ନୂଆଦିଲ୍ଲୀ,୧ା୨: ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ଆଜି ଅର୍ଥାତ୍ ଫେବୃଆରୀ ୧ରେ ପାର୍ଲାମେଣ୍ଟରେ ୨୦୨୬-୨୭ ଆର୍ଥିକ ବର୍ଷ ପାଇଁ କେନ୍ଦ୍ର ବଜେଟ୍ ଉପସ୍ଥାପନ କରିଛନ୍ତି। ଏହା ତାଙ୍କର ଲଗାତର ୯ମ ବଜେଟ୍। ତେବେ ଏହି ବଜେଟ୍କୁ ନେଇ ରାଜନୈତିକ ମହଲରୁ ମଧ୍ୟ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି।
କଂଗ୍ରେସ ଏମ୍ପି ପ୍ରିୟଙ୍କା ଗାନ୍ଧୀ ଭଦ୍ରା ଏକ ଆଶ୍ଚର୍ଯ୍ୟକର ବୟାନ ଦେଇଛନ୍ତି। ପ୍ରିୟଙ୍କା କହିଛନ୍ତି, ତାଙ୍କର ଏହି ବଜେଟ୍ଠାରୁ କୌଣସି ଅଧିକ ଆଶା ନାହିଁ।
ସେହିପରି କଂଗ୍ରେସ ଏମ୍ପି ଶଶି ଥରୁର କହିଛନ୍ତି, ଅର୍ଥନୈତିକ ସର୍ଭେ ଭଲ ଆର୍ଥିକ ଅଭିବୃଦ୍ଧି ପ୍ରୋଜେକ୍ଟ କରେ, କିନ୍ତୁ ପ୍ରକୃତ ପ୍ରଶ୍ନ ହେଉଛି ଏହି ଅଭିବୃଦ୍ଧି ନିଯୁକ୍ତି ସୃଷ୍ଟି ସହିତ ହେବ କି ନାହିଁ। ସେ କହିଛନ୍ତି, ନିଯୁକ୍ତି ବିନା ଅଭିବୃଦ୍ଧି କାହାକୁ ଲାଭ ଦିଏ ନାହିଁ। ସେ ଜୋର ଦେଇ କହିଛନ୍ତି, ଦେଶର ଯୁବପିଢ଼ିଙ୍କ ପାଇଁ ଅଧିକ ନିଯୁକ୍ତି ସୃଷ୍ଟି କରିବା ପାଇଁ ସରକାରଙ୍କ ଯୋଜନା ଗୁରୁତ୍ୱପୂର୍ଣ୍ଣ ହେବ। ସେ ଏହା ମଧ୍ୟ କହିଛନ୍ତି, କେରଳରେ ନିର୍ବାଚନ ଆସୁଛି, ସମସ୍ତେ ଦେଖୁଛନ୍ତି କେନ୍ଦ୍ର ସରକାର ସେଠାରେ କ’ଣ ଲାଭ ଦେଉଛନ୍ତି।
ସେହିପରି ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ଏହି ସମୟରେ ସରକାରଙ୍କୁ ଟାର୍ଗେଟ କରି କହିଛନ୍ତି, ଯେଉଁ ସରକାରଙ୍କଠାରୁ କୌଣସି ଆଶା ନାହିଁ, ସେହି ସରକାରଙ୍କ ବଜେଟ୍ରୁ କ’ଣ ଆଶା କରାଯାଇପାରିବ? ସେ କହିଛନ୍ତି, ଏହି ବଜେଟ୍ କେବଳ ୫ ପ୍ରତିଶତ ଜନସଂଖ୍ୟା ପାଇଁ ତିଆରି କରାଯାଇଛି। ସରକାର ଏହାର ଘୋଷଣାପତ୍ରରେ ଦିଆଯାଇଥିବା ପ୍ରତିଶ୍ରୁତି ପୂରଣ କରିଛନ୍ତି କି ନାହିଁ।
ଏମ୍ପି ମନୀଷ ତିଓ୍ବାରୀ କହିଛନ୍ତି, ଭାରତୀୟ ଅର୍ଥନୀତି ବହୁତ ଗମ୍ଭୀର ଏବଂ ସମ୍ବେଦନଶୀଳ ଚ୍ୟାଲେଞ୍ଜର ସମ୍ମୁଖୀନ ହେଉଛି। ଗତ ଦଶନ୍ଧି ଧରି ନାମମାତ୍ର GDP ହ୍ରାସ ପାଉଛି। ଘରୋଇ ନିବେଶ ହ୍ରାସ ପାଉଛି। GDA ଆସୁନାହିଁ। ଆମେ ଆଶା କରୁଛୁ, ଅର୍ଥମନ୍ତ୍ରୀ ଏହାକୁ ସ୍ବୀକାର କରିବେ ଏବଂ ଏକ ରୋଡମ୍ୟାପ୍ ପ୍ରସ୍ତୁତ କରିବେ।
