ଇସ୍ଲାମାବାଦ୍,୧୧।୪: ପାକିସ୍ତାନରେ ମାସକରୁ ଲାଗିରହିଥିବା ରାଜନୈତିକ ସଙ୍କଟର ଏବେ ଅବସାନ ଘଟିଛି। ସୋମବାରରୁ ପାକିସ୍ତାନରେ ଶେହଓ୍ବାଜଙ୍କ ଯୁଗ ଆରମ୍ଭ ହୋଇଛି। ପୂର୍ବତନ ପ୍ରଧାନମନ୍ତ୍ରୀ ନଓ୍ବାଜ ଶରିଫଙ୍କ ଭାଇ ତଥା ପିଏମ୍ଏଲ୍-ଏନ୍ର ଅଧ୍ୟକ୍ଷ ଶେହଓ୍ବାଜ ଶରିଫଙ୍କୁ ପାକିସ୍ତାନର ନୂତନ ପ୍ରଧାନମନ୍ତ୍ରୀ ଭାବେ ଚୟନ କରାଯାଇଛି। ରାତି ସାଢ଼େ ୮ଟାରେ ଶେହଓ୍ବାଜ ଶପଥ ଗ୍ରହଣ କରିବାର କାର୍ଯ୍ୟକ୍ରମ ରହିଥିଲା। କିନ୍ତୁ ଶପଥ ଗ୍ରହଣରେ ବର୍ତ୍ତମାନ ଏକ ଟୁଇଷ୍ଟ ଆସିଯାଇଛି। ଦେଶର ରାଷ୍ଟ୍ରପତି ଆରିଫ ଅଲଓ୍ବି ଶେହଓ୍ବାଜଙ୍କୁ ଶପଥ ଗ୍ରହଣ କରାଇବାର ଥିଲା। କିନ୍ତୁ ଆରିଫ୍ ଅଲଓ୍ବିଙ୍କ ସ୍ବାସ୍ଥ୍ୟାବସ୍ଥା ବିଗିଡ଼ିବାରୁ ସେ ଛୁଟିରେ ପଳେଇ ଯାଇଛନ୍ତି। ତେଣୁ ସେ ଦେଶର ନୂତନ ପ୍ରଧାନମନ୍ତ୍ରୀଙ୍କୁ ଶପଥ ପାଠ କରାଇପାରିବେ ନାହିଁ। ତେବେ ଶୁଣିବାକୁ ମିଳିଛି ଯେ, ସିନେଟର ଅଧ୍ୟକ୍ଷ ସାଦିକ ସଞ୍ଜରାନି ଶେହଓ୍ବାଜଙ୍କୁ ଶପଥ ପାଠ କରାଇବେ।
