ନୂଆଦିଲ୍ଲୀ,୧୬।୬: ୨୦୨୪ ଲୋକ ସଭା ନିର୍ବାଚନର ଫଳାଫଳ ଭାଜପାକୁ ଏକ ବଡ ଝଟକା ଦେଇଛି। ଦେଶକୁ ସର୍ବାଧିକ ଏମପି ପ୍ରଦାନ କରୁଥିବା ଉତ୍ତରପ୍ରଦେଶରେ ଭାଜପାର ପ୍ରଦର୍ଶନ ନିରାଶାଜନକ ଥିଲା ଏବଂ ଏଠାରେ ସମାଜବାଦୀ ପାର୍ଟି ସର୍ବାଧିକ ୩୭ ଟି ଆସନ ଜିତିଛି।
ଉତ୍ତରପ୍ରଦେଶରେ ଭାଜପାର ଖରାପ ପ୍ରଦର୍ଶନ ପରେ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ବିଷୟରେ ଅନେକ କଳ୍ପନାଜଳ୍ପନା ଚାଲିଛି। ଏହି ସମୟରେ ଯୋଗୀ ଆଦିତ୍ୟନାଥଙ୍କ ବିଷୟରେ ଏକ ବଡ ଦାବି କରାଯାଇଛି।
ଇଣ୍ଡିଆନ ଏକ୍ସପ୍ରେସ ସହ ଜଡିତ ଜଣେ ବରିଷ୍ଠ ସାମ୍ବାଦିକ ଶ୍ୟାମଲାଲ ଯାଦବ ତାଙ୍କ ପୁସ୍ତକ “ଦି ହାର୍ଟ ଅଫ ପାୱାର: ଉତ୍ତରପ୍ରଦେଶର ମୁଖ୍ୟମନ୍ତ୍ରୀ” ରେ ଦାବି କରିଛନ୍ତି ଯେ ୨୦୨୨ରେ ଅନୁଷ୍ଠିତ ୟୁପି ବିଧାନସଭା ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ହଟାଇବା ପାଇଁ ସମ୍ପୂର୍ଣ୍ଣ ପ୍ରସ୍ତୁତି ଚାଲଥିଲା।
ଶ୍ୟାମ ଲାଲ ଯାଦବ ତାଙ୍କ ପୁସ୍ତକରେ ଲେଖିଛନ୍ତି ଯେ ଏକ ସମୟରେ ନିଷ୍ପତ୍ତି ନିଆଯାଇଥିଲା ଯେ ଯୋଗୀ ଆଦିତ୍ୟନାଥଙ୍କୁ ମୁଖ୍ୟମନ୍ତ୍ରୀ ପଦରୁ ହଟାଇ ଦିଆଯିବ। ତେବେ ପରେ ଦଳ ହୃଦୟଙ୍ଗମ କରିଛି ଯେ ଯଦି ତାଙ୍କୁ ୟୁପିରୁ ହଟାଇ ଦିଆଯାଏ ତେବେ ଭାଜପାକୁ କ୍ଷତି ସହିବାକୁ ପଡିବ।
ଯଦିଓ, ଏହି ପୁସ୍ତକରେ ସେ ଯୋଗୀ ଆଦିତ୍ୟନାଥଙ୍କୁ ହଟାଇବା ପାଇଁ ଉଦ୍ୟମ କରିବାର କାରଣ ଦର୍ଶାଇ ନାହାଁନ୍ତି, କିନ୍ତୁ ଏଥିରେ ଉଲ୍ଲେଖ କରାଯାଇଛି ଯେ ୟୁପିର ତତ୍କାଳୀନ ଉପ ମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟଙ୍କ ସହ ତାଙ୍କର ମତଭେଦ ବଢିବାରେ ଲାଗିଛି।
ସୂଚନାଯୋଗ୍ୟ, ଉତ୍ତର ପ୍ରଦେଶରେ ଭାଜପେ କେବଳ ୩୩ ଟି ଲୋକ ସଭା ଆସନ ଜିତିଛି। ଏହାପୂର୍ବରୁ ୨୦୧୪ ଏବଂ ୨୦୧୯ରେ ଭାଜପା ଚମତ୍କାର ପ୍ରଦର୍ଶନ କରିଥିଲା।
ଏହାପୂର୍ବରୁ ଅରବିନ୍ଦ କେଜରିୱାଲ ମୁଖ୍ୟମନ୍ତ୍ରୀ ଯୋଗୀଙ୍କ ସମ୍ପର୍କରେ ଏକ ବିବୃତ୍ତି ଦେଇଛନ୍ତି। ସେ କହିଥିଲେ ଯେ ଯୋଗୀ ଆଦିତ୍ୟନାଥଙ୍କୁ ହଟାଇବାକୁ ଭାଜପା ପ୍ରସ୍ତୁତ ହେଉଛି।
