ପୁରୁଣା ଭୁବନେଶ୍ୱର,୩୦ା୯(ଡି.ଏନ୍.ଏ.): ଆଉ ଦିନ କେଇଟା ପରେ ଦୁର୍ଗାପୂଜା। ଏଥିପାଇଁ ଚଳଚଞ୍ଚଳ ରାଜଧାନୀ। ବିଭିନ୍ନ ପୂଜା କମିଟି ପକ୍ଷରୁ ପ୍ରସ୍ତୁତି ପର୍ବ ଶେଷ ପର୍ଯ୍ୟାୟରେ ପହଞ୍ଚିଛି। ମା’ଙ୍କ ପାଇଁ ସୁଦୃଶ୍ୟ ମଣ୍ଡପ ଓ ତୋରଣ କରି ଆଗରେ ରହିବାକୁ ବିଭିନ୍ନ କମିଟି ପକ୍ଷରୁ ଚାଲିଛି ପ୍ରତିଯୋଗିତା। ଏହି କ୍ରମରେ କୈବର୍ତ୍ତ ସାହି ଦୁର୍ଗାପୂଜା ସମିତି ପ୍ରସ୍ତୁତି ଜୋରଦାର ଚଳାଇଛି। ୧୯୫୫ ମସିହାରେ ୫ରୁ୧୦ଜଣ ବାସିନ୍ଦାକୁ ନେଇ ଏଠାରେ ଆରମ୍ଭ ହୋଇଥିଲା ଦୁର୍ଗାପୂଜା। ଉକ୍ତ ବର୍ଷ ମଣ୍ଡପରେ ହରପାର୍ବତୀଙ୍କ ମୂଣ୍ମୟୀ ମୂର୍ତ୍ତି ପୂଜା ପାଇଥିଲେ। ୫ବର୍ଷ ପରେ ଏହି ମଣ୍ଡପରେ ରାମ, ଲକ୍ଷ୍ମଣ ଏବଂ ସୀତାଙ୍କ ମୂର୍ତ୍ତି ସ୍ଥାପନା କରାଯାଇ ପୂଜାର୍ଚ୍ଚନା କରାଯାଇଥିଲା। ଏହାର ୬ ବର୍ଷ ପରେ ମଣ୍ଡପରେ ମା’ଦୁର୍ଗାଙ୍କ ପ୍ରତିମୂର୍ତ୍ତି ଆବାହନା କରାଯାଇଥିଲା। ସେହିଦିନଠାରୁ ପ୍ରତ୍ୟେକ ବର୍ଷ ଏଠାରେ ଦୁର୍ଗାପୂଜା ପାଳିତ ହୋଇଆସୁଅଛି। ଏବେ ସମିତିରେ ୧୦୦ଜଣ ସଭ୍ୟ ରହିଛନ୍ତି। ଚଳିତବର୍ଷ ମା’ଙ୍କ ମୃଣ୍ମୟୀ ମୂର୍ତ୍ତିର ଉଚ୍ଚତା ୧୫ ଫୁଟ ରହିବ। ପୂଜା ପାଇଁ ୁ ୭ଲକ୍ଷ ଟଙ୍କା ବ୍ୟୟ ଅଟକଳ କରାଯାଇଛି। ଏଠାରେ ୪୦ଫୁଟ ଉଚ୍ଚତା ଏବଂ ୨୦ଫୁଟ ଓସାରର ମନ୍ଦିରାକୃତି ତୋରଣ ଶୋଭାପାଇବ। ଏଥର ପୂଜାରେ ୭ଲକ୍ଷ ଟଙ୍କା ପର୍ଯ୍ୟନ୍ତ ଖର୍ଚ୍ଚ ହେବା ନେଇ ସମିତି ପକ୍ଷରୁ ଆକଳନ କରାଯାଇଛି। ଷଷ୍ଠୀରେ ବେଲବରଣି, ସପ୍ତମୀରେ ମା’ଙ୍କ ଚକ୍ଷୁଦାନ, ଆଳତି ଏବଂ ପ୍ରାଣ ପ୍ରତିଷ୍ଠା କରାଯିବ। ଅଷ୍ଟମୀରେ ଯୋଗିନୀ ପୂଜା, ଡାଲା ଭୋଗ ଏବଂ ସେହିଦିନ ଅପରାହ୍ନରେ ଚଣ୍ଡିପାଠ ଓ ଦୀପଦାନ କରାଯିବ। ଦଶମୀରେ ମା’ଙ୍କ ନିକଟରେ ୧୦ପ୍ରକାର ପିଠା ଭୋଗ ଲାଗି ହେବ। ଏଥିସହ ଏକ ହଜାର ଶ୍ରଦ୍ଧାଳୁଙ୍କ ପାଇଁ ଖେଚୁଡ଼ି ବଣ୍ଟାଯିବା ପାଇଁ ସ୍ଥିର ହୋଇଛି। ଭସାଣ ଉତ୍ସବରେ ପାରମ୍ପରିକ ଅଦଲାବାଦ୍ର ଡେମ୍ପନାଗରା, ଘଣ୍ଟ ଏବଂ ପଞ୍ଜାବୀ ଢୋଲକ ମୁଖ୍ୟ ଆକର୍ଷଣ ହେବ।
