ମହାକାଳପଡ଼ା,୪ା୯ (ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳରେ ସୁରକ୍ଷା ପାଇଁ ସାଗର କବଚର ଏକ ଏନଫୋର୍ସ ଟିମ୍ର ୨ ଦିନିଆ ସମରାଭ୍ୟାସ ବୁଧବାରଠାରୁ ଆରମ୍ଭ ହୋଇଛି। ସମୁଦ୍ର ମଧ୍ୟରେ କୌଣସି ସନ୍ଦିଗ୍ଧ ବ୍ୟକ୍ତି, ବେଆଇନ ଚାଲାଣ ଓ କାରବାରକୁ କଡ଼ା ନଜର ରଖିବାକୁ ଟିମ୍ ଯାଞ୍ଚ ପ୍ରକ୍ରିୟା ଆରମ୍ଭ କରିଛି। ପୂର୍ବାହ୍ନରେ ଜମ୍ବୁ ସାମୁଦ୍ରିକ ଥାନା ଅଧୀନ ଖରିନାସୀ ମତ୍ସ୍ୟ ଅବତରଣ କେନ୍ଦ୍ରଠାରୁ ଏକ ଅତ୍ୟାଧୁନିକ ହାଇ ସ୍ପିଡ ବୋଟରେ ସାମୁଦ୍ରିକ ସମରାଭ୍ୟାସ ପାଇଁ ଯାତ୍ରା ଆରମ୍ଭ କରିଥିଲେ। ବଙ୍ଗୋପସାଗର ମୁହାଣ, ହୁକିଟୋଲା, ପାରାଦୀପ ନେହୁରୁବଙ୍ଗଳା ମୁହାଣଠାରୁ ଗହୀରମଥା ସାମୁଦ୍ରିକ ଅଭୟାରଣ୍ୟ ପାର୍ଶ୍ୱ ଅଞ୍ଚଳରେ ପଇଁତରା ମାରି ମାଛ ଧରିବା ବୋଟ, ଟ୍ରଲରଗୁଡ଼ିକ ଯାଞ୍ଚ କରି ପରିଚୟ ପତ୍ର ତନଖି କରିଥିଲେ। ଗଭୀର ସମୁଦ୍ରରେ କୌଣସି ସନ୍ଦିଗ୍ଧ ବୋଟ, ଟ୍ରଲର ବ୍ୟକ୍ତିଙ୍କୁ ଦେଖିବା ମାତ୍ରେ ତୁରନ୍ତ ପୋଲିସ ଓ ଗୋଇନ୍ଦା ବିଭାଗକୁ ଖବର ଦେବାକୁ ମତ୍ସ୍ୟଜୀବୀମାନଙ୍କୁ କୁହାଯାଇଛି। ଏହି ଦୁଇ ଦିନିଆ ସାମୁଦ୍ରିକ ସମରାଭ୍ୟାସ ସାଗର କବଚ ଟିମ୍ରେ ଜମ୍ବୁ ସାମୁଦ୍ରିକ ଥାନା ଅଧିକାରୀ ସୌମେନ୍ଦ୍ର କୁମାର ବିଶ୍ୱାଳଙ୍କ ନେତୃତ୍ୱରେ ପୋଲିସ ଟିମ୍, ପାରାଦୀପସ୍ଥିତ କୋଷ୍ଟଗାର୍ଡ ଅଧିକାରୀ ଓ ସାମୁଦ୍ରିକ ମତ୍ସ୍ୟ ବିଭାଗ କର୍ମଚାରୀ ସାମିଲ ହୋଇଥିଲେ। ଏ ସଂକ୍ରାନ୍ତରେ ଜମ୍ବୁ ସାମୁଦ୍ରିକ ଥାନା ଅଧିକାରୀ ବିଶ୍ୱାଳଙ୍କୁ ପଚାରିବାରେ ଦୁଇଦିନିଆ ସାମୁଦ୍ରିକ ସମରାଭ୍ୟାସ ସାଗର କବଚରେ ସୁରକ୍ଷା ଅଧିକାରୀ ସାମିଲ ହୋଇଥିଲେ ବୋଲି କହିଛନ୍ତି।
