଂଖ୍ୟାରେ ଶ୍ରଦ୍ଧାଳୁ ବୋଦା, କୁକୁଡ଼ା ବଳି ପ୍ରଦାନ କରିଥିଲେ। ଭିଡ଼କୁ ନେଇ ପୋଲିସ ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଥିଲା। ପାହାଡ଼ ଉପରେ ଥିବା ମନ୍ଦିରକୁ ଯିବା ପାଇଁ ଶ୍ରଦ୍ଧାଳୁଙ୍କୁ ସାହାଯ୍ୟ ସକାଶେ ସର୍ଗିପାଲି, ଦର୍ଲିପାଲି ମହାବିଦ୍ୟାଳୟର ଛାତ୍ରୀଛାତ୍ର ସହଯୋଗ କରିଥିଲେ। ମା’ ଚନ୍ଦଲୀପାଟ କ୍ଲବ ଚନ୍ଦଲୀ, ରାଏବଗା ପୂଜା କମିଟି ପକ୍ଷରୁ ଭିନ୍ନ ଭିନ୍ନ ଭାବେ ଜନସାଧାରଣଙ୍କୁ ସେବା ପ୍ରଦାନ କରାଯାଇଥିଲା। ଚନ୍ଦଲୀ ଶକ୍ତିପୀଠର କିମ୍ବଦନ୍ତୀ ଅନୁଯାୟୀ ଆବାହମାନ କାଳରେ ସେହି ପାହାଡ଼ର ତଳେ ଏକ ସ୍ଥାନରେ ପୂଜକ ପୂଜା କରୁଥିଲେ। ପୂଜକ ଜଣକ ପୂଜା କାର୍ଯ୍ୟ ସାରି ଘରକୁ ଫେରୁଥିବା ସମୟରେ ପୂଜା ଗଡୁଟିକୁ ଭୂଲି ଯିବାରୁ ପୁଣି ପୂଜା ସ୍ଥଳକୁ ଫେରିଥିଲେ। ପୂଜାସ୍ଥଳରେ ଦେବତାଙ୍କ ସମାବେଶ ହୋଇଥିବାବେଳେ ପୂଜାରୀ ଜଣକ ପୂଜାଗଡୁଟି ନେବା ପାଇଁ ଅନୁରୋଧ କରିଥିଲେ। ସେତେବେଳେ ଦେବତାମାନେ ପୂଜାରୀ ଉପରେ ରାଗିଯାଇ ପୂଜାଗଡୁଟି ଫିଙ୍ଗିଦେଇଥିଲେ। ଗଡୁଟି ଯାଇ ଚନ୍ଦଲୀପାହାଡ଼ ଉପରେ ପଡିଥିଲା। ସେହି ଜାଗାରେ ପଥରରେ ଏକ ଗର୍ତ୍ତ ସୃଷ୍ଟି ହୋଇଗଲା। ଗଡୁଟିକୁ ନେଇ ପୂଜାରୀ ଜଣକ ଘରକୁ ଫେରିଥିଲେ। ପାହାଡ଼ ଉପରେ ଗଡୁଟି ପଡ଼ିଥିବା ସ୍ଥାନରେ ପୂଜା କରିବା ପାଇଁ ପୂଜାରୀଙ୍କୁ ରାତ୍ରିରେ ସ୍ବପ୍ନାଦେଶ ହୋଇଥିଲା। ପରବର୍ତ୍ତୀ ସମୟରୁ ସେହି ସ୍ଥାନରେ ପୂଜାପାଠ ହେଉଥିବା ଜଣାପଡିଛି। ପାହାଡ଼ ଉପରେ ଚନ୍ଦଲୀଶକ୍ତି ପୀଠ ଅବହେଳିତ ଭାବେ ରହିଥିବାରୁ ଗତ ୨୦୧୭ରେ ନୂଆଡ଼ିହି ଗ୍ରାମର ଅଶୋକ କୁମାର ପଟେଲ ଏକ ମନ୍ଦିର ନିର୍ମାଣ କରିଛନ୍ତି। ଏହି ଶକ୍ତିପୀଠ ବହୁ ସଂଖ୍ୟାରେ ଶ୍ରଦ୍ଧାଳୁଙ୍କ ବିଶ୍ୱାସ ଭାଜନ ହେଉଥିବାରୁ ବର୍ତ୍ତମାନ ପ୍ରାୟତଃ ସବୁ ସମୟରେ ଭିଡ଼ ରହୁଛି। ଅନ୍ୟପକ୍ଷରେ ଶକ୍ତିପୀଠଟି ଅବହେଳିତ ଭାବେ ରହିଥିବାରୁ ସ୍ଥାନୀୟ ଜିଲା ପ୍ରଶାସନ ଏହାର ଉନ୍ନତିକରଣ କରିବା ସକାଶେ ଅଞ୍ଚଳବାସୀଙ୍କ ପକ୍ଷରୁ ଦାବି ହେଉଛି।
