ନୂଆଦିଲ୍ଲୀ,୨୪।୯: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ପରେ ଏବେ ପଞ୍ଜାବର ଶକ୍ତି ମନ୍ତ୍ରୀ ଅମନ ଅରୋରାଙ୍କୁ ବିଦେଶ ଯାତ୍ରା ଲଗି କେନ୍ଦ୍ର ସରକାରଙ୍କଠାରୁ ଅନୁମତି ମିଳିପାରିନାହିଁ। ଏହି ପ୍ରସଙ୍ଗରେ ଏବେ ଏଏପି ଏବଂ ଭାଜପା ମଧ୍ୟରେ ବାକ୍ଯୁଦ୍ଧ ତୀବ୍ର ହୋଇଛି। ଭାଜପା ଏଏପିକୁ ଭୟ କରୁଛି, ଏଣୁ ଏହାର ନେତାଙ୍କୁ ଅନୁମତି ଦେଉନାହିଁ ବୋଲି ଅମନ ଆକ୍ଷେପ କରିଛନ୍ତି।
ଶକ୍ତି ମନ୍ତ୍ରୀ ଅମନଙ୍କୁ ଗ୍ରୀନ ହାଇଡ୍ରୋଜେନ୍ ବିଷୟରେ ଜ୍ଞାନର ଆଦାନ ପ୍ରଦାନ ଲାଗି ତିନୋଟି ଦେଶ(ଜର୍ମାନୀ, ବେଲଜିୟମ, ନେଦରଲ୍ୟାଣ୍ଡ) ପରିଦର୍ଶନ କରିବାର ଥିଲା। ଏଥିଲାଗି କେନ୍ଦ୍ରର ନୂତନ ତଥା ନବୀକରଣଯୋଗ୍ୟ ଶକ୍ତି ମନ୍ତ୍ରଣାଳୟର ୧୩ ଜଣିଆ ପ୍ରତିନିଧିଙ୍କୁ ଅନୁମତି ମିଳିଥିଲା। ହେଲେ ବୈଦେଶିକ ବ୍ୟାପାର ମନ୍ତ୍ରଣାଳୟ ପକ୍ଷରୁ ଅମନଙ୍କୁ ଅନୁମତି ମିଳିପାରି ନାହିଁ। ଏହାକୁ ନେଇ ସେ ଭାଜପାକୁ ଟାର୍ଗେଟ କରିଛନ୍ତି।
ଭାଜପା ଭାରତୀୟ ଗଣତନ୍ତ୍ରର ଗୌରବମୟ ପରମ୍ପରାକୁ ଭୁଲି ଯାଇଛି। ଏକଦା ତତ୍କାଳୀନ ପ୍ରଧାନମନ୍ତ୍ରୀ ପି.ଭି. ନରସିଂହ ରାଓ ବିରୋଧୀ ଦଳର ନେତା ହୋଇଥିଲେ ମଧ୍ୟ ମିଳିତ ଜାତିସଂଘରେ ଏକ ପ୍ରତିନିଧୀ ଦଳର ନେତୃତ୍ୱ ନେବାକୁ ଅଟଳ ବିହାରୀ ବାଜପେୟୀଙ୍କୁ ବାଛିଥିଲେ। ହେଲେ ଭାଜପା ଏଏପି ସହ ରାଜନୈତିକସ୍ତରରେ ଅସୁରକ୍ଷିତ ମନେ କରୁଛି। ଏଥିଲାଗି ଦଳୀୟ ନେତାଙ୍କର ସରକାରୀ ବୈଦେଶିକ ଯାତ୍ରା ଉପରେ ପ୍ରତିବନ୍ଧକ ଲଗାଇବା ଭଳି ଲଜ୍ଜାଜନକ କୌଶଳ ଭାଜପା ଆପଣାଉଛି ବୋଲି ଅମନ କହିଛନ୍ତି। ଏହାଛଡ଼ା ଏଏପି ଆଗାମୀ ଦିନରେ ଭାଜପାର ରାଜନୈତିକ ମାନଚିତ୍ରକୁ ବଦଳାଇବାକୁ ଯାଉଛି। ଏବେ ତାହା ଭାଜପାକୁ ଜଳ ଜଳ ଦେଖାଗଲାଣିି ବୋଲି ସେ କହିଛନ୍ତି।
