ବଲିଉଡରୁ ହଲିଉଡ୍କୁ ଜମ୍ପ୍ ମାରିଥିବା ପ୍ରିୟଙ୍କା ଚୋପ୍ରାଙ୍କ ବୈବାହିକ ଜୀବନକୁ ନେଇ ଚର୍ଚ୍ଚା ଜୋର ଧରିଛି। ପ୍ରିୟଙ୍କା ଗତ ନଭେମ୍ବର ୨୨ରେ ସୋସିଆଲ ମିଡିଆ ଆକାଉଣ୍ଟରୁ ସ୍ବାମୀଙ୍କ ସରନେମ୍ ହଟାଇ ଦେଇଛନ୍ତି। ସେ ‘ଜୋନାସ’ ସହିତ ‘ଚୋପ୍ରା’ ମଧ୍ୟ ହଟାଇଦେଇଛନ୍ତି। ସେବେଠାରୁ କଳ୍ପନାଜଳ୍ପନାର ଆରମ୍ଭ ହୋଇଛି ଯେ ପ୍ରିୟଙ୍କା ତାଙ୍କ ଆମେରିକୀୟ ଗାୟକ ତଥା ସଙ୍ଗୀତକାର ସ୍ବାମୀ ନିକ ଜୋନାସଙ୍କଠାରୁ ଛାଡପତ୍ର ନେବାକୁ ଯାଉଛନ୍ତି। ପ୍ରିୟଙ୍କାଙ୍କ ମା’ ମଧୁ ଚୋପ୍ରା ଛାଡପତ୍ର ଖବରକୁ ଖଣ୍ଡନ କରିଛନ୍ତି। ସେ ଏପରି ଗୁଜବ ପ୍ରଚାର ନ କରିବାକୁ ଲୋକଙ୍କୁ ନିବେଦନ କରିଛନ୍ତି। ପ୍ରିୟଙ୍କା ନିକଟରେ ତାଙ୍କ ଇନଷ୍ଟା ବାୟୋରେ କିଛି ପରିବର୍ତ୍ତନ କରିଥିଲେ। ଏଥିରେ ସେ ତାଙ୍କର ସରନେମ୍ ‘ଚୋପ୍ରା ଏବଂ ଜୋନାସ’ ହଟାଇଦେଇଥିଲେ।
ଏଭଳି ଚର୍ଚ୍ଚା ଭିତରେ ନିକ ଜୋନାସ ଇନଷ୍ଟାଗ୍ରାମରେ ତାଙ୍କ ବ୍ୟାୟାମର ଏକ ଭିଡିଓ ଶେୟାର କରିଛନ୍ତି। ଏଥିରେ, ନିକ କଠିନ ବ୍ୟାୟାମ କରୁଥିବା ଦେଖିବାକୁ ମଳିଛି। ପ୍ରିୟଙ୍କା ଏହି ପୋଷ୍ଟ ଉପରେ କମେଣ୍ଟ ଦେଇ କହିଛନ୍ତି ସେ ତାଙ୍କ ଜୀବନସାରା ତାଙ୍କ ସ୍ବାମୀଙ୍କ ସହ ରହିବାକୁ ଚାହାଁନ୍ତି ଏବଂ ତାଙ୍କ ବାହୁରେ ମରିବାକୁ ଚାହାଁନ୍ତି। ଏହା ସହିତ, ସେ ଆଖିରେ ଏବଂ ହୃଦୟରେ ପ୍ରେମ ସହିତ ଇମୋଜି ଦେଇଥିଲେ। ପ୍ରିୟଙ୍କାଙ୍କ ଏହି କମେଣ୍ଟରୁ ଏହା ସ୍ପଷ୍ଟ ହୋଇଛି ଯେ ସେ ନିକଙ୍କଠାରୁ ଅଲଗା ହେବାକୁ ଚାହୁଁନାହାଁନ୍ତି। ତାଙ୍କ ସହିତ ଜୀବନ ବିତାଇବାକୁ ଚାହାଁନ୍ତି। ତାଙ୍କ ଏହି କମେଣ୍ଟକୁ ହଜାର ହଜାର ଲୋକ ପସନ୍ଦ କରିଛନ୍ତି।
୨୦୧୮ରେ ରାଜସ୍ଥାନର ଯୋଧପୁରରେ ପ୍ରିୟଙ୍କା ଚୋପ୍ରା ଏବଂ ନିକ ଜୋନାସଙ୍କ ରାଜକୀୟ ବିବାହ ହୋଇଥିଲା। ପ୍ରଥମେ ଦୁହେଁ ହିନ୍ଦୁ ଏବଂ ପରେ ଖ୍ରୀଷ୍ଟିଆନ ରୀତିନୀତି ଅନୁଯାୟୀ ବିବାହ କରିଥିଲେ। ହଲିଉଡ ଶୋ’ ଏବଂ ଚଳଚ୍ଚିତ୍ରରେ ଅଭିନୟ କରିବାକୁ ଆମେରିକା ଯାଇଥିବା ବେଳେ ପ୍ରିୟଙ୍କା ନିକଙ୍କୁ ଭେଟିଥିଲେ।
