ଓ୍ବାଶିଂଟନ,୧୪।୯ : ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପରେ ବର୍ତ୍ତମାନ ଜୋ ବାଇଡେନ ମଧ୍ୟ ଅସୁବିଧାରେ ଥିବା ଜଣାପଡିଛି। ତାଙ୍କ ବିରୋଧରେ ମହାଭିଯୋଗ ଯାଞ୍ଚ୍ ଆରମ୍ଭ କରିବା ପ୍ରସ୍ତାବକୁ ଆମେରିକା ସଂସଦର ବାଚସ୍ପତି କେଭିନ ମ୍ୟାକକାର୍ଥି ଅନୁମୋଦନ କରିଛନ୍ତି। ତେବେ ତଦନ୍ତ ଆରମ୍ଭ ହେବା ପରେ ହ୍ବାଇଟ ହାଉସ ବାଇଡେନଙ୍କ ବିରୋଧରେ ଅଣାଯାଇଥିବା ଅଭିଯୋଗକୁ ଖାରଜ କରିଛି।
ପ୍ରେସ ସଚିବ କେରିନ ଜାନ-ପିଆର ବାଇଡେନଙ୍କ ରାଜନୈତିକ ଶତ୍ରୁଙ୍କ ଦ୍ୱାରା ଜାରି କରାଯାଇଥିବା ଅନୁସନ୍ଧାନକୁ ବିରୋଧ କରିଥିଲେ। ରାଷ୍ଟ୍ରପତିଙ୍କ ବିରୋଧରେ ଏହା କେବଳ ଷଡଯନ୍ତ୍ର ବୋଲି ସେ କହିଛନ୍ତି। ଶତ୍ରୁମାନେ ରାଷ୍ଟ୍ରପତିଙ୍କ ଉପରେ ନଜର ରଖିବା ପାଇଁ ଏକ ବର୍ଷ ବିତାଇଲେ, କିନ୍ତୁ ସେମାନେ କୌଣସି ପ୍ରମାଣ ପାଇଲେ ନାହିଁ। ଶେଷରେ ଏଭଳି କରୁଛନ୍ତି।
ପିଆର କହିଛନ୍ତି ବାଇଡେନଙ୍କ ବିରୋଧରେ ପ୍ରମାଣ ମିଳିଲା ନାହିଁ କାରଣ ସେ କିଛି ଭୁଲ କରିନାହାଁନ୍ତି।
ସୂଚନାଯୋଗ୍ୟ ମଙ୍ଗଳବାର ଆମେରିକା ସଂସଦର ବାଚସ୍ପତି କେଭିନ ମ୍ୟାକକାର୍ଥି ରାଷ୍ଟ୍ରପତି ବାଇଡେନଙ୍କ ବିରୋଧରେ ଅଣାଯାଇଥିବା ମହାଭିଯୋଗର ତଦନ୍ତ ଆରମ୍ଭ କରିବାକୁ ଅନୁମୋଦନ କରିଛନ୍ତି। ବିଦେଶୀ ଗଣମାଧ୍ୟମ ରିପୋର୍ଟ ଅନୁଯାୟୀ, ବାଇଡେନ ପରିବାରର ବ୍ୟବସାୟିକ କାରବାରର ତଦନ୍ତ ଆରମ୍ଭ କରିବାକୁ ମ୍ୟାକକାର୍ଥିି ନିର୍ଦ୍ଦେଶ ଦେଇଛନ୍ତି। ୨୦୦୯ ରୁ ୨୦୧୭ ପର୍ଯ୍ୟନ୍ତ ସେ ଆମେରିକାର ରାଷ୍ଟ୍ରପତି ଥିବାବେଳେ ରିପବ୍ଲିକାନମାନେ ତାଙ୍କ ପୁଅ ହଣ୍ଟର୍ ବାଇଡେନଙ୍କୁ ବିଦେଶୀ ବ୍ୟବସାୟରେ ଉପକୃତ କରିଥିବା ଅଭିଯୋଗ କରିଛନ୍ତି।
ପିଆର କହିଛନ୍ତି ମହାଭିଯୋଗକୁ ନେଇ ଗୃହରେ ପର୍ଯ୍ୟାପ୍ତ ସମର୍ଥନ ନାହିଁ। ହାଉସ ରିପବ୍ଲିକାନ୍ସରେ ମଧ୍ୟ ପ୍ରମାଣ ନାହିଁ ବୋଲି କହିଛନ୍ତି। ଏହା କେବଳ ଏକ ରାଜନୈତିକ ଷଡ଼ଯନ୍ତ୍ର ବୋଲି ପିଆର କହିଛନ୍ତି। ତେବେ ମହାଭିଯୋଗ ନେଇ ରାଷ୍ଟ୍ରପତି ଜୋ ବାଇଡେନ କିଛି କହି ନାହାଁନ୍ତି।
