ଲଣ୍ଡନ,୨୬।୭: ଯୁବ ଓପନର ପୃଥ୍ବୀ ଶ ଓ ମିଡିଲ ଅର୍ଡର ବ୍ୟାଟ୍ସମ୍ୟାନ ସୂର୍ଯ୍ୟକୁମାର ଯାଦବ ଭାରତୀୟ ଟେଷ୍ଟ ଦଳରେ ସାମିଲ ହୋଇଛନ୍ତି। ଅଗଷ୍ଟ ୪ରୁ ଆରମ୍ଭ ହେବାକୁ ଥିବା ଇଂଲଣ୍ଡ ବିପକ୍ଷ ୫ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଖେଳିବାକୁ ଏହି ଦୁଇ ଖେଳାଳି ଇଂଲଣ୍ଡ ଯାତ୍ରା କରିବେ। ଶୁବମନ୍ ଗିଲ ଓ ଓ୍ବାଶିଂଟନ ସୁନ୍ଦର ଆହତ ହୋଇଥିବାରୁ ବଦଳ ଖେଳାଳିଭାବେ ସୂର୍ଯ୍ୟକୁମାର ଓ ପୃଥ୍ବୀଙ୍କୁ ଡାକରା ଆସିଛି। ଏଥିସହ ଷ୍ଟାଣ୍ଡ ବାଇ ତଥା ବେଙ୍ଗଲ ଓପନର ଅଭିମନ୍ୟୁ ଈଶ୍ୱରନଙ୍କୁ ମୁଖ୍ୟ ଦଳରେ ସାମିଲ କରାଯାଇଛି ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ତରଫରୁ ସୋମବାର ଘୋଷଣା କରାଯାଇଛି। ଚଳିତ ଶ୍ରୀଲଙ୍କା ବିପକ୍ଷ ଦିନିକିଆ ଓ ଟି୨୦ ସିରିଜରେ ଭଲ ପ୍ରଦର୍ଶନ କରିଥିବାରୁ ବିସିସିଆଇ ଏହି ଦୁଇ ଖେଳାଳିଙ୍କୁ ଦଳରେ ସାମିଲ କରି ପୁରସ୍କୃତ କରିଛି।
ସେହିପରି ବାମ ବୁଢା ଆଙ୍ଗୁଠି ଭାଙ୍ଗିଯାଇ ଥିବାରୁ ଷ୍ଟାଣ୍ଡବାଇ ଦ୍ରୁତ ବୋଲର ଆଭେସ ଖାଁ ସ୍ବଦେଶ ପ୍ରତ୍ୟାବର୍ତ୍ତନ କରିବେ। ଶୁବମନ୍ ଗିଲଙ୍କ ବାମ ଗୋଡରେ ସମସ୍ୟା ରହିଛି। ଯାହାଫଳରେ ତାଙ୍କୁ ଇଂଲଣ୍ଡ ଗସ୍ତରୁ ବାଦ୍ ଦିଆଯାଇଛି। ସେହିପରି ଡାହଣହାତ ବୋଲିଂ ଅଙ୍ଗୁଳିରେ ସୁନ୍ଦର ଆଘାତ ପାଇଛନ୍ତି। ଶୁବମନ୍ ଭାରତ ଫେରିସାରିଛନ୍ତି। ତେବେ ଆଭେସ ଓ ସୁନ୍ଦର ଖୁବଶୀଘ୍ର ଭାରତ ପ୍ରତ୍ୟାବର୍ତ୍ତନ କରିବେ।
