ଲିଡ୍ସ,୨୭।୮: ସ୍ଥାନୀୟ ଲିଡ୍ସ ଗ୍ରାଉଣ୍ଡରେ ଚାଲିଥିବା ତୃତୀୟ ଟେଷ୍ଟକୁ ୩ୟ ଦିନରେ ଜିତି ନେବାକୁ ଆଶା ରଖିଥିଲା ଇଂଲଣ୍ଡ। କିନ୍ତୁ ଘରୋଇ ବୋଲରଙ୍କୁ ଥକେଇ ଦେଇଛନ୍ତି ଟିମ୍ ଇଣ୍ଡିଆର ଟେଷ୍ଟ ସ୍ପେଶାଲିଷ୍ଟ ଚେତେଶ୍ୱର ପୂଜାରା ଓ ଅଧିନାୟକ ବିରାଟ କୋହଲି। ଦୁହିଁଙ୍କ ବ୍ୟାଟିଂ ଯୋଗୁ ଚଳିତ ଟେଷ୍ଟରେ ରୋଚକ ମୋଢ଼ ଆସିଛି। ପ୍ରଥମ ଇନିଂସରେ ୭୮ ରନ୍ କରିଥିବା ଟିମ୍ ଇଣ୍ଡିଆ ତୃତୀୟ ଦିନ ଶେଷ ସୁଦ୍ଧା ଦ୍ୱିତୀୟ ପାଳିରେ ମାତ୍ର ୨ ଉଇକେଟ ହରାଇ ୨୧୫ ରନ୍ କରିଛି। ମ୍ୟାଚ୍ରେ ଆହୁରି ଦୁଇ ଦିନ ଥିବା ବେଳେ ଭାରତକୁ ଇନିଂସ ପରାଜୟ ଏଡ଼ାଇବା ଲାଗି ଆଉ ୧୩୯ ରନ୍ ଦରକାର।
ଶୁକ୍ରବାର ଇଂଲଣ୍ଡ ତା’ର ଅସମାପ୍ତ ପ୍ରଥମ ଇନିଂସ ସ୍କୋର ୪୨୩/୮ରୁ ବ୍ୟାଟିଂ ଆରମ୍ଭ କରି ୪୩୨ରେ ଅଲଆଉଟ୍ ହୋଇଯାଇଥିଲା। ୩୫୪ ରନ୍ ପଛରେ ଥିବା ଭାରତ ଆରମ୍ଭରୁ ହରାଇଥିଲା ଲୋକେଶ ରାହୁଲ (୮)ଙ୍କ ଉଇକେଟ୍। ଅନ୍ୟତମ ଓପନର ରୋହିତ ଶର୍ମା ଓ ଚେତେଶ୍ୱର ପୂଜାରା ଇଂଲଣ୍ଡ ବୋଲରଙ୍କ ପରୀକ୍ଷା ନେଇଥିଲେ। ଦୁଇ ବ୍ୟାଟ୍ସମ୍ୟାନ ଦ୍ୱିତୀୟ ଉଇକେଟ ଲାଗି ଦଳୀୟ ସ୍କୋରରେ ଯୋଡ଼ିଥିଲେ ୮୨ ରନ୍। ଅର୍ଦ୍ଧଶତକ ପୂରଣ କରିବା ପରେ ପ୍ୟାଭିଲିୟନ ଫେରିଯାଇଥିଲେ ରୋହିତ (୫୯)। ଏହାପରେ ଅଧିନାୟକ ବିରାଟ କୋହଲି (୪୫*) ଓ ପୂଜାରା (୯୧*)ଙ୍କ ଯୋଡ଼ି ଘରୋଇ ବୋଲରଙ୍କୁ ଆଉ ଉଇକେଟ ନେବାକୁ ସୁଯୋଗ ଦେଇ ନ ଥିଲା। ଦୁହେଁ ଅବିଭାଜିତ ୩ୟ ଉଇକେଟ ପାଇଁ ୯୯ ରନ୍ ଯୋଡ଼ିଛନ୍ତି। ୩ୟ ଦିନ ଶେଷ ସୁଦ୍ଧା ଭାରତ ୨ ଉଇକେଟ ହରାଇ ୨୧୫ ରନ୍ କରିଛି।
