ଚଣ୍ଡିଗଡ଼, ୮।୧: ପଞ୍ଜାବର ଫିରୋଜପୁରରେ ରାଲି କରିବାକୁ ଆସୁଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସୁରକ୍ଷା କ୍ଷେତ୍ରରେ ଢିଲା ପ୍ରସଙ୍ଗକୁ ନେଇ ରାଜନୀତି ସରଗରମ ରହିଛି। ପଞ୍ଜାବର ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନି ସିଧାସଳଖ ଭାବେ ପାଲଟା ଆକ୍ରମଣ କରି କହିଛନ୍ତି, ପ୍ରଧାନମନ୍ତ୍ରୀଙ୍କ ସୁରକ୍ଷାରେ କୌଣସି ଅବହେଳା କରାଯାଇନାହିଁ। ତାଙ୍କ ଉପରେ କୌଣସି ପ୍ରକାରର ବିପଦ ନ ଥିଲା। ରାସ୍ତାରେ କିଛି ଲୋକ ବସିଥିବା ନେଇ ତାଙ୍କୁ ଇଣ୍ଟେଲିଜେନ୍ସ ପକ୍ଷରୁ କୁହାଯାଇଥିଲା। ଏପରିକି ତାଙ୍କୁ ଅନ୍ୟ କୌଣସି ମାର୍ଗ ନଚେତ ହେଲିକପ୍ଟରରେ ଯିବାକୁ ହେବ ବୋଲି କୁହାଯାଇଥିଲା। ଏହା ଶୁଣି ପ୍ରଧାନମନ୍ତ୍ରୀ ଭଟିଣ୍ଡା ବିମାନ ବନ୍ଦର ଯାଇ ସେଠାରେ ଉପସ୍ଥିତ ରାଜ୍ୟର ଅର୍ଥ ମନ୍ତ୍ରୀଙ୍କୁ କହିଥିଲେ, ଆପଣଙ୍କ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ କହିଦେବ ମୁଁ ଜୀବନ୍ତ ଫେରିଆସିଛି। ତେବେ ଆପଣ ଜଣେ ଦାୟିତ୍ୱବାନ ପୋଷ୍ଟର ବ୍ୟକ୍ତି, ଆପଣଙ୍କ ପାଖକୁ କେହି ଆସିନାହାନ୍ତି, ସ୍ଲୋଗାନ ଦେଇ ନାହାନ୍ତି, ପଥର ପକାଇ ନାହାନ୍ତି, କୌଣସି ଆଘାତ ହୋଇନାହିଁ, ଗୁଳି ମଧ୍ୟ ଚାଲିନାହିଁ। ଏଣୁ କେଉଁଥିପାଇଁ ଜୀବନ ବଞ୍ଚାଇ ଆସିଲେ ବୋଲି କହିଲେ ତାହା ଶୁଣି ଆଶ୍ଚର୍ଯ୍ୟ ହୋଇଛି ବୋଲି ଚନ୍ନି କହିଛନ୍ତି। ଚନ୍ନିଙ୍କ ଏହି ବିବୃତ୍ତିକୁ ବିଭିନ୍ନ ମହଲରେ ସମାଲୋଚନା କରାଯାଉଛି।
ଭାଜପା ମୁଖପାତ୍ର ସମ୍ବିତ ପାତ୍ର ଟୁଇଟ କରି କହିଛନ୍ତି, ଦେଶର ପ୍ରଧାନମନ୍ତ୍ରୀଙ୍କ ପ୍ରତି ଏକ ରାଜ୍ୟର ମୁଖ୍ୟମନ୍ତ୍ରୀଙ୍କ ଏପରି ଭାଷା ଲଜ୍ଜାଜନକ। ଏହି ଲୋକମାନେ କେଉଁ ଅହଂକାରରେ ବୁଡ଼ି ରହିଛନ୍ତି। ପ୍ରଧାନମନ୍ତ୍ରୀଙ୍କ ପାଇଁ ତୁ, ଗୁଳି, ବନ୍ଧୁକ, ପଥର…ଭଳି ଭାଷା ଘୃଣ୍ୟ ମାନସିକତାକୁ ଦେଖାଉଛି ବୋଲି ସେ କହିଛନ୍ତି।
ସୁଚନାଯୋଗ୍ୟ, ପ୍ରଧାନମନ୍ତ୍ରୀଙ୍କୁ ପଞ୍ଜାବର ଫିରୋଜପୁରରେ ଏକ ବଡ଼ ସମାବେଶ କରିବାର ଥିଲା। କିନ୍ତୁ ବିକ୍ଷୋଭକାରୀ କୃଷକମାନେ ରାସ୍ତାରେ ପ୍ରଧାନମନ୍ତ୍ରୀଙ୍କ ଗାଡ଼ିକୁ ଅଟକାଇଥିଲେ। ଏହାପରେ ପ୍ରଧାନମନ୍ତ୍ରୀ ସେଠାରୁ ଫେରି ଆସିଥିଲେ।
