ନୂଆଦିଲ୍ଲୀ,୮।୨: କଂଗ୍ରେସ ନେତା ନବଜୋତ ସିଂ ସିଦ୍ଧୁ ନିଜ ମନ୍ତବ୍ୟକୁ ନେଇ ସର୍ବଦା ଚର୍ଚ୍ଚାରେ ଥାନ୍ତି। ଏବେ ନିର୍ବାଚନ ରଣନୀତିଜ୍ଞ ପ୍ରଶାନ୍ତ କିଶୋରଙ୍କୁ ନେଇ ପୁଣି ମଙ୍ଗଳବାର ଏକ ଚର୍ଚ୍ଚିତ ମନ୍ତବ୍ୟ ଦେଇଛନ୍ତି। ସିଦ୍ଧୁ କହିଛନ୍ତି ଯେ, ୨୦୧୭ ପଞ୍ଜାବ ବିଧାନସଭା ନିର୍ବାଚନରେ ପ୍ରଶାନ୍ତ କିଶୋର କଂଗ୍ରେସର କ୍ୟାମ୍ପେନିଂ ରଣନୀତି ଦାୟିତ୍ୱ ସମ୍ଭାଳିଥିଲେ। ଦଳରେ ସାମିଲ ହେବା ପାଇଁ ସେ ମୋତେ ଚାପ ପକାଇଥିଲେ। ଏଥିପାଇଁ ସେ ମୋତେ ପାଖାପାଖି ୭୦ ଥର ଭେଟିଥିବା ସିଦ୍ଧୁ କହିଛନ୍ତି। ସେ ଆହୁରି ମଧ୍ୟ କହିଛନ୍ତି, କଂଗ୍ରେସରେ ମିଶିବା ପାଇଁ ପ୍ରଶାନ୍ତ ବହୁତ ଇଚ୍ଛା ଥିଲା। ପୂର୍ବରୁ ସିଦ୍ଧୁଙ୍କୁ ନେଇ ପ୍ରଶାନ୍ତ କିଶୋର ଏକ ବିବାଦୀୟ ମନ୍ତବ୍ୟ ଦେଇଥିଲେ। ଯଦି ପଞ୍ଜାବ କଂଗ୍ରେସରେ ସିଦ୍ଧୁ ମଙ୍ଗ ଧରନ୍ତି ତେବେ ଦଳ ୩୦ରୁ ୩୫ଟି ଆସନ ପାଇବ ନାହିଁ ବୋଲି ପ୍ରଶାନ୍ତ କିଶୋର କହିଥିଲେ।
ସୂଚନା ଯୋଗ୍ୟ, ପ୍ରଶାନ୍ତ କଂଗ୍ରେସରେ ଯୋଗ ଦେବା ନେଇ ଚର୍ଚ୍ଚା ଜୋର ଧରିଥିଲା। କିନ୍ତୁ ବହୁ ଆଲୋଚନା ପରେ ମଧ୍ୟ ଏହା ସମ୍ଭବ ହୋଇ ନ ଥିଲା। ଏହାପରେ ପ୍ରଶାନ୍ତ କଂଗ୍ରେସ ବିରୋଧରେ ମନ୍ତବ୍ୟ ଦେଇଥିଲେ।
