ପଟ୍ଟାଙ୍ଗି,୧୫।୨(ଡି.ଏନ.ଏ): କୋରାପୁଟ ଜିଲାର ଦୋରା ସମ୍ପ୍ରଦାୟ ଆଦିବାସୀ ମାନ୍ୟତା ଦାବି ଉଠାଇ ପୁଣି ଆନ୍ଦୋଳନ ଆରମ୍ଭ କରିଛନ୍ତି। ଏନେଇ ମଙ୍ଗଳବର ଏକ ଶୋଭାଯାତ୍ରା ଅନୁଷ୍ଠିତ ହୋଇଛି। ଜିଲାର ବିଭିନ୍ନ ବ୍ଲକରେ ବସବାସ କରୁଥିବା ଦୋରା ସମ୍ପ୍ରଦାୟ ବିଭିନ୍ନ ସରକାରୀ ଯୋଜନାରୁ ବଞ୍ଚିତ ହେଉଥିବା, ସରକାରୀ ଅଧିକାରୀମାନେ ସେମାନଙ୍କୁ କ୍ରମାଗତ ଭାବେ ଅଣଦେଖା କରୁଥିବା ଅଭିଯୋଗ କରି ସ୍ଥାନୀୟ ତହସିଲ କାର୍ଯ୍ୟାଳୟ ସମୁଖରେ ୩ଦିନ ହେଲା ଧାରଣା ଦେଇ ପ୍ରତିବାଦ ଜଣାଇଛନ୍ତି । ଜିଲା ସଂଘ ଆବାହକ ତାଉଡୁ ଦୋରାଙ୍କ ଆହ୍ବାନରେ ଜିଲାର ପଟ୍ଟାଙ୍ଗି ବ୍ଲକର ସମ୍ବାଇ, ମାଳିପୁଟ, ପୁକାଲି, ଚନ୍ଦକା, ତଳଗଲୁର, ଅମ୍ପାବାଲି, ସୁଙ୍କି, ରାଲେଗଡା ଅଦି ପଞ୍ଚାୟତରେ ବାସ କରୁଥିବା ଦୋରା ସମ୍ପ୍ରଦାୟର ସଦସ୍ୟମାନେ ପ୍ରଥମେ ଗାଙ୍ଗମା ମନ୍ଦିର ନିକଟରେ ଏକାଠି ହୋଇ ସେଠାରୁ ଏକ ଶୋଭାଯାତ୍ରାରେ ବାହାରି ତହସିଲ କାର୍ଯ୍ୟାଳୟରେ ପହଞ୍ଚତ୍ଥିଲେ। ସରକାର ନିର୍ବାଚନ ସମୟରେ ଭୋଟ ନେଇ ପରେ ଦୋରା ସମ୍ପ୍ରଦାୟ ପ୍ରତି ଛଳନା କରିଥିବା ଅଭିଯୋଗ କରିଥିଲେ। ଏହାର ପ୍ରତିବାଦରେ ଆଗାମୀ ତିନି ଦିନ ଧରି ଧାରଣା ଦେବାକୁ ସଂଘ ପକ୍ଷରୁ ନିଷ୍ପତ୍ତି ନିଆଯାଇଛି। ଏଥିରେ ଦେର ସମ୍ପ୍ରଦାୟର ସଦସ୍ୟମାନେ ସହଯୋଗ କରିବାକୁ ଜିଲା ସଭାପତି ବୈଦ୍ୟନାଥ ଗେମେଲ ପରାମର୍ଶ ଦେଇଥିଲେ। ସୂଚନା ଯୋଗ୍ୟ, ଦୋରା ସମ୍ପ୍ରଦାୟ ୧୯୭୮ରୁ କେନ୍ଦ୍ର ଓ ରାଜ୍ୟ ସରକାର ସେମାନଙ୍କୁ ଆଦିବାସୀ ମାନ୍ୟତା ଦେବାକୁ ବାରମ୍ବାର ବିଭିନ୍ନ ସମୟରେ ସେମାନେ ଦାବି କରି ଆସୁଛନ୍ତି। ମାତ୍ର ଉଭୟ ସରକାର ସେମାନଙ୍କୁ ଅଣଦେଖା କରି ଆସୁଥିବା ସଂଘ ଜିଲା ସମ୍ପାଦକ ଶଙ୍କର ପାଙ୍ଗି କହିିଛନ୍ତି । ଦୋରା ସମ୍ପ୍ରଦାୟର ଏପରି ପଦକ୍ଷେପକୁ ଜିଲା ପରିଷଦ ସଭ୍ୟା ଟିକାଇ ଗେମେଲ, କମ୍ଭାର ସମ୍ପ୍ରଦାୟର ସଦସ୍ୟ ଭଗବାନ ଗୋଲରି, ଦୋରା ସଂଘର ନନ୍ଦପୁର ବ୍ଲକ ସଭାପତି ନିରଞ୍ଜନ ଖରା, ପୂର୍ବତନ ଉପଦେଷ୍ଟା ଟି. ଗୋପାଳ ରାଓ ପ୍ରମୁଖ ସମର୍ଥନ କରିଛନ୍ତି ।
