ଭଦ୍ରକ ଅଫିସ, ୧୮।୧୦:ଧାମନଗର ଉପନିର୍ବାଚନ ପାଇଁ ବିଜେଡି ବିଦ୍ରୋହୀ ତଥା ସ୍ବାଧୀନ ପ୍ରାର୍ଥୀ ଭାବେ ମଇଦାନକୁ ଓହ୍ଲାଇଥିବା ପୂର୍ବତନ ବିଧାୟକ ରାଜେନ୍ଦ୍ର ଦାସ ପ୍ରତିଦ୍ୱନ୍ଦ୍ୱିତା ନିଷ୍ପତ୍ତିରେ ଦୃଢ଼ ରହିବେ ନା ପ୍ରାର୍ଥତ୍ପତ୍ର ପ୍ରତ୍ୟାହାର କରିବେ ତାହା ଉପରେ ସମସ୍ତଙ୍କ ନଜର ରହିଥିଲା।
ଦଳୀୟ ଟିକେଟ ନ ମିଳିବା ପରେ ଅସନ୍ତୋଷ ଜାହିର କରି ସ୍ବାଧୀନ ଭାବେ ନାମାଙ୍କନ ଦାଖଲ କରିଥିଲେ ରାଜେନ୍ଦ୍ର। ସୋମବାର ନାମାଙ୍କନ ପ୍ରତ୍ୟାହାରର ଶେଷ ଦିବସ ଥିବାବେଳେ ଶନିବାର ଓ ରବିବାର ତାଙ୍କୁ ମନାଇବା ପାଇଁ ବିଜେଡି ପକ୍ଷରୁ ବହୁ ଉଦ୍ୟମ କରାଯାଇଥିଲା। ରାଜେନ୍ଦ୍ର ତାଙ୍କର ନାମାଙ୍କନ ପତ୍ର ପ୍ରତ୍ୟାହାର କରିନେବେ ବୋଲି ଚର୍ଚ୍ଚା ମଧ୍ୟ ଜୋର୍ ଧରିଥିଲା। କିନ୍ତୁ ବିଜେଡିର ସମସ୍ତ ପ୍ରଚେଷ୍ଟା ଶେଷରେ ରାଜେନ୍ଦ୍ରଙ୍କ ଜିଦ୍ ଆଗରେ ଫେଲ୍ ମାରିଛି। ରାଜେନ୍ଦ୍ରଙ୍କୁ ନେଇ ଏବେ ଧାମନଗର ରାଜନୀତି ରୋଚକ ମୋଡ଼ରେ ପହଞ୍ଚିଛି।
ପୂର୍ବରୁ ଭାଜପା ୪୦, ବିଜେଡି ୪୦ ଓ କଂଗ୍ରେସ ୩୦ ଜଣିଆ ଷ୍ଟାର ପ୍ରଚାରକଙ୍କ ନାମ ତାଲିକା ଘୋଷଣା କରିସାରିଛନ୍ତି। ଏଭଳି ସ୍ଥିତିରେ ସୋମବାର ରାଜେନ୍ଦ୍ର ତାଙ୍କର ଷ୍ଟାର ପ୍ରଚାରକ ତାଲିକା ଘୋଷଣା କରିଛନ୍ତି। ତାଲିକାରେ କୌଣସି ବଡ଼ ନେତାଙ୍କ ନଁା ନ ଥିଲେ ମଧ୍ୟ ମା’ ବାପା, ଗୁରୁଜନ, ଚାଷୀ, ଚାଚା, ଚାଚୀ, ଶିକ୍ଷିତ ଓ ସାଧାରଣ ଜନତା ମୋର ଷ୍ଟାର ପ୍ରଚାରକ ବୋଲି ରାଜେନ୍ଦ୍ର ଗଣମାଧ୍ୟମ ଆଗରେ କହିଛନ୍ତି। ଏହି ଷ୍ଟାର ପ୍ରଚାରକମାନଙ୍କୁ ସାଥିରେ ନେଇ ଉପନିର୍ବାଚନରେ ବିଜୟୀ ହେବେ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି।
ଉପନିର୍ବାଚନରେ ବିଜେଡିର ବିଦ୍ରୋହୀ ପ୍ରାର୍ଥୀ ହେବା ଯୋଗୁ ଏହା ଦଳ ଉପରେ ପ୍ରଭାବ ପକାଇବ ବୋଲି ଚର୍ଚ୍ଚା ହେଉଛି। ଅନ୍ୟପଟେ ବିଦ୍ରୋହୀ ପ୍ରାର୍ଥୀ ହେବା ପରେ ମଧ୍ୟ ବିଜେଡି ରାଜେନ୍ଦ୍ରଙ୍କୁ ନିଲମ୍ବନ ନ କରିବା ପଛରେ କ’ଣ ରହସ୍ୟ ରହିଛି, ସେନେଇ ମଧ୍ୟ ଚର୍ଚ୍ଚା ଜୋର୍ ଧରିଛି। ବିଜେଡି ବୈଠକରେ ରାଜେନ୍ଦ୍ରଙ୍କ ସମର୍ଥକମାନେ ଦଳ ତାଙ୍କୁ ଟିକେଟ ନ ଦେବା ନେଇ ଅସନ୍ତୋଷ ପ୍ରକାଶ କରି ହୋହଲ୍ଲା କରୁଥିବାର ଏକ ଭିଡିଓ ଭାଇରାଲ ହେଉଛି। ଏଭଳି ସ୍ଥିତିରେ ଧାମନଗରରେ ବିଜେଡି ଦୁଇଫାଳ ହୋଇଥିବା ବେଳେ ଭାଜପା କେତେଦୂର ଫାଇଦା ଉଠାଇ ପାରିବ ତାହା ନିର୍ବାଚନ ଫଳାଫଳ ପରେ ଜଣାପଡ଼ିବ ବୋଲି ଆଲୋଚନା ହେଉଛି।
