ନୂଆଦିଲ୍ଲୀ,୫।୧୦: କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧୀ ଭଦ୍ରାଙ୍କୁ ବିନା କୌଣସି ନିର୍ଦ୍ଦେଶରେ ଗିରଫ କରାଯିବା ଅସମ୍ବିଧାନିକ। ଏଭଳି କହି ଉତ୍ତରପ୍ରଦେଶରେ ରାଜନେତାଙ୍କୁ ଅଟକ ରଖାଯିବାକୁ ସମାଲୋଚନା କରିଛନ୍ତି ସୁପ୍ରିମକୋର୍ଟର ଅବସରପ୍ରାପ୍ତ ବିଚାରପତି ମଦନ ଲୋକୁର।
”ପ୍ରିୟଙ୍କାଙ୍କୁ ଗିରଫ କରାଯାଇ ଘରେ ଅଟକ ରଖାଯାଇଛି। ଜଣଙ୍କୁ ଗିରଫ କରାଯିବା ପରେ ଥାନା କିମ୍ବା ଜେଲରେ ପୋଲିସ ହେପାଜତରେ ରଖାଯିବା କଥା। ବର୍ତ୍ତମାନ ତାଙ୍କୁ ରେଷ୍ଟ ହାଉସରେ ରଖାଯାଇଛି। ତାହାକୁ ଜେଲ କିମ୍ବା ସବ୍ ଜେଲ ଘୋଷଣା କରାଯିବା କଥା, ଯାହାକି ଏପର୍ଯ୍ୟନ୍ତ କରାଯାଇ ନାହିଁ। ଏଣୁ ତାଙ୍କୁ ବେଆଇନ ସ୍ଥାନରେ ରଖାଯାଇଛି“ ବୋଲି ପୂର୍ବତନ ବିଚାରପତି କହିଛନ୍ତି।
ଉଲ୍ଲେଖଯୋଗ୍ୟ, ଲଖିମପୁର ଖେରି ଜିଲାରେ ୪ ଚାଷୀଙ୍କ ସମେତ ୮ ଜଣଙ୍କ ମୃତ୍ୟୁ ହେବା ପରେ ସିତାପୁର ଦେଇ ଘଟଣାସ୍ଥଳକୁ ଯାଉଥିବା ପ୍ରିୟଙ୍କାଙ୍କୁ ସୋମବାର ୟୁପି ପୋଲିସ ଗିରଫ କରିଥିଲା।
ଲଖିମପୁର ଖେରିରେ ଆନ୍ଦୋଳନକାରୀ ଚାଷୀଙ୍କ ଉପରେ ଏସ୍ୟୁଭି ମାଡ଼ିଯିବା ଘଟଣାର ସବିଶେଷ ତଦନ୍ତ ହେବା ଦରକାର। ଏହା ଏକ ସରଳ ହତ୍ୟା ମାମଲା। ହତ୍ୟା ମାମଲାରେ ପୋଲିସର ପ୍ରଥମ କାର୍ଯ୍ୟ ହେଲା ଅଭିଯୁକ୍ତଙ୍କୁ ଗିରଫ କରିବା। ଏଣୁ ଏବେ ତୁରନ୍ତ ପଦକ୍ଷେପ ନିଆଯିବା ଦରକାର। ୪୮ ଘଣ୍ଟା ଖୁବ୍ ଲମ୍ବା ସମୟ ବୋଲି ପୂର୍ବତନ ଜଷ୍ଟିସ ଲୋକୁର କହିଛନ୍ତି।
