ନୂଆଦିଲ୍ଲୀ, ୧୮।୧ : ସାଧାରଣତନ୍ତ୍ର ଦିବସରେ ଏକ ସମ୍ଭାବ୍ୟ ଆତଙ୍କବାଦୀ ଷଡଯନ୍ତ୍ର ବିଷୟରେ ଗୁପ୍ତଚର ସଂସ୍ଥାଗୁଡ଼ିକୁ ସତର୍କ ସୂଚନା ମିଳିଛିି। ଏଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଅନ୍ୟ ମାନ୍ୟଗଣ୍ୟ ବ୍ୟକ୍ତିଙ୍କ ଜୀବନ ବିପଦରେ ଥିବା କୁହାଯାଇଛି।
ରିପୋର୍ଟ ଅନୁଯାୟୀ, ସାଧାରଣତନ୍ତ୍ର ଦିବସ ପାଳନ ଉତ୍ସବରେ ଯୋଗଦେବାକୁ ଥିବା ପ୍ରଧାନମନ୍ତ୍ରୀ ମୋଦି ଏବଂ ଅନ୍ୟ ମାନ୍ୟଗଣ୍ୟ ବ୍ୟକ୍ତି ଆତଙ୍କବାଦୀଙ୍କ ଟାର୍ଗେଟରେ ଥିବା ନେଇ ୯ ପୃଷ୍ଠାର ରିପୋର୍ଟ ଜାରି ହୋଇଛି।
ସାଧାରଣତନ୍ତ୍ର ଦିବସରେ କାଜାଖସ୍ତାନ, କିର୍ଗିଜସ୍ଥାନ, ତାଜିକିସ୍ତାନ, ତୁର୍କମେନିସ୍ତାନ ଏବଂ ଉଜବେକିସ୍ତାନ ଆଦି ପାଞ୍ଚଟି ମଧ୍ୟ ଏସୀୟ ଦେଶର ନେତା ମୁଖ୍ୟ ଅତିଥି ଭାବରେ ଆମନ୍ତ୍ରିତ ହେବେ। ଗୁପ୍ତ ସୂଚନାରେ କୁହାଯାଇଛି ଯେ ଏହି ଷଡ଼ଯନ୍ତ୍ରରେ ପାକିସ୍ତାନ/ଆଫଗାନିସ୍ତାନ-ପାକିସ୍ତାନ ବାହାରର ଆତଙ୍କବାଦୀ ସଂଗଠନର ଅନ୍ତର୍ଭୁକ୍ତି ରହିଛି।
ରିପୋର୍ଟ ଅନୁଯାୟୀ, ବଡ ବ୍ୟକ୍ତିତ୍ୱଙ୍କୁ ଟାର୍ଗେଟ କରିବା, ଜନସମାବେଶ, ଗୁରୁତ୍ୱପୂର୍ଣ୍ଣ ପ୍ରତିଷ୍ଠାନ ତଥା ଜନଗହଳି ପୂର୍ଣ୍ଣ ଅଞ୍ଚଳରେ ଅଶାନ୍ତି ସୃଷ୍ଟି କରିବା ହେଉଛି ଆତଙ୍କବାଦୀ ସଂଗଠନର ଉଦ୍ଦେଶ୍ୟ। ଡ୍ରୋନ ସହିତ ଆକ୍ରମଣ କରିବାକୁ ମଧ୍ୟ ଚେଷ୍ଟା କରାଯାଇପାରେ ବୋଲି ଏହି ଇନପୁଟରେ କୁହାଯାଇଛି।
ଆତଙ୍କବାଦୀ ଷଡ଼ଯନ୍ତ୍ର ପଛରେ ଲଶ୍କର-ଇ-ତୋଏବା, ଦ ରେଜିଷ୍ଟାନ୍ସ ଫୋର୍ସ, ଜୈଶ-ଇ-ମହମ୍ମଦ, ହରକତ-ଉଲ-ମୁଜାହିଦ୍ଦିନ ଏବଂ ହିଜବ-ଉଲ-ମୁଜାହିଦ୍ଦିନ ଭଳି ଆତଙ୍କବାଦୀ ସଂଗଠନର ସମ୍ପୃକ୍ତି ରହିଛି।
ପଞ୍ଜାବରେ ଆତଙ୍କବାଦୀ କାର୍ଯ୍ୟକଳାପ ବୃଦ୍ଧି ପାଇଁ ଖାଲିସ୍ତାନୀ କ୍ୟାଡରଙ୍କୁ ଏକତ୍ରିତ କରିବା ଲାଗି
ପାକିସ୍ତାନରେ ଅବସ୍ଥିତ ଖାଲିସ୍ତାନୀ ଗୋଷ୍ଠୀ ଉଦ୍ୟମ ଜାରି ରଖିଛନ୍ତି ବୋଲି ଇନପୁଟ ଉଲ୍ଲେଖ କରାଯାଇଛି। ଆତଙ୍କବାଦୀମାନେ ପଞ୍ଜାବ ସମେତ ଅନ୍ୟାନ୍ୟ ରାଜ୍ୟରେ ମଧ୍ୟ ଆକ୍ରମଣ ଯୋଜନା କରୁଛନ୍ତି।
ଫେବୃଆରୀ ୨୦୨୧ ରେ ପ୍ରାପ୍ତ ଇନପୁଟ ଅନୁଯାୟୀ, ଖାଲିସ୍ତାନୀ ଆତଙ୍କବାଦୀ ଗୋଷ୍ଠୀ ପ୍ରଧାନମନ୍ତ୍ରୀଙ୍କୁ ବୈଠକ ଏବଂ ପର୍ଯ୍ୟଟନସ୍ଥଳୀ ଉପରେ ଆକ୍ରମଣ କରିବାକୁ ଷଡ଼ଯନ୍ତ୍ର କରୁଛନ୍ତି।
