ଭଞ୍ଜନଗର,୧୦।୬(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ନିକଟସ୍ଥ କୁଲାଡ ଜଗନ୍ନାଥ ମନ୍ଦିର ୧୭୬୦ ମସିହାରେ ପ୍ରତିଷ୍ଠା ହୋଇଥିଲା। କବିସମ୍ରାଟ ଉପେନ୍ଦ୍ର ଭଞ୍ଜ ରାଜବଂଶ ପକ୍ଷରୁ ଉକ୍ତ ମନ୍ଦିର ନିର୍ମାଣ କରାଯାଇଥିଲା । ବର୍ତ୍ତମାନ ଦେବୋତ୍ତର ବିଭାଗ ଅଧିନରେ ମନ୍ଦିର ପରିଚାଳିତ ହେଉଛି। ଭଞ୍ଜନଗର ଉପଜିଲାପାଳ ମନ୍ଦିରର ସଭାପତି ଅଛନ୍ତି। ତେଣୁ ଆସନ୍ତା ରଥଯାତ୍ରା କିଭଳି ଶୃଙ୍ଖଳିତ ଭାବେ ହେବ ସେଥିପାଇଁ ପ୍ରଥମ ପ୍ରସ୍ତୁତି ବୈଠକ ଆସନ୍ତା ୧୨ ତାରିଖରେ ଭଞ୍ଜନଗର ଉପ ଜିଲାପାଳଙ୍କ କାର୍ଯ୍ୟାଳୟରେ ଅନୁଷ୍ଠିତ ହେବ।
ତେଣୁ ଉପ ଜିଲାପାଳ ଉମା ଶଙ୍କର ବେହେରାଙ୍କ ନିର୍ଦ୍ଦେଶକ୍ରମେ ଏନେଇ ତହସିଲଦାର ବିଭିନ୍ନ ବିଭାଗର ଅଧିକାରୀଙ୍କୁ ବୈଠକରେ ଯୋଗ ଦେବାପାଇଁ ଚିଠି ଲେଖିଛନ୍ତି । ବୈଠକରେ ବିଧାୟକ ପ୍ରଦ୍ୟୁମ୍ନ କୁମାର ନାୟକ ମଧ୍ଯ ଯୋଗଦେବାର ସମ୍ଭାବନା ରହିଛି। ଏଥିସହ ଆସନ୍ତା ୧୭ ତାରିଖରେ ଭଞ୍ଜନଗର ତହସିଲ କାର୍ଯ୍ୟାଳୟ ପରିସରରେ ମନ୍ଦିର ଜମିର ନିଲାମ ହେବ। ତେଣୁ ଅଧିକରୁ ଅଧିକ ଲୋକ ନିଲାମରେ ଅଂଶଗ୍ରହଣ କରିବା ପାଇଁ ପ୍ରଶାସନ ପକ୍ଷରୁ ନିବେଦନ କରାଯାଇଛି । ସେହିଭଳି ପୁରୁଣା ରଥର ଚକ ଗୁଡ଼ିକର କିଛି ଅଂଶ ଭଗ୍ନ ଅବସ୍ଥାରେ ଅଛି। ତାହାର ମରାମତି ପାଇଁ କାଠ ଆବଶ୍ୟକ। ଏନେଇ ବନ ବିଭାଗକୁ ଚିଠି ଲେଖାଯାଇଥିଲା କାଠ ଦେବାପାଇଁ । କିନ୍ତୁ ବନ ବିଭାଗ ମାଧ୍ୟମରେ ଜଙ୍ଗଲରୁ କାଠ ଜଙ୍ଗଲରୁ ଆଣିଲେ ଯେତିକି ଖର୍ଚ୍ଚ ହେଉଛି ତାଠୁ କମ୍ ଖର୍ଚ୍ଚ ହେବା ସମ୍ଭାବନା ରହିଛି। ତେଣୁ ସ୍ଥାନୀୟ ଓଡ଼ିଶା ବନ ଉନ୍ନୟନ ନିଗମ ଗୋଦାମରୁ କାଠ କିଣି ଅଣାଯିବ। ତେଣୁ ଅତିରିକ୍ତ ତହସିଲଦାର ଅବିନାଶ ମାହାର, ରାଜସ୍ୱ ନିରୀକ୍ଷକ ଭଗବାନ ବେହେରା ପ୍ରମୁଖ ବୁଧବାର ସ୍ଥାନିୟ ନିଗମ ଗୋଦାମରେ ପହଞ୍ଚି କାଠ ଚୟନ କରିଥିଲେ। ଖୁବଶୀଘ୍ର ଉକ୍ତ କାଠ କିଣି ଆଣିଲେ ରଥ ମରାମତି ହେବ। ଆସନ୍ତା ଜୁଲାଇ ମାସ ୧୭ ତାରିଖରେ ରଥଯାତ୍ରା ପଡୁଛି।
ସୂଚନାଯୋଗ୍ୟଯେ କୁଲାଡ ଜଗନ୍ନାଥ ମନ୍ଦିର ପରିଚାଳନା ପାଇଁ ରାଜ ବଂଶ ପକ୍ଷରୁ କୋଟି କୋଟି ଟଙ୍କାର ଅଳଙ୍କାର ଓ ଜମି ଦାନ କରାଯାଇଥିଲା । ପରବର୍ତ୍ତୀ ପର୍ଯ୍ୟାୟରେ ଲୋକେ ଅଧିକାଂଶ ଜମି ଜବର ଦଖଲ କରିନେଲେ। ଜବରଦଖଲକାରୀଙ୍କୁ ପ୍ରଶାସନ ଉଚ୍ଛେଦ କରି ପାରୁନାହିଁ । ଅନ୍ୟପଟେ ଠାକୁରଙ୍କ ରତ୍ନ ଭଣ୍ଡାରରେ ଥିବା କୋଟି କୋଟି ଟଙ୍କାର ଅଳଙ୍କାର ୧୯୯୩ ମସିହାରେ ଚୋରି ହୋଇଯାଇଥିଲା । ଆଜି ପର୍ଯ୍ୟନ୍ତ ଉକ୍ତ ଅଳଙ୍କାର ଉଦ୍ଧାର ହୋଇପାରିନାହିଁ। ଠାକୁରଙ୍କ ସିଂହ ବେସ ଦିନ କୁଲାଡର ଏକ ଅନୁଷ୍ଠାନ ଅଳଙ୍କାର ଦାନ କରନ୍ତି । ଯାତ୍ରା ସରିବା ପରେ ଅଳଙ୍କାର ନେଇଯାଆନ୍ତି । ଗୋଟିଏ ପଟେ ଜମି ଜବରଦଖଲ ଅନ୍ୟପଟେ ଅଳଙ୍କାର ଶୂନ୍ୟ। ତେଣୁ ଠାକୁରଙ୍କ ଅନେକ ପର୍ବ ପର୍ବାଣୀ ଆଉ ପାଳିତ ହେଉନାହିଁ। ଏହିଭଳି ପରିସ୍ଥିତିରେ ଗତବର୍ଷ ମନ୍ଦିର ପରିଚାଳନାରେ ସହଯୋଗ କରିବା ପାଇଁ ଗ୍ରାମବାସୀଙ୍କୁ ନେଇ ଏକ କମିଟି ଗଠନ ହୋଇଛି । ଏଥିସହ ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ ମଧ୍ଯ ଯାତ୍ରା କିଭଳି ଆକର୍ଷଣୀୟ ହୋଇପାରିବ ସେଥିପାଇଁ ଚେଷ୍ଟା ଚଳାଇଛନ୍ତି ।
