ଚଣ୍ଡିଗଡ଼,୧୯।୩: ପଞ୍ଜାବରେ ଆମ ଆଦମୀ ପାର୍ଟିର ବହୁମତରେ ବିଜୟ ହାସଲ ପରେ ମାର୍ଚ୍ଚ ୧୬ରେ ଭଗଓ୍ବନ୍ତ ମାନ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି। ଇତିମଧ୍ୟରେ ମାନ ସରକାରଙ୍କ ନେତୃତ୍ୱରେ ଏଏପି ସରକାରଙ୍କ ୧୦ଜଣ ବିଧାୟକ ମନ୍ତ୍ରୀପଦ ପାଇଁ ଗୋପନୀୟତାରେ ଶପଥ ପାଠ ଗ୍ରହଣ କରିଛନ୍ତି। ରାଜ୍ୟପାଳ ବନୱାରୀ ଲାଲ ପୁରୋହିତ ତାଙ୍କୁ ଶପଥ ପାଠ କରାଇଛନ୍ତି। ପୁରୁଣା ଚେହେରା ବଦଳରେ ମାନ କ୍ୟାବିନେଟରେ ନୂତନ ବିଧାୟକମାନଙ୍କୁ ସୁଯୋଗ ଦିଆଯାଇଛି। ସେମାନଙ୍କ ମଧ୍ୟରୁ ଜଣେ ମହିଳା ମନ୍ତ୍ରୀ ମଧ୍ୟ ଅଛନ୍ତି। ବଲଜିତ କୌରଙ୍କୁ ମଧ୍ୟ କ୍ୟାବିନେଟରେ ସାମିଲ କରାଯାଇଛି। ସୂଚନାଯୋଗ୍ୟ, ଚଣ୍ଡିଗଡ଼ର ରାଜ ଭବନର ନୂତନ ଗୁରୁ ନାନକ ଦେବ ଅଡିଟୋରିୟମ୍ରେ ଶନିବାର ମନ୍ତ୍ରୀମାନେ ଶପଥ ଗ୍ରହଣ କରିଛନ୍ତି। ବରିଷ୍ଠ ନେତା ହରପାଲ ସିଂ ଚିମା ଦିରବାରୁ ଦ୍ୱିତୀୟ ଥର ବିଧାୟକ ନିର୍ବାଚିତ ହୋଇଥିବା ବେଳେ ସର୍ବପ୍ରଥମେ ସେ ମନ୍ତ୍ରୀ ପଦ ପାଇଁ ଶପଥ ଗ୍ରହଣ କରିଥିଲେ। ସେହିପରି ଦ୍ୱିତୀୟରେ ଡ.ବଲଜିତ କୌର, ତୃତୀୟରେ ହରଭଜନ ସିଂଙ୍କ ବ୍ୟତୀତ ଡ. ବିଜୟ ସାଙ୍ଗେଲା, ଲଲଚନ୍ଦ କଟାରୁଚକ୍କ, ବ୍ରହ୍ମା ଶଙ୍କର, ଗୁରୁମିତ ସିଂ ମିତ୍ ହେୟର, ଲାଲଜିତ ସିଂ ଭୁଲ୍ଲର ଏବଂ ହରଜୋତ ସିଂ ବେନ୍ସ ଶପଥ ଗ୍ରହଣ କରିଛନ୍ତି। ମନ୍ତ୍ରିମଣ୍ଡଳର ସର୍ବ କନିଷ୍ଠ ସଦସ୍ୟ ହେଉଛନ୍ତି ହରଜୋତ ସିଂ ବେନ୍ସ। ଏହି ସାମରୋହରେ ଭଗଓ୍ବନ୍ତ ମାନଙ୍କ ଝିଅ ସିରତ କୌର ମାନ ଓ ପୁଅ ଦିଲଶାନ ମାନ ସାମିଲ ହୋଇଥିଲେ।
