ନୂଆଦିଲ୍ଲୀ,୧୧।୩: ଦିଲ୍ଲୀ ହାଇକୋର୍ଟର କାର୍ଯ୍ୟକାରୀ ପ୍ରଧାନ ବିଚାରପତି ଭାବେ ନିଯୁକ୍ତ ହେଲେ ଜଷ୍ଟିସ ଭିପିନ ସାଙ୍ଗୀ। ପ୍ରଧାନ ବିଚାରପତି ଡି.ଏନ୍ ପଟେଲଙ୍କ ଅବସର ପରେ ଶୁକ୍ରବାର ରାଷ୍ଟ୍ରପତି ରାମନାଥ କୋବିନ୍ଦ ତାଙ୍କୁ ନିଯୁକ୍ତ କରିଛନ୍ତି। ଦିଲ୍ଲୀ ହାଇକୋର୍ଟର ବରିଷ୍ଠ ବିଚାରପତିି ଭିପିନ ସାଙ୍ଗୀ ମାର୍ଚ୍ଚ ୧୩ରୁ କାର୍ଯ୍ୟକାରୀ ପ୍ରଧାନ ବିଚାରପତି ଭାବେ କାର୍ଯ୍ୟ ଆରମ୍ଭ କରିବେ। ଜଷ୍ଟିସ ସାଙ୍ଗି ପ୍ରଥମେ ବରିଷ୍ଠ ଆଇନଜୀବୀ ମୁକୁଲ ରୋହତଗିଙ୍କ କାର୍ଯ୍ୟାଳୟରେ କାର୍ଯ୍ୟ କରୁଥିଲେ। ୧୯୯୦-୯୧ରେ ସେ କେନ୍ଦ୍ର ସରକାରୀ ପ୍ୟାନେଲର ଆଇନଜୀବୀ ଭାବେ ନିଯୁକ୍ତ ହୋଇ କାର୍ଯ୍ୟ ସମ୍ପାଦନ କରିଥିଲେ। ସେହିପରି ଭାରତର ସର୍ବୋଚ୍ଚ ନ୍ୟାୟାଳୟ ସୁପ୍ରିମକୋର୍ଟରେ ମଧ୍ୟ ତାଙ୍କୁ କେନ୍ଦ୍ର ସରକାରୀ ପ୍ୟାନେଲର ଆଇନଜୀବୀ ଭାବେ ନିଯୁକ୍ତ କରାଯାଇଥିଲା। ଅନ୍ୟପଟେ ୨୦୦୫ ଡିସେମ୍ବରରେ ଦିଲ୍ଲୀ ହାଇକୋର୍ଟଙ୍କ ଦ୍ୱାରା ଜଷ୍ଟିସ ସାଙ୍ଗୀଙ୍କୁ ବରିଷ୍ଠ ଆଇନଜୀବୀ ଭାବରେ ନିଯୁକ୍ତ କରାଯାଇଥିଲା। ଏତଦ୍ ବ୍ୟତୀତ ୨୦୦୬ ମେ’ ୨୯ରୁ ଦିଲ୍ଲୀ ହାଇକୋର୍ଟର ଅତିରିକ୍ତ ବିଚାରପତି ଏବଂ ୨୦୦୮ ଫେବୃଆରୀ ୧୧ରେ ତାଙ୍କୁ ବିଚାରପତି ଭାବେ ନିଯୁକ୍ତ କରାଯାଇଥିଲା।
